Farturruta a la Ermita d'Alba comiendo en Casa Jamallo

Seles: Bárzana - Quirós

Teléfonu: 985 768 133

Web: http://casajamallo.webcindario.com/
Facebook: https://www.facebook.com/casa.jamallo/
Twitter: [@casajamallo] https://twitter.com/casajamallo

Anterior Visita: https://lesfarturesast.blogspot.com/2020/11/nueva-visita-casa-jamallo.html

Calidá: 4/5

Preciu: 25€

Comentarios: Quirós ye un llugar máxicu, llenu de valles, montes espectaculares, pueblos preciosos y tradiciones antigües. Güei voivos a llevar a la Ermita d'Alba, una ruta bien fácil y pa cualesquier edá. Ello ye que tolos 15 d'Agostu xuben caminando hasta la mesma pa celebrar la Fiesta del Alba.

La ruta son 6kms en total (día y vuelta). Unes 2h y media dir y volver como muncho. Salimos dende’l pueblu de Salceo, preciosu, onde a la entrada tenéis un área recreativa con una zona p'aparcar el coche. La ruta son 3kms de xubida hasta la ermita, pel camín antiguu, que ta abondo tomao (anque nós xubimos per él), la otra opción, que ye la que fai tol mundu, ye que xubáis hasta la ermita pela carretera. Nun tien peligru nengunu de tráficu. Y la tercer opción, pa les persones que nun quieran o puedan caminar, ye que xuban el coche hasta l’área recreativa que ta casi a los pies de la ermita.

Tenéis 3 planes posibles nesta Farturruta, pa tolos gustos.

Nós travesamos el pueblu y tomamos el camín antiguu de xubida, inclusive a los habitantes del pueblu sorprendió-yos que pudiéramos xubir. El camín atópeslu nesti puntu exautu. Al altor d'esa corte que veis na semeya, hai un camín de tierra qu'indica la xubida.

Ye’l camín de xubida a la ermita de siempre, y da-y un encantu especial. A metá de xubida vais tener que travesar la carretera. Asina que si lo véis bien mal, siempres podéis siguir pela carretera.

La xubida pol camín ye más curtia, pero tien daqué más pindia. Y la xubida pela carretera ye daqué más llarga pero más tendida. Nenguna ye dura y faise bien llevadera. Amás, según vaigáis ganando altor, les vistes sobre Salceo son más impresionantes.

Al poco de xubir, empezamos a ver el nuesu oxetivu. ¿Veis esos trés cruces? Pos ehí hai que llegar.

El camín traviesa la carretera, pero podéis siguir per él.

Nel intre llegamos a l’Área Recreativa L'Alba, onde como veis, pue xubise en coche.

Dende ellí, quédanos una subidina per pista ganadera d'unos 20min hasta la Ermita. Na xubida yá podéis almirar el famosu Gamoniteiru y vais atopar la preciosa Braña de La Teḷḷera, perbién caltenida.

Dende ellí un xiru a la izquierda travesando la pradería onde se celebra la folixa, y namás queda la última xubida hasta la Ermita. Vemos tamién la Peña d'Alba, a la que podemos xubir ensin nengún problema, son unos 20min dende la Ermita.

La llegada a la Ermita ye espectacular. Construyida nel SXVI, nun tien valor arquiteutónicu, pero sí muncha tradición y devoción.

Pero ensin dulda, en cuanto llegues a la parte delantera, y asomes al so famosu mirador coles 3 cruces de madera… Yá quedes cola boca abierta. Una vista espectacular sobre manera’l valle de Quirós, con Las Ubiñas, Peña Rueda, el Banzáu de Valdemurio.

La vista nun día estenao ye impresionante.

Tres l'habitual botella de sidra na Ermita, empezamos el descensu.

Esta vegada yá la fiximos per carretera. Como veis ye preciosu y ta muncho meyor qu'el camín pol que xubimos. Asina que si nun queréis aventuravos enforma, aconséyovos ye que xubáis tamién pequí.

Pa comer, volvimos a unu de los templos de la cocina asturiana. Casa Jamallo, que ta en Bárzana, capital de Quirós, a 5kms de Salceo. Famosu polos sos platos tradicionales. Edificiu enorme metanes la carretera que traviesa’l pueblu, tien 4 plantes, ya inclusive un horru na parte de baxo onde ye una maravía tomar una botellina sidra. Zona de barra, y meses pa tomar daqué, y nel pisu de riba un par de salones grandes, con meses abondo espacies y una cristalera dende la que perdese coles vistes. Decoración bien curiada en piedra y madera.

Les escaleres de madera, son una pasada. Comimos un pocu de too pa probar delles coses, anque si vas ellí, nun puedes perdonar el Pote Castañes, que cuesta atopalo n'otros sitios, y ye típicu d'otres dómines d'economía de subsistencia pero que non quitaba d'ellaborar un platu deliciosu.

Empezamos pol Pote Castañes. Una maravía. Tira a dulce, pero compensa col compangu. A mi préstame pola vida.

Pote Asturianu. Ún de los meyores que podéis probar. Perfeutu.

Fabada. Bien bona, pero pelín meyor el pote.

Y una Ensalada Mista. Enorme.

Viendo lo visto, casi nin pidimos segundos, pero animámonos con un Sollombu de Xata. Bien bonu, carne tienro y al puntu perfeuto. Con pataques, de verdá, pimientos y ensalada.

Y otru de los platos estrelles de la casa, Xabalín. Maraviyosu.

Pero nun quedamos ehí, probemos l'Arroz con Lleche. Daveres bonu.

Y la so tarta Garrucha. Garulla n’asturianu ye un conxuntu de frutos secos, y n'asturianu occidental, la grafía perfeuta pa escribilo sería Garuḷḷa, y pronunciáu, casi como si fuera Garrucha. D'ende’l nome la tarta. Lleva ablanes, nueces y castañes. Una base de miel, güevos y pasta quebrao. Ye contundente, pero ta bonísima.

Y si queréis, mui cerca del restorán, pa la sobremesa, podéis averavos el Teixo Bermiego.

Considerao l'árbol más antiguu d’Asturies y unu de los más antiguos d'Europa, más que milenariu. Un sitiu máxicu. Casi 7m de diámetru d'hestoria pura.

Farturruta facilina, con unes vistes espectaculares, comiendo n'ún de los templos de la gastronomía asturiana, y visitando unu de los árboles más antiguos d'Europa.