El Patio de Butacas - World Class Competition

Señes: Plaza Les Campes - La Pola Siero

Web: https://elpatiodebutacas.es/

Facebook: https://www.facebook.com/ElPatiodeButacasSiero/
Instagram [@elpatiodebutacas]: https://www.instagram.com/elpatiodebutacas/

Comentarios: Una coctelería de la Pola acaba de ser preseleicionada pa la World Class Competition ente los 60 meyores del Estáu, y vós vais dicir, "na, va ser el típicu concursu que con solo presentate yá te dan un premiu". Y non, World Class Competition ye’l meyor concursu de coctelería del mundu y ye que, amás, d'esos 60, el 90% pertenecen a "grandes sitios" como Madrid y Barcelona, y quitando El Patio de Butacas, nun esiste nengún otru seleccionao d’Asturies, Galicia, Cantabria o Castiella-Llión.

Tania y Berto lleven años apurriendo imaxinación, talentu y entusiasmu ayudando a que La Pola recupere parte de la so rellumanza y apostando por quedase y lluchar polo de casa. Y tan consiguiendo. Nun lleguen a los 30 años y yá tienen 3 locales na Pola, caún col so propiu ambiente y pa tolos públicos.

Pero de toos, la so "neña mimada" ye El Patio. Y en reinventándose mientres esta pandemia cola unviada d'unes "caxes-vermú" que son tou un ésitu pa siguir esfrutando , #animar a participar na World Class Competition con un cóctel al que dedicaron munches hores d'investigación. Imaxináivos xuntar Güisqui Escocés Afumao, con panceta de gochu asturcelta, pan de masa madre de cerveza Guinness, chocolate y ablana. Y que tou naciera d'una cocina d'aprovechamientu.

Cola ayuda d’Abraham Carbayeda, cocineru de La Loca, ellaboraron un guisu de panceta de gochu asturcelta asáu a baxa temperatura, con un toque de soya, citronela y xenxibre. Al zusmiu-y añadieron vodca pa fortificar y una solución cítrica pa permediar. En coctelería, esti tipu d'amiestos pónen-y el nome de Cordial. A partir del so pan vieyo de masa madre fechu con Guinness, ellaboraron un Kvass (típico bébora lleldada rusa), con chocolate y con ablana y dexándolo lleldar pa llograr una burbuya natural. Entemecieron el Cordial y el Kvass y, poques gracies, añadiéron-y Talisker, una maravía de güisqui escocés, afumao, single malt. P'arredondiar esti procesu, encargaron un escanciáu llétricu en 3d, pol que pasen l'amiestu 4 vegaes pa que ventile, dilir l'amiestu y da-y espectacularidá a la presentación.

Y acaben de presentar el cóctel con un Bombón de Chocolate Amargosu rellenu de Zusmiu de la Panceta del Gochu Asturcelta. Onde tamién-yos ayudó nel procesu Borja del Abrelatas. Como veis, un trabayu enorme qu'esperemos que llogre la recompensa nos próximos díes cuando tenga llugar la siguiente fase dientro del concursu. Anque llegar onde llegaron, dende la Pola, yá supón tou ésitu, y conociéndolos un pocu, de xuru que nos dan munchos más.

¡Norabona Tania y Berto ! Y qué ganes tenemos que vuelva El Patio de Butacas pa que toos podáis probalo.