Conserves Agromar

 

Señes: El Musel 

Teléfonu: 985 321 815

Web: https://www.agromar.es/
Facebook: https://www.facebook.com/Conservas-Agromar/
Instagram: [@conservasagromar] https://www.instagram.com/conservasagromar/

Comentarios:  Asturies foi una potencia conservera mientres más de 1 sieglu. Cunten qu'en cada puertu asturianu había una fábrica de conserves, siendo los puertos de Candas, Xixón o Llastres los que tuvieron conserveres de mayor importancia y sonadía. Nos años 30 del sieglu pasao, yéramos la mayor potencia del Mar Cantábricu.

Colos años, casi tola producción concentróse en Galicia, sobre manera en Vigo, y les conserveres asturianes pasaron a ser pequeñes fábriques, casi artesanes. Costaba muncho atopar conserva asturiana nes tiendes y, sobre manera, nos supermercaos.

Pero Conserves Agromar lleva aguantando dende 1948 qu'empezó la so andadura y foi creciendo adulces, hasta l'ampliación de 1 millón d'euros que fixeron anguaño na so fábrica pa faer una apueste pol futuru.

Pue sonar a llocura ampliar la fábrica cola que ta cayendo, pero Agromar lo tien claro, como lo tuvo cuando fueron los primeros n'empezar a envasar en llates los oricios, nel 87; o como cuando empezaron la so andadura, allá pol 48 envasando güeves d’oricios.

Va unos años empezaron con una llinia de cocina tradicional asturiana, y en parte esta ampliación debese a la necesidá de dixebrar la producción de conserves con ésta de cocina tradicional, que llamen Arbeyal. Distintos pates (de morciella, de cabrales o venáu), fabada, cebolles rellenes …

La fábrica ta estratéxicamente asitiada en frente la rula de Xixón. Cúntennos que, en temporada de bonitu, descarguen el barcu y direutamente llévenlo al almacén. Asina, precisen un almacén ampliu por cuenta que namás merquen productu de temporada.

Poder ver la ellaboración de les conserves de bonitu ye impresionante. Un trabayu dafechu artesanal, dende’l descabezáu y cocináu orixinal, hasta’l peláu y envasáu a mano que faen. El bonitu, mérquenlo na rula a primer hora la mañana. A les 8 hores yá ta na fábrica. Descabezase, llávase, métenlu nunes parrilles y depués cuez n'agua y sal. Ha d'esfrecer tola nueche y a otru día púlgase a mano. Una vegada que los llombos tán llimpios, estázase. Añaden l'aceite d'oliva y pasa a l’autoclave. Ye un tratamientu térmicu qu'inventaron na dómina de Napoleón. Naquella dómina nun yera seguro, pero ehí empezó la conserva. Ye lo que fai que'l productu aguante ensin aditivos.

Tampoco se queda tras la ellaboración de les conserves d'anchoes, que pasa 9 meses sazonáu en barriles pa dir envasando adulces según les sos necesidaes de venta.

Dempués d'una visita pela fábrica, lo meyor yera demostrar que la Gastronomía en Conserva ta de moda y que pue xugase con elles pa consiguir platos bonísimos. Asina que qué meyor que Jose Luis Camacho, cocineru del Zascandil, pa ellaboranos platos a partir de les conserves d’Agromar.

Con esta materia primo, esti cocineru y estes vistes, amás, mal se tenía que dar la cosa pa nun salir encantaos.

Empezamos con un Paté de Sardines. Sobre un pan típico italianu llamáu Casarutto. El paté ye l'últimu productu que sacaron al mercao, típicu de Portugal. Y ta bien bonu. 

Siguimos con un Bocarte Pequeñu con Guindilla sobro Pan de Coca con Pimientos Asaos. Tosta bonísima.

Moxón n'Escabeche con Vinagre de Sidra. L'escabeche de vinagre de sidra, diznos Jose Luis que ye más suave y elegante que con otros vinagres. Contrasta con cebolla, pimientu coloráu y pimientu verde, ayu mariellu y perexil. Da-y un toque de llima y zusmiu de piña. Y ta brutal. Encantónos.

Vien tamién con una Tortiella de Puerru y Güeves de Merluza. Un fondu de cebolla y puerru. Y güeyu, qu'eses güeves de merluza pue que sía’l so productu más esclusivu. Tán bonísimes.

Confiésennos que'l nome llevalo la Ventrisca, pero qu'el so Cogote de Bonitu nun tien muncho qu'envidia-y y que la diferencia de preciu ye grande. Tien más testura y ye un pelín más duru. Pero sabe xenial y son de los pocos que lo ellaboren en conserva. Lleva d'acompañamientu una escalibada.

Debaxo, con una presentación orixinal, vien l'Anchoa con Mantega d'Anchoa. Camacho aprovechó pa reivindicar la calidá de la mantega asturiana.

Lasaña d’Oricios. Los oricios, esplícanos Camacho, namás se comíen n’Asturies, Cádiz y Girona. Asina qu’afixo esta receta de Sacha xuniendo Cádiz y Asturies. Lasaña con un fondu de puerru y tomate. Y l’oriciu rematao con pesto verde de rúcula. Maraviyosu.

Y acabamos con un platu de la so gama arbeyal. Les sos Cebolles Rellenes. Y la verdá ye que nun tienen nada qu'envidiar a munches de les que tomamos en restoranes.

Pa beber, Armando Barrio, el so direutor xeneral, esixó que conserva asturiano pidía bébora asturiano, asina qu'empezamos con Poma Aurea Brut del Llagar Trabanco, siguimos con Siete Vidas Albarín Blanco de Bodega Vidas y acabamos con Penderuyos Selección Especial, del qu'hai mui poques botelles y encantónos. Presta qu'empreses asturianes apuesten por sofitase ente elles.

Tradición y hestoria, con anovación y futuru. Ya nos prestaben los productos d’Agromar (mimantu, fai 7 años yá d'esto), pero agora dempués de conocer la so hestoria y cómo trabayen, inda más.