Farturruta de la Playa Gueirúa a la del Gavieiru (Silencio) comiendo El Rosal

Señes: Samartín de Lluiña
Teléfonu: 985 596 147

Facebook: https://www.facebook.com/ElRosal

Calidá: 3/5

Preciu: 15€

Comentarios: Vamos de Farturruta por dos de les sableres más espectaculares d’Asturies, na zona occidental, nel conceyu de Cuideiru. Dende la Sablera de Gueirúa hasta la Sablera del Gavieiru apenes hai 3kms que podemos faer cómodamente a pie pela carretera nacional que xune los pueblos de Santa Marina y Castañeras, güei, gracies a l'Autovía del Cantábricu, con poco tráficu ; o inclusive, pa los más vagos, pue dise d'un pueblu a otru en coche pa los que nun quieran o puedan caminar.

Pero nós proponémosvos un percorríu alternativu, utilizando un tramu del Camín de Santiagu, que, yá vos adelantro, nun ta nel meyor de los estaos, pero que-y da un toque muncho más guapu y aventureru que'l dir de sablera a sablera per una carretera.

La ruta la Sablera de Guerúa a la Sablera del Gavieiru (Silenciu) son unos 3,5kms (ida). Más baxar a la sableres y percorreles, anduvimos unos 8,5kms. Nun tien más desnivel que les baxaes a les sableres, que, güeyu, son con pasos y tienen un desnivel pronunciáu, d'unos 300m. Como se termina nel mesmu puntu que s'empecipia, podéis faela nel sentíu que queráis. Amás de dir con alzao qu'agarre, aconseyámosvos faer la ruta cuando la marea tea baxa.

Empezamos nel pueblu de Santa Marina, y dexamos el coche nel parque, nun pequeñu apartaderu que nun molesta.

Dende ehí, a pocos metros, atopamos el cartelu que nos indica’l camín que nos lleva hasta la sablera.

Son unos 500m hasta la sablera per un camín preciosu. Anque veáis bon camín, nun metáis el coche. Nun hai sitiu p’aparcar y nun ta en tan bon estáu como paez.

Adulces, vamos asomando a la mar, y yá vemos la espectacularidá del paisaxe. A éstes la sablera que veis al fondu, ye la del Gavieiru (o Silenciu), ellí vamos acabar la ruta.

Empieza la baxada hasta la Sablera de Gueirúa. Son unos cuantos pasos húmedos (con cuidu) que van dar a unes casetes con dalguna pequeña barca. Ye un paisaxe espectacular, onde amás, desagua un saltu d'agua al pie de les barques.

La cascada sigue y acaba na sablera, siendo’l paraísu perfeutu pa los amantes de la fotografía.

Les formaciones que tien la sablera, faen d'ella un paisaxe "marcianu". Espectacular. Únicu. Ensin dulda, una de les mios sableres favorites. Lo que veis al fondu, eses formaciones rocoses moldiaes pol vientu y la mar, ye lo que se conoz como "La Forcada". Estrema la Sablera de Gueirúa cola Sablera d'El Calabón, a la que solo vais poder aportar con marea baxa (y merez la pena). Na parte posterior, tien amás xuna cetaria abandonada, que siempres quedo tan embobao faciendo semeyes, qu'escaezo de visitar. Pero tar ta.

Nós pasamos a la Sablera del Calabón.

Inclusive al fondu veis la sablera onde hemos de llegar. Intentamos siguir el camín al traviés de la sablera, con dalgún accesu, pero lo que vimos taba bastante argayáu, asina que dimos la vuelta y volvimos pel camín d'accesu a la sablera.

Non ensin antes echar una última güeyada. Volvemos a Santa Marina.

A la entrada'l pueblu, pasando una casa blanca "moderna", vais atopar un cartelu qu'indica’l Camín de Santiagu. Como vos indiqué antes, el tramu podéis faelo per carretera si vos resulta más cómodu.

Nós metímonos por él.

Y afayamos un camín en mal estáu. Llenu de folla, escayos y xube-baxes, pero merez la pena.

El camín bordia’l cantil y en cuanto los ocalitos dexen, vense unes vistes impresionantes.

Ello ye que cuando llegamos a la punta que dixebra la sablera d'El Calabón de la Sablera de Ribera del Molín, les vistes son estes.

A partir d'ehí empieza una baxada, hasta la Sablera Ribera del Molín, a la que vais poder aportar. La particularidá d'esta sablera, ye que tien un Molín antiguu, qu'utilizaba l'agua del Regueru de Cándano que llega hasta la sablera.

Inclusive dende la sablera - con marea baxa-, podríais intentar cruciar a la Sablera del Gavieiru (Silenciu).

Anque nós xubimos pel camín (en muncho meyor estáu qu'el de baxada).

El camín lleva'l pueblu de Castañeras.

Tienes que travesalo .

Y yá s'empieza a ver La Sablera de Gavieiru (o Silenciu). De fechu dende esti mirador atopáis un bancu preciosu pa sentavos hores y hores.

Averamos hasta la sablera, que como veis, ye espectacular.

Otra baxada llena de pasos hasta la sablera (más de 100), con otru importante desnivel p'aportar a ella. Recibe’l so nome de Gavieiru pol cantar de les gaviluetes dende les parés del cantil retumbando na sablera en forma de Concha.

Tamién recibe’l nome de Silenciu, amás de pola paz que tresmite, pol ruíu que faen los cantares rodaos (bolos o regodones) col dir y venir de les foles. Ye maraviyosu tar ende sentao en silenciu.

Volvimos pelos nuesos pasos y esta vegada volvimos pela carretera, bordiando la zona de monte pela que fuimos a la ida d'una sablera a la otra. Yera sábadu y apenes cruciamos un par de coches.

Pa comer, averamos a Samartín de Lluiña, pueblu preciosu, con una Ilesia, del sXVIII, onde inda se pue lleer nel suelu de la mesma : "NUN PASAR D'EQUÍ AL OYER MISA LOS BAQUEIROS". Nós comemos bien cerca, nel Restorán El Rosal, arrodiaos inclusive de vaqueiros.

Conocíamos yá a los dueños del restorán de cuando probemos la Faba Verdina na cafetería que tienen xusto al llau. Agora fixéronse cargu del Restorán El Rosal. Tien una terraza cubierta bien guapa con unes cristaleres enormes.

Pidimos el menú, a 15€. De primeru Fabada.

Bien bona. La faba bien bona. Y la morciella sobresal. Gustónos enforma.

Tamién pidimos Pote. Berza picadina bien fina, con daqué de faba. Bien bonu. Gustónos inda más que la fabada.

De segundu, Picadiellu con Pataques. Bonísimo. Con un importante toque picante. Encantónos.

 

Y Corderu. Con pataques. Sobresaliente. Maraviyosu.

De postre, Tarta de quesu. Rica. De les suaves.

Y Mousse de Llimón. Que ganó claramente. Bonísimo.

Pagamos por tou 30€. Pa beber, el míticu vinu, casera y agua. Cocina bien bona, nun sitiu preciosu a un preciu inmeyorable. Gran sitiu.

Farturruta visitando una sablera bien conocida y otra non tanto, distintes y espectaculares dambes, con un camín entre cantiles que dixebren dambes sableres y comiendo n'El Rosal, casa de comíes tradicional a un preciu inmeyorable. Poco más pue pidise. Espero que vos preste.