Teléfonu: 985 620 142
Calidá: 3/5
Preciu: 32€
Comentarios: Güei voi llevavos a conocer la única cueva con arte prehistórico del occidente asturianu, un llugar llenu d'hestoria, y tamién de lleendes, al que vamos aportar al traviés d'un percorríu preciosu y poco conocíu.
Podéis empezar la ruta dende dos puntos distintos, dende Doiras, onde’l banzáu, con un camín que lu va bordiando y fai un entamu preciosu ; o dende Froseira, como nós, onde acortáis distancia y desnivel. El "únicu" problema que tien Froseira ye que tien un accesu per pista hasta’l pueblu onde namás entra un coche (anque hai apartaderos y nun ye peligrosu), el pueblu tien pocos habitantes, anque sí daqué de tránsitu ganaderu, asina que va ser difícil que cruciéis con daquién, pero tenéilo en cuenta. Les vistes pola pista sobro’l banzáu de Doiras de la que vais al pueblu, cuando hai un claru ente los ocalitos, son bien guapes.
La ruta son unos 6kms, día y vuelta, y llevónos unes 3h faela. Tien 1km con un pendiente fuerte, pero polo xeneral, nun ye una ruta dura. Hai unos 300m de desnivel. Tardamos 1h y cuartu en llegar a la cueva. Pa baxar, 1h.
Empezamos na localidá de Froseira. Una localidá preciosa. Asitiada al llau del Ríu Ourubiu, que fai d'ella un sitiu únicu. Nel sXVIII foi la mayor ferrería d’Asturies, y en La Casona del Ríu, ésa que veis enorme, tien un molín bien guapu, anque nun atopamos a naide pa poder visitalo.
Empezamos pel camín paralelu al ríu, con vistes bien guapes sobre praos y el mesmu ríu.
Nel intre, cruciamos el ríu per una ponte.
Y al poco vemos una esviadura que nos indica dos posibilidaes pa dir a la Cova. A la izquierda, el camín curtiu, de 2km (yá llevamos camináu 1km), y siguiendo’l camín principal, 10kms hasta la Cova. Esta ruta llévanos hasta’l Picu’l Cucu, dende onde podéis ver unes vistas bien guapes sobro’l banzáu, pa darréu baxar per una pista hasta la cueva.
Nós esviamos pol camín curtiu.
Tien 1km de fuerte desnivel. Pero namás ye 1km. Curtiu, pero intensu.
Monte de castañales, qu'en flor o na seronda ha de tar preciosu. Llenu de colores y contrastes. Fixeron la xubida más llevadera.
Adulces, el terrén empieza a llanear, y entramos más nel monte de Llanteiro.
Siguen les castañales y atopamos los corros onde recoyer y protexer les castañes.
La última parte'l camín, les piedres fáense presentes. Hai camín, pero siempres con cuidu d'onde metemos el pie. Atopamos muncha cuarcita.
De sópitu, ábresenos un claru y podemos almirar les vistes sobro’l Navia.
Al poco, tamién apaez la Cova protexía con una rexa. Ye una cueva d'apenes 15m, que pue vese entera perfeutamente dende fora, y que, en 1983, Pedro Pablo Pérez Rodríguez, vecín de Bual, atopó que tenía unes pintures coloraes. Ye la única cueva con pintures de too l'occidente asturianu.
Les pintures fueron estudiaes y afayaron figures antropomorfes masculines y femenines, otres esquelétiques y dalguna zoomórfiques.
En teoría hai 5 pintures nes cueves con estes pintures, anque les más clares tan a la entrada, tanto na parte de la derecha como de la esquierda. Anque ye un bon exerciciu quedase mirando un bon cachu en busca de posibles figures.
La Cueva llámase del "Demo", esto ye, del Demoniu, que ye la cristianización del ser mitolóxicu’l Busgosu, esto ye, el señor del monte ; y tien acomuñada xuna lleenda, recoyida nel llibru Un Paséu pola Mitoloxía Asturiana. Llugares con Lleenda, d'Alberto Álvarez Peña, que diz:
En las tradiciones de la zona se dice que el Demo es conocedor de grandes secretos. Un día, el primer ferreiro (herrero) se presentó ante la cueva y le dijo que ya conocían la sierra. El Demo contestó: Eso é que a fueya'l castañeiro. A lo que el ferreiro contestó: Nun la vimos pero xá la veremos. De vuelta al pueblo observó la fueya (hoja) dentada del castaño y así es como pudo inventar la sierra. Con las mismas le sustrajo al Demo el secreto para forjar el hierro: Eso é qu'asperxaraste con augua barrenta.
Un llugar máxicu, que tien una canciella como protección, por cuenta del so valor.
Volvemos pelos nuesos pasos. Yá tou baxada.
Na ponte, fiximos una parada a faer unes semeyes.
Pa comer, fuimos a Bual capital, a La Parrilla El Zángano.
Un hotel-restorán con unes cristaleres enormes con unes vistes bien guapes sobre Bual.
El Zángano ye una parrilla, y tienen ganadería propia. Los sos platos estrella son les sos parrilles y les sos chuletes. Cuando fuimos nun teníen nengún platu de cuyar.
Pidimos d'entrada unes Croquetes. Normales.
Una Ensalada.
Y de segundu la so Parrilla Especial, que cuesta un pocu más cara que la so parrilla normal. Vien con Criollu, Costielles, Pitu, Sollombu de Xatu de Casa. Bien bona. El sollombu ta bien bonu, bien tienru, el chorizu ta espectacular y les costielles nun se quedaron tras. Vienen ufiertanos más por si quedamos con fame.
De postres, Requesón con Miel de la Bualesa. Bien ricu.
Con Miel de la zona.
Y Tarta 3 Chocolates Casera. Bien rica.
Con cafés y clines, pagamos 64.50€. Perbién de preciu. Sorprendiónos la calidá la carne. Queda pendiente visita pa prebar los chuletones.
Acabante comer, averamos a La Boalesa, fábrica de miel de la zona, a la que debemos visita en dómina de recueya, que ye cuando ta la fábrica en plena actividá.
Antigües ferreríes, molinos, ríos con toponimia aurífera, montes de castañales máxiques, cueves úniques d'arte neolítico, lleendes acomuñaes al monte y a la cueva ; y una parrilla de ganadería propia que te va a encantar.
No hay comentarios
Publicar un comentario