Farturruta al Beyu Pen comiendo en Casa Pedro

Señes: San Xuan de Parres

Teléfonu: 985 849 020

Web: http://casapedroparres.com/
Facebook: https://www.facebook.com/CasaPedroParresRestaurante/
Twitter [@casapedroparres]:  https://twitter.com/casapedroparres
Instagram [@casapedroparres]: https://www.instagram.com/casapedroparres/

Calidá: 4/5

Preciu: 40€

Comentarios: Güei vamos de ruta por un Beyu, que ye un sitiu estrechu ente peñes o montes; una foz, un escobiu (d'ehí la redundancia de dicir "Desfiladeru de los Beyos"). N'Amieva.

Una ruta fácil, pa tola familia, d'apenes 7kms, con unos 250m de desnivel. A la ida son 3,5kms, col últimu tramu de xubida, y a la vuelta tou baxada. En total, vais tardar, parando, unes 2h y media en faer percorríu total.

Salimos de l’área recreativa de Santiyán (Amieva), que ta pasando’l pueblu. Hai un aparcamientu grande pa dexar el coche, y al poco yá atopamos l’área recreativa dende la qu'empieza la ruta.

Un área enorme, onde si queréis podéis comer a la vuelta y a la qu'aportáis cruciando’l Ríu Seya.

Mui guapa. 

L’área ta llena de Cuerries, onde se metíen les castañes con oricios, les tapaben con felechos y árgomes y teníen na Cuerria d'Ochobre a Xineru-Febreru pa evitar que nun s'abicararen o se punxeren talludes. Sacábense y s’esbillaben (escoyíen). Dexábense ensugar, y les bones poníenles na Cunia (una rexa que poníen sobro’l llar pa que fueren curando les castañes), o se diben gastando como alimentu; y el restu les utilizaben d'alimentu pal gochu.

Dende’l mesmu área empieza una sienda que lleva hasta l'entamu de la ruta, pasando pol pueblu de Santiyán. La otra opción si queréis aforrar estos 500m ye qu'aparquéis el coche direutamente nel pueblu de Santiyán, anque me paez más guapa l'alternativa que vos doi.

Namás empezar, atopamos esti árbol con estes formes tan rares.

Nel intre atopamos la esviadura pa empecipiar la ruta. En 2010 iguáronla y paez que xugaron coles formes naturales en piedres y tueros pa representar a dellos seres mitolóxicos. Paez que los años y el nulu caltenimientu fixeron que sía práuticamente imposible velos anguaño. Dalguna figura quiximos albidrar, pero costó. Una pena.

Hasta agora fuimos paralelos al Seya, pero esviamos escontra unu de los sos numberosos afluentes, el Beyu. Atopamos un molín antiguu abandonao.

Cruciamos la ponte .

Empieza un paséu preciosu, paralelu al regueru, metíu ente la roca, con paisaxes espectaculares.

Onde se van formando pequeños saltos d'agua.

Mientres un tramos perdemos el ríu de vista. Un mini recuestu de xubida.

Pero nel intre lu volvemos a atopar. Tol camín ta llenu de castañales.

Y cruciamos col saltu d'agua más guapu de tola ruta.

Cruciamos la ponte. Y alloñámonos definitivamente del ríu.

Y empieza la xubida en zig zag hasta’l pueblu de Pen.

Ye una xubida llevadera, d'unos 250m de desnivel, col gran atractivu de les vistes al pueblu de Villaverde, y xusto detrás, onde veis nubes, tendríen de tar los Picos d'Europa nevaos. Como los Picos son tan caprichosos, nun s'asomaron en nengún momentu y nun pudimos velos. Pero si’l día ta esteno, esta mesma semeya camuda n'espectacular.

Tres la xubida, vuelve a llaniar. Yá tamos cerca.

Pen ye un pueblu preciosu llenu d'horros y paneres. Casones. Antigües y nueves. Y mires onde mires, unes vistas increíbles.

Paga la pena perdese pel pueblu.

Dicen que tienen la panera más grande d’Asturies, con 12 pegoyos, pero en realidá son 2 paneres xuníes. Merez la pena vela.

Volvemos baxar pelos nuesos pasos de vuelta hasta’l coche.

A la vuelta, indispensable la parada en Panadería Santillán: empanaes de primera, repostería, panes y quesos de los beyos.

Pa comer, fuimos a San Xuan de Parres, a solu 12kms del entamu la ruta, a Casa Pedro. Ún de los nuesos favoritos, porque tien la perfeuta harmonía ente los platos tradicionales y el toque más modernu, inclusive con dalgún puntu de fusión cola cocina asiática. Christian cocina como pocos y amás ta nuna redolada maraviyosa.

Casona en madera y piedra. Bien guapa y cuidada. Con zona de barra, y un comedor.

Tien amás al llau, un horru nel que puedes comer embaxo, en madera. Ye la mio parte favorita.

Empezamos con un entrante de Llombu baxu curao y la copa. De Txogitxu. Suavísimo. Bien ricu.

Pidimos, fora de carta, unos Moxones a la Brasa con Aceite d'Oliva. L'aceite tien un toque picante. Son unos moxones grandes, formosos, bonísimos.

Yema de Güevu Trufada. Bonísimo. Base de crema de pataca, con un toque de pan y xamón. Trufa presidiendo y la yema apurriendo potencia. Un platu pa entemecer y esfrutar. Encantónos.

Croqueta de Gamonéu. Perfeuta. De los meyores.

Alcachofa a la Brasa sobro Espluma de Pataca y Zusmiu Ibérico. Otra maravía. Amiestu de testures, un fondu d'hores y la potencia de los sabores na boca.

Y acabamos cola Fabada. De los meyores que probemos.

Pota al centru la mesa. Compangu bonísimo.

De postres. Tarta de la Güela. Mui bona.

Y una de les estrelles de la casa, Tarta de Gamonéu. Con un 10% de Gamonéu. Espectacular. De los meyores que probemos nunca.

Pa beber, pidimos una sidra como aperitivo, y gustónos tanto, que siguimos con ella mientres la comida. Pomar Rosée, del Llagar Viuda de Angelón. Sidra rosada, refrescante, que llogra'l color de forma natural cola magaya la mazana, con una burbuya fina, toque duce y que foi perbién colos platos potentes.

Pagamos 81,90€. 40€ per cabeza. Casa Pedro nun falla. Homenaxe de los guapos.

Una Farturruta llena de mitoloxía, paisaxes de suañu, ríos qu'abren montes, xubíes con vistes (o non) a los Picos d'Europa, pueblos con pasao medieval preciosu, paneres dobles y una de les meyores cases de comíes que podéis atopar n’Asturies.