Les Praeres

Señes: Peñamayor - Nava

Teléfonu: 665 124 264

Calidá: 4/5
Preciu: 25€

Facebook: https://www.facebook.com/barlespraeres

Comentarios: Hebo un tiempu en que p'aportar a Les Praeres había que xubir al traviés d'una pista ganadera en mal estáu con un 4x4 o, a lo menos, con un coche al que nun-y tuvieres muncho apreciu. Pero merecía la pena xubir, la redolada, con unes vistes espectaculares, Peñamayor, y un chigre ellí metanes la nada con una venada, llamada Bambi, que salía a recibir a cada visitante.

Colos años, el local empezó a ser famosu, amás de por tolo anterior, polo bien que se comía. Y el remate final, foi qu'una etapa de la Vuelta Ciclista acabara ellí, col consiguiente arreglu de la pista hasta casi convertila nuna autopista (si vien la Vuelta Ciclista, ígüenla; si lo piden los vecinos … ).

Les Praeres ye ún de los sitios más singulares d’Asturies, y solo por dir tomar daqué merez la pena la visita. Pero si quies comer, reserva, que de fin de selmana suel tar hasta arriba. Zona de barra bien amplia y un salón-comedor con una chimenea y vista a Les Praeres, preciosa. Tien amás otru comedor más privao que foi onde comimos nós. 

Empezamos con una Fabada de les bones. Sorprendióme pa perbién.

Compangu con un toque picantín, como presta. Y la faba desfái. Bien bona.

Pidimos una Ensalada p'acompañala.

De segundos, pidimos pa compartir. A cada cuál meyor. Picadiellu con Güevos. El picadiellu suave, amiestu de xata y gochu; y el güevu de casa, brutal. Felicidá absoluta.

Cabritu. Maraviyosu. Intensidá y sabor. Pero parte solu.

Media de Carne Guisao. Pidimos una entera, pero Aladino yá nos dixo que relaxáramos un pocu. Y atinó. Bien bona y tienra.

Dambos platos vienen acompañáivos d'unes Pataques Frites.

De postre, Cabrales con dulce. Maraviyosu.

Y Tarta de Quesu Casero. Bien rica.

Pa beber, Sidra Viuda de Angelón. El "pero" ye que nun la echen. Pero tampoco ye una sidrería.

Salimos a 25€ per cabeza. Comimos de luxu nuna redolada maraviyosa. Bien recomendable.

Bambi nun vino a posar pa la cámara, pero déxovos una semeya d'otru añu.