Señes: Tuíza Riba - Ḷḷena
Teléfonu: 609 969 916
Preciu: 25€
Facebook: https://www.facebook.com/refugiomeicin
Instagram: [@refugiodelmeicin] https://www.instagram.com/refugiodelmeicin/
Comentarios: Ún de los llugares más espectaculares d’Asturies. Con 2417m, Pinubina ye una d'esos montes máxicos que siquier unu tien que xubir na vida, anque nós, con esta Farturruta solo vámosvos a llevar a la so base. Nós vamos xubir hasta los 1560m, onde ta asitiáu El Meicín, el famosu abellugu de monte que Tania Plaza lleva más de 11 años xestionando.
Un paseín preciosu de menos de 5kms (día y vuelta ), dende Tuíza Riba, hasta l'abellugu, asitiáu xusto na falda de Pinubina. Son unos 45min aproximao de xubida pa vencer los 300m de desnivel qu'esisten.
Esisten dos caminos de xubida, el de branu y el d'iviernu. Los nomes yá son esplicativos, pero si xubís pel camín de branu pel hibiernu, cola nieve, corréis el riesgu de que caigan argayos na dómina de nieve Nós fiximos la ruta circular, xubimos pel camín de branu y baxamos pol d'iviernu.
Ye una ruta preciosa pa faer en cualesquier dómina del añu. L'únicu "requisitu" ye que'l día tea estenao por qu'esfrutéis de les increíbles vistes. Y si vais facela na dómina de nieve, la ruta ye espectacular. Con nieve, como siempres, hai qu'estremar los procuros.
En Tuíza Riba esiste un aparcamientu ampliu onde dexar el coche. Si ñeva, lo meyor ye que teáis sollertes a les indicaciones pa saber cómo ta la carretera pa llegar, anque siempres suel tar llimpia (y si nun lu ta, podéis dexar el coche xustu antes de la xubida a Tuíza Riba).
Tuíza Riba ye un pueblín bien guapu, pol que paga la pena perdese. En cuanto toméis el camín pol que vaigáis, branu o iviernu, vais empezar nel intre a ganar altor.
Nós esperamos al día perfeutu pa faer la ruta con nieve. Cayáu, botes y polaines indispensables. Nun faen falta crampones.
La xubida ye espectacular. El camín de branu un pocu más con vagar, y el d'iviernu más curtiu y empinao, pero si nun te lo digo, apenes vas notar la diferencia.
En tou momentu, Pinubina guiándonos. Ye d'una guapura indescribible.
Y si damos la vuelta, les vistes tampoco queden tras. D'esquierda a derecha, Tesa, la Mesa (la so forma indica’l nome) presidiendo d'una forma espectacular y, apenes se ve, l'Almagrera.
Anque la vista completa tampoco ta nada mal.
Nel últimu tramu de xubida, xunenlos caminos d'iviernu y branu. Tou esto en primavera-branu tien un color espectacular y ta llenu de ganao.
Nel intre yá empezamos a ver l'abellugu. Fora tien unes cuantes meses pa tomar daqué.
Nós tomamos unes botellines de sidra Arbesú.
Dientro, una zona de comedor, cocina y habitaciones pa quedar a dormir.
Tania y Gumo van faer que teas como en casa. Son un encantu, unos currantes y unos amigos de la naturaleza y el monte. Y amás, tienen una mano increíble pa la cocina. Pensái que pa qu'esfrutéis d'una botella de sidra ellí, primero han de xubila ellos con caballos pel camín que fixistis.
El so platu de Patates, Güevos y Chorizu ye bien famosu, y por encargu ufierten tamién Fabada, de la que nun paramos d'oyer maravíes. Y nun s'equivocaron nada (gracies Pita ya Irene).
Damos fe que la Fabada ye de les bones. Caldín gordu, compangu bien bonu y faba de calidá.
De postre, Casadielles. Bien bones.
Coles consumiciones de fora, pagamos 25€ per cabeza. Sí, ye un pocu más caru qu'un sitiu "normal", pero recordái esi sitiu, eses vistes y les condiciones por que tollo llegue ellí. Asegúrovos que ye baratísimo.
Dempués de los cafés, salimos a almirar les vistes. Pinubina la Grande, Cuetu Les Cabres, Práu Capón, Puerta del Arcu, Castillines, Siete, El Pasu Malu, Portillín y Los Fontanes. D'esquierda a derecha.
Empezamos la baxada , con estes vistes.
Cuando llegamos a la zona onde axunten los dos caminos, tomamos el de la derecha, el d'iviernu. Tien l’envizcu que pasa por dalguna braña.
Y per zona de ríu, que baxaba preciosu.
De vuelta a Tuíza Riba, despidímonos d'un día perfeutu con estes vistes. Espero que vos preste la Farturruta.
No hay comentarios
Publicar un comentario