Casa Maruja

Señes: La Marea - Piloña
Teléfonu: 985 710 765

Calidá: 4/5
Preciu: 25€

Facebook: https://www.facebook.com/Casa-Maruja/

Comentarios: Maraviyosu chigre-tienda, cuidadísimu, a metá de la carretera ente L'Infiestu y El Campu (de Casu). Nuna redolada preciosa, paralelu al ríu La Marea y una terraza onde escuches el ruxerrux del ríu mientres tomes daqué.

Dientro, chigre-tienda, preciosu, con una decoración bien cuidada . Barra y unes meses pa tomar daqué. Y tres una puerta, un comedor pequeñu, pero guapu.

Pa comer, Pote. Bien bonu. Con toque picantín y berces y compangu de casa. Ensin fabes. De los bonos.

Pota al centru y a esfrutar.

Siguimos con unes Cebolles Rellenes. De bonitu. Bien bones, el mueyu de tomate ta espectacular. Con unos tortinos y pataques frites. Lo de los tortinos sorprendiónos, pero col mueyu quedó xenial.

Y acabamos con Xabalín. Ración enorme, con otru mueyu d'hores y hores bonísima. Intensidá de sabor brutal, pero la carne desfáise. Bien bonu.

De postres. Cuidao, que yá ye a cada cuál meyor. Xeláu de Turrón Caseru. Menudu espectáculu.

Y Tarta d’Ablana. Maraviyosa. Piloña ye la tierra de les ablanes y nótase. Ta bañada n'alcohol.

Pa beber, Agua Fuensanta y un par de copes de vinu.

Pagamos 52€ en total. 26€ per cabeza. Perbién de preciu. Sitiu bien recomendable.