Palermo

Direición: Calle Bonifacio Amago, 13 - Tapia

Teléfonu: 985 628 370

Recomendaciones: Tataki d'Atún Coloráu

http://www.restaurantepalermo.com/
https://www.facebook.com/pages/Restaurante-Palermo/108147249203614?fref=ts

Calidá: 4/5
Preciu: 42€

Comentarios:  Pergrande descubrimientu nel occidente asturianu. Llocal míticu que teníamos ganes de visitar porque siempres que lleemos daqué d'ellos, falen maravíes.

A la hora d'acutar entrugáronnos si preferíamos cenar nel llocal o na terraza, como nos dixeron que nun suelen tener problema de sitiu, dixímos-yos que yá veríamos. Sorprendiónos la terraza (qu'inauguraron esti branu) que tienen na parte de tras. Un patiu enorme, con una terraza cubierta, bien guapa. Asina que quedamos ellí. Darréu, al traenos la carta y ver que namás son tapes, preguntámos-yos si dientro la carta yera distinta, dixéronnos que sí y fuimos dientro.

Ye un pocu confusu, yá que tendríen de tener la mesma carta dientro que fuera y decidir ónde como ún namás por mor del llugar o la climatoloxía, non de la comida.

Dientro, la decoración ye clásica, con toques marineros, y mui cuidada. Meses amplies, espaciaes ente sigo mesmes, con un mini-salón priváu afayadizu. L'atención ye sollerte, atenta al ver les nueses duldes d'ónde comer, en tou momentu pendientes pa que tuviéramos a gustu.

Una vegada sentáos y mientres decidimos, tráyennos como aperitivu una Sopa de Melón, con un paliyu con una bola de melón y xamón presidiendo'l vasu. Ricu y refrescante.

La carta camuda del mediu día a la cena. Pel día hai platos, pela nueche tapeu, pero yo diba con gana pexe asina que me lo ufiertaron "como esceición". Yá vos digo que'l tracamundiu de la organización compensa cola maravía la comida.

D'entrante pidimos Oricios Gratinaos. Menudu espectáculu. Bonísimos, presentaos con ocle no fonderu. Bona ración d'oricios, abiertos pola metá y rellenos hasta enriba. Gran platu.

Como platos principales pidimos Pataques Rellenes al Fornu. Bonísimes. Son 4 bocaos esquisitos, con pataques a la metá col rellenu per dientro y penriba. Otra maravía de platu.

Yo pedí la Ventrisca de Bonitu al Fornu. Espectacular. Maraviyosa. De 10. Gran ración que desfaese sola, acompañada d'unes pataques panaderes con ayu, tomate y berenxenes a la plancha. Perfeuta. Nun hai namás qu'añadir.

De postres pidimos, Tocinillu con Xeláu de Canela. La esperta dixo que taba nidiu, "pocu dulce pa ser tocinillu". Más algamadizu, pero ricu. Eso sí, sóbren-y les forgaxes de chocolate penriba.

Yo pidí unes Freses de la Finca El Cabillón con Xeláu de Maracuyá. Les freses de la güerta ecolóxica del Cabillón esceicionales, qué sabor ... Y el contraste col xeláu bien ricu. Platu acedu, de restallón.

Pa beber, pidimos Sidra Brut Nature Emilio Martínez. Perrica, amás notéla meyor qu'otres vegaes, ye una sidra que güel y sabe. Y Agua Fuensanta.

Bona carta de vinos, con referencies asturianes tantu nos vinos como na sidra.

Con cafés, pagamos 84,50€.

Esceicional sitiu nel occidente asturianu con una comida y una preparación escelente. Si vas per Tapia, non te lo puedes perder.