¿Maxináis un proyectu I+D+I con base n'Asturies ya ún de los nuesos alimentos carauteríscos como protagonista? Pos la unión de Productos Cárnicos El Cuco, ASINCAR, l'Institutu de Desendolcu Económicu del Principáu d'Asturies (IDEPA) y l'Universidá d'Uviéu, ficieronlo posible.
Más de dos años de trabayu, a comuña, pa consiguir un chorizu fechu 100% n'Asturies, pero con un 30% menos de matería grasa, fonte d'Omega 3 y que sustitúi la parte grasa del animal (tocín) por aceites vexetales como l'aceite d'oliva.
Un retu científicu enorme por cuenta que l'oxetivu final yera que'l productu pudiera consumise de forma algamadiza en tolos llares, y polo tanto, el so preciu final tenía de ser atractivu. Y porque, había caltenese la testura y consistencia del chorizu, amás de, por supuestu, el so sabor.
El chorizu light, aptu para celiacos ya intolerantes a la llactosa, sale so la marca Bienastur, de la que yá vos falamos nel so día equí. Pa presentalo, cuntamos cola presencia de Juán Díaz García (Director Xerente d'ASINCAR), Eva Pando (Direutora Xeneral de IDEPA), Manuel Rendueles (Doutor Inxenieru Químicu y Catedráticu d'Inxeniería Química na Universidá d'Uviéu), Natalia Fidalgo (Téunica responsable del Proyectu d'ASINCAR) y Jesús A. Fernández (Catedráticu de Fisioloxía y Endocrinoloxía Esperimental pela Universidá Complutense de Madrid).
La presentación, ensin entrar en demasiaos tecnicismu, trató d'esplicar cómo y pa qué ellaboró esti nuevu chorizu. El porqué ta claro, la creciente demanda d'alimentos saludables crea nueves necesidaes nel mercáu, y l'adaptación de los nuesos alimentos tradicionales a persones que por salú yá nun pueden (o deben) comelos, siempres ye daqué positivu. El cómo, son más de dos años d'investigación y pruebes que terminaron en prebes a ciegues con probadores "espertos" que nun notaron diferencia nel sabor. Y aprofiáronnos que'l chorizu s'ellabora de forma práuticamente igual al restu, y afumáu en lleña de carbayu.
Pa probalo cuntamos con Joaqui, de Casa Chema, que nos ellaboró dellos platos col chorizu como ingrediente principal.
A falta de probalo más en fondura, ye un chorizu más compactu y con menos grasa, nótase más cuando lo comes solo (como n'un bollu preñáu, con un sabor más seco) pero apenes se nota con una bona fabada.
Apostar pola innovación colos nuesos productos, y utilizando la materia gris asturiana, como dicía'l catedráticu Manuel Rendueles, qu'hai muncha y bien bona. Tamos arguyosos d'esti tipu de trabayos.
No hay comentarios
Publicar un comentario