Regueiro

Señes: Tox - Puerto Vega / Veiga - Navia

Teléfonu: 985 648 594

Web: http://www.restauranteregueiro.es/
Facebook: https://www.facebook.com/regueiro.restaurante/
Twitter [@restregueiro]: https://twitter.com/restregueiro
Instagram [@diegorestregueiro]: https://www.instagram.com/diegorestregueiro/

Anterior Visita: https://www.lesfartures.com/2015/12/dorigo-astur.html

Calidá: 5/5
Preciu: 95€

Comentarios: Hai casos inesplicables, y dempués ta lo del Restorán Regueiro cola Estrella Michelín. O Asturies polo xeneral. Un sitiu maraviyosu, onde se come maraviosamente bien, que crez, evoluciona, que nun va a lo fácil, y que cada vez que vas tien la capacidá de sosprendete, yá sía dende la so visión más asturiana o dende la so visión asiática dende l'occidente asturianu.

Ye curiosu que p'atopar el meyor sitio onde comer cocina oriental n'Asturies (tres el zarru de Fuente la Lloba) tengamos de dir al occidente asturianu. Y amás a Tox, mui cerca de la maravía de Veiga (Puertu de Vega), nuna casona indiana preciosa, arrodiada de maizales y con una terraza de la que nun quedrás mover.

La casona tamién ye hotel, yá'l restorán atopase nel primer pisu. Meses espaciaes ensin manteles, chimenea enorme que preside'l salón, grandes cristaleres, contrastes de blancos y maderes, AC/DC de fondu (gracies Diego), ambiente relaxáu y muncho rock'n'roll nos sos platos.

Hai una falsa creencia que los que defendemos el productu asturianu, namás podemos comer productu asturianu, inclusive namás platos típicos asturianos ellaboraos con productu asturianu. Y Diego ponlo fácil. Dispon de 3 Menúes Degustación, ún tradicional asturianu, coles sos famoses croquetes y arroz con pitu caleya como platos estrella (40€); otru onde quedes nes sos manos y ye él quien t'igua'l menú (47€); el so menú Hedonista, onde esplota tola so creatividá y llévate dende Tox al alloñáu oriente (75€); y una pequena carta con dalgún de los sos platos. Tu decides.

Nós decidimos a probar el so menú Hedonista. Y yá empezamos con toa una declaración d'intenciones ... nun t'anuncien los platos. Quieren que la mesa xuegue a aldovinar los ingredientes y, de camín, evitar el prexuiciu de probar coses nueves. A la fin del menú apúrrente una carta cola relación de tolos platos y ye ende onde se ve quien atinó na mesa. Gran aciertu.

Empezamos con un Fervinchu de Citronela. Toque acedu increíble, bien refrescante y que, amás, lleva un pocu d'alcohol. Ye casi un clin, anque beberíamos botelles enteres.

Les sos famoses Croquetes, poles que paga la pena averase namás al local. Perfeutes. Y a partir d'equí, empezó'l show. Nivel peraltu de tolos platos, que nun decayó en nengún momentu. Presentaciones xeniales, el cítricu yá'l picante ye casi un denominador común en tolos platos. Intensidá, contrastes, testures, presentaciones llenes de colores ...

Crema Xelada de Sopa Tom Yum. Paté de fégadu y Salmonetes, escames frites, caviar de ríu fríu, yuzu y xalapeñu. Presentación preciosa con una chuchara de nácare (qué maravía), pa un platu fríu con una base cítrica, una espluma picante que da una combinación xenial. A éstes platu fríu que se sirve con una base de xelu pa que'l platu non caliente mientres lo comes.

Tou al detalle.

Pulpu de Vega. Emulsión de la so tinta y café, yogurt, chocolate blancu y vainilla. Encamienten entemecelo tou antes de comelo. Pulpu local con un toque cítricu buenísimo. Un puntu d'artimora, y algues. Xenial. Amás, vien presentada nun platu en forma de piedra caliente.

Otra presentación xenial. Lamb Masala. Costiella de rack de Nueva Zelanda al Masala y Parmesano, Papadum d'Arroz, Chutney de Menta y Mousse de Sesos.

La idea ye moyar la costiella (suavísima) nel mueyu, qu'apurre cocu y curry.

Y amestala con una tosta de pan asiático que tien un importante toque d'hortalana. Combinación maraviyosa.

Curry Colloráu de Callos de Bacaláu. Raya a la brasa, Pimienta de Xamaica y Raigañu de Lotu. La raya nidia, col cartílagu, los callos allegres, yá'l mueyu del propiu pexe, picante.

Otra esplosión na boca, qu'amás apurre-y un sabor vexetal col raigañu de Lotu, amás del contraste de testures xelatinoses de los callos yá'l cruxente del raigañu. Impresionante.

Fora de carta, traxéronnos un Wagyu en 5 Mueyos. Platu col que Diego anda faciendo pruebes y quería que probáramos. Calidá A5 (la más top, la que más grasa tien). Una llámina fina pasada pola brasa con pasta de soya y yuzu. Lleva un caldu de salmonetes emulsionáu con güevu. La idea ye moyar el wagyu nel mueyu y comelo, y lo que sobro, acabalo cola cuyar. Espectacular.

Tortiella d'Angules de Mar y Monte. Angules Enokis estofaes con aliñu Thai. Angules sí, de les de verdá. L'aliñu da-y un toque importante a xenxibre y soya, qu'apurre'l toque oriental a les angules col güevu. Perricu.

Monizuela d'Angus Americanu Adobada. Yogurt, ayu negru, cocu, pincelada de chiplote y comín y xeláu de curry panag de mangu. Monizuela impresionante, con un xeláu de curry panag de mangu. Contraste brutal.

Encamiéntennos comer un cachu de la monizuela y dempués un pocu de xeláu, pero nun entemecelo. Buenísimo.

Los postres baxaron un pocu, sacantes que tamién nos prestaron. Pero yera imposible caltener el nivel que tuvieron los platos.

Cocu, Artimores, Galleta y Zusmiu de Maracuyá. Postre más "típicu" cítricu, con una mousse de galleta con tropezones que nos gustó enforma. Ricu y refrescante pa camudar el sabor de boca.

Acabamos con Café, Lleche Afumao y Ablanes. Yo como soi fan de les ablanes ... encantóme. Amás tien un toque a la lleche d'enantes que me gustó enforma.

Otra combinación de sabores y testures.

Pa beber, Ayala Rose Majeur Brut. Champagne ácidu y secu. Toque afrutáu y portóse xenial en tola comida. Tienen amplia representación de vinos y sidra esplumoso asturiana.

Pagamos 190€. A 75€ cada menú degustación.

El café y la copa nesa terraza con un día soleyeru ... nun tien preciu. Ún de los grandes restoranes d'Asturies, nuna redolada maraviyosa, mui cerca de la desconocida mariña occidental, y a 1km de Veiga (Puertu de Vega) ún de los pueblos más guapos d'Asturies (perfectu pa un paséu acabantes de comer). Talentu puro na cocina, dende la so visión más tradicional d'Asturies hasta la so cocina oriental más vanguardista. Una esperiencia gastronómica maraviyosa.