Calidá: 3/5
Preciu: 22€
Comentarios: Villafranca del Bierzu ye un pueblu bien guapu. Empedráu, llenu de cais estreches y piatonales onde perdese, con Ilesies y monumentos históricos. Tierra de vinos, y amás, tierra de camín de pelegrinos camín de Santiagu.
Un pueblu con muncha vida del que pudimos esfrutar unos díes. Encamentáronnos delles opciones gastronómiques ente les que taba El Casino. Y averamos a cenar un día.
Asitiáu na Plaza Mayor (que nun ye lo más guapo del pueblu), con una amplia terraza, entramos a cenar un festivu ensin reserva. El local taba llenu, tanto na zona de barra como nel comedor posterior. Pero había mesa.
Pa llegar al comedor , has de pasar por un pasiellu onde se ve la cocina al traviés d'una cristalera. Guapa decoración informal, qu'oldea na zona de barra con esos horribles depósitos d'una marca de cerveza.
Propón cocina tradicional de la zona, con un toque modernu. Y gustónos a esgaya.
Traxéronnos Cecina de la zona d'aperitivu. Nidia y rica.
Empezamos con unes Croquetes de Xamón y Quesu d'Oveya. Sosprienden porque saben a quesu d'oveya, y nunca les probemos asina. Quiciabes se nota enforma'l toque a pimienta blanca, pero tán riques. Bona ración, amás.
De platos, pidimos un Bacaláu Tostáu con Pistu de Verdures y Mueyu d'Aceituna Negra. Perfectu. Xenial de puntu, de testura, de pistu y de presentación. Tou perfectu. El puntu d'aceituna negra quéda-y perbién.
Cochifrito con Pataques y Pimientos. Nun llega al nivel del bacaláu, pero bien ricu. Vien acompañáu amás d'unes pataques frites. Enorme ración amás.
Presentación orixinal pa unos cruxentes de gochucu.
Pa beber, Pago de Valdoneje 2016. Godello de la zona qu'entró perbién. Afrutáu con un puntu acedu. Malo de beber pa un día de calor como ési.
Pagamos 55€. Bona opción si tas pela zona.
No hay comentarios
Publicar un comentario