Farturruta Melendreros - Campa Gües - Pozu Funeres - Pico Texu

Señes: Campagües 

Teléfonu: 669 231 480

Calidá: 4/5
Preciu: 23€

Comentarios:  Tenemos el paraísu al lláu de casa y munches vegaes nin lo conocemos. Sitios exóticos, ensin esplotar, onde'l tiempu paez parar y aliéndase paz y tranquilidá. Onde das cuenta de lo duro que ye vivir nel campu, y onde afayes que l'Asturies de los nuesos antepasaos ta más cerquín de lo que pensamos (y qu'ensin dulda, ye la que puede llevanos a l'Asturies del futuru). Ensin falta de metese hores en coche pa llegar a sitios remotos.

Güei vamos al centru d'Asturies y triamos los conceyos de Bimenes, Llaviana y Nava.

El Chigre de la Campa Gües, o Casa Marisa, ye una d'eses maravíes de les qu'ún nun sabe si falar o non, porque tol mundu tendría dir y conocelo, pero al empar nun quies que s'enllene de xente. Sía comoquier, merécenlo tou, asina qu'allá vamos.

La primer aclaración ye que, si ye fin de selmana y ta bon tiempu, llama y reserva. El sitiu nun ye mui grande y pue que quedes ensin comer. Yo fui un sábadu, fora de temporada, lloviendo y enllenóse igual. La segunda ye qu'hai una pista de formigón que te lleva hasta ellí en coche. Ta en bastante bon estáu, y nun fai falta un 4x4 pa llegar. Pero cuidao si llueve, y, sobremanera, si nieva. Nós proponemos faélo caminando, ye bien fácil, pa tola familia y merez enforma la pena.

Fuimos en coche hasta Melendreros, un preciosu pueblu de Bimenes, onde aparcamos. A la fin del pueblu hai sitiu (poco) pa dexar el coche ensin fadiar. Dende ende empezamos a xubir per una pista, camín de Fayacaba, y con vistes espectaculares a tol valle. Al poco de xubir, un texu mozu n'honor a Mable'l de Melendreros, paisanu del pueblu que se dedicó a llantar y curiar los nuesos árboles sagraos.

A metá de pista, hai un xiru a la izquierda, bien indicao, que yá xube hasta Campagües.

Dende Melendreros hasta Campagües hai unos 400m de desnivel. La xubida ye llevadera pero constante, con dalgún recuestu que cuesta daqué más pero con unes vistas que conviden a parase y dan ánimos pa siguir xubiendo. La xubida dura 1h a ritmu sele, parando a faer semeyes y contemplando el paisaxe. Nun llega a 4kms.

Una vegada llegamos a Campagües, paramos a tomar una botella de Sidra Foncueva n'el mesmu restorán. La xubida ta llena de fontes. Pero tomar un culete ellí, con eses vistes, ye impagable.

Dende ellí tenéis delles opciones si queréis siguir caminando. La más conocida, ye'l Pozu Funeres. El Pozu Funeres ye un símbolu de la llucha contra la dictadura franquista, onde despeñaron 9 maquis comunistes fuxíos al monte, en 1948. El pozu impresiona, de lo fondo que ye, y ta presidíu por un texu. La zona ta abarganada por seguridá.

Dende Campagües hasta'l pozu, tárdase otra media hora, y xúbense unos 200m per un senderu preciosu llenu de vaques y caballos.

Con unes vistes precioses.

Podéis volver o ... podéis xubir un pocu más. Nós xubimos hasta'l Picu Texu. Y merez la pena. 1h más de xubida. El picu ta a 1268m, poro, otros 100m más de desnivel. La xubida encarretase dende la derecha y crestea hasta llegar al picu.

Una gociada porque xubes al traviés de la caliar, pero tamién s'atopa daqué de monte onde se empieza a notar la seronda.

El picu vese fácil pola bandera d'Asturies que lu preside.

Pero una vegada enriba, tien una pequena escultura en forma de guitarra n'homenaxe a José González, El Presi, el famosu cantante de tonada asturiana.

Dende ellí enriba, panorámica preciosa onde se ve la Campagües yá'l restorán onde vamos comer. Namás queda baxar con cuidu pel monte y llegar, per unes precioses praderíes, hasta'l restorán.

Una vegada ellí sentaos, y respuestos con una botella de sidra, comimos. Terraza con unes vistes espectaculares.  Una entrada a cubiertu con meses pa sotechase del vientu. Y dientro, zona de barra con delles meses pa comer, y una chimenea presidiendo (que, a éstes hubo que poner). Y na zona de tras, un comedor con meses. Decoración preciosa en piedra y madera.

Comimos Pote Asturianu pa empezar. Bonísimo, de los meyores que recuerdo. Faba bona, verdura con sabor, caldu pa morrer y un compangu caseru picante maraviyosu. Voló. Espectacular.

Y de segundos pidimos, Pitu Caleya. Con pataques frites de verdá, pimientos y un mueyu espectacular. Pitu bien ricu, nidiu, non tan escuru como otros, pero intensu de sabor.

Yá'l ganador foi'l Venao. Acompañáu tamién de pataques frites y pimientos. Con un mueyu increíble. Sabor intenso de la carne, pero que desfai na boca. Espectacular.

La carta ye cantada, y depende la temporada y lo que tengan pa ofercer, unes coses o otres. Pero potes y daqué de caza, siempres son indispensables.

De postre, Natielles. Bien riques.

Y Flan Caseru. Bien ricu tamién.

Col café de pota, la inyección de vida necesaria pa volver.

Pa beber, Agua y Sidra Foncueva. Nel comedor nun echen sidra, pero tunearon rápido un corchu de la sidra pa poner tomala ellí.

Pagamos 46€. Pero comer ellí ye impagable.

La vuelta ye toa baxada, en 45min nel coche. Nun paró de llover, eso sí, la sorrisa nun mos la quitó naide en nengún momentu.