Abareque

Señes: Manuel Caso de la Riva, 34 - Ribeseya

Teléfonu: 984 280 286

Web: http://www.abareque.com/
Facebook: https://www.facebook.com/abarequeribeseya/
Twitter [@_abareque]: https://twitter.com/_abareque

Calidá: 3/5
Preciu: 20€

Comentarios:  Si nos lleéis, sabéis que nos presta enforma La Talamera de Lluis Nel Estrada. Un restorán distintu, colos quesos, el productu frescu de la mar y la cocina ensin gluten como bandera, que tantes reconocencies ta recoyendo pol so llabor.

Ta un pocu escondíu nuna pequena plaza detrás xusto de la zona de sidreríes del puertu, anque pel branu y les fines de selmana, suel tar llenu. 

Va unos años, Lluis Nel Estrada, amplió la so ufierta con una sidrería, al estilu de les qu'abonden na zona'l puertu, pero con un plus de calidá, siguiendo la so mesma filosofía de cocina ensin gluten y apostando peles conserves. Tapéu más informal, cola sidra como epicentru del local.

Y consíguelo. Llocal preciosu, abiertu al puertu, con una terraza fora con trasiegu continuu de turistes y continuos brazos n'alto pa echar sidra. Sidra a éstes bien cuidada, tocantes a calidá, temperatura y echáu. 

Abareque na llingua asturiana significa:  Rede [de maya fino emplegada pa pescar sardines, anchoes ensin cebu]

Comimos dos persones, una Ensalada de Ventrisca de Bonitu con Tomate. Tomates bonísimos, con fueyes de llechuga y ventresca de llata.

Bien bona.

Y fora de carta, y rematando la temporada, unos Tacos de Bonitu al Ayu. Que taben realmente bonos. Cebolla caramelizada sobro los tacos, y pataques frites na base.

Acabamos con una Pomarada, que ye un vasu de requesón, compota y crema pastelera. Bien ricu.

Y con una Tarta Casera de Quesu. Gustonos muncho tamién.

Pa beber, Sidra DOP de Viuda de Angelón, Prau Monga. Bonísima, como siempres.

Pagamos 43€ por tou. Hasta agora les nueses visites a Abareque siempres yeren como antoxana pa tomar unos culetes antes de sentanos a comer na Talamera, pero yá ye un llocal con entidá propia del que vas esfrutar tapeando de forma más informal. 

Pd: Les semeyes xenériques del llocal son tomaes del so Facebook.