Nueva Visita: Casa Marcial

Direición: La Salgar, S/N. Les Arriondes

Teléfonu: 985 840 991

Web: http://www.casamarcial.com/

Facebook: https://www.facebook.com/Nacho-Manzano
Twitter: [@nachomanzano] https://twitter.com/nachomanzano
Instagram: [@chefnachomanzano] https://www.instagram.com/chefnachomanzano/

Visita Anterior: http://www.lesfartures.com/2015/06/nueva-visita-casa-marcial.html

Calidá: 5/5

Preciu: 200€

Comentarios: Atopar la excelencia nun ye fácil, y tresmitila tampoco. Falar de lo que supon un Menú Degustación con 20 platos, que van dende les téuniques más complexes a platos senciellos pero que te tresporten a los guisos de la to güela, onde caún tien un orde y un porqué y amás atopes un filo conductor que te va meciendo hasta dexate col meyor sabor de boca, ye prácticamente imposible.

Per eso siempres encamiento que vaigáis vós mesmos y vos afayéis. De xuru va haber sitios más guapos (difícil), más espectaculares o con meyor publicidá, pero llegar a una aldega asturiana, ayena al mundu, pasiar del parking a la entrada del restorán tornando unes pites, o esperar a qu'una vaca acabe de beber nel bebederu pa poder salir col coche, mientres comes nun 2 Estrelles Michelín, ye impagable. Y qu'amás, esos platos vaigan d'acordies al paisaxe onde ta allugáu y atopes Asturies en caún d'ellos xuntu colos meyores alimentos del mundu, ye un privilexu.

Siempres digo lo mesmo, pero este ye'l meyor menú degustación que comí en Casa Marcial. Y eso namás quier dicir que ye una cocina que se mueve, qu'evoluciona y qu'ameyora. Ye'l menú que más me llegó y col que más esfruté. Y a ello tenemos de xunir esa conexón que nos fixo Juan Luis García -recién ganador del I Premiu Juli Soler al Meyor Sumiller de la VII Copa Xerez España-, d'Asturies con Xerez, amestando perfeutamente'l campu y la mar de Xerez cola mar y monte asturianes. Una pareya perfeuta que llevó la comida a otru nivel. Mui recomendable qu'optéis pol menú harmonizáu, ye un privilexu cuntar con esti murcianu nes nueses tierres.

Tou entamó con una botella de Château Ygay 1952 que tenía una de les mentes nueves cocineres más brilloses de Asturies, Borja Alcázar del Abrelatas. Y asina acabamos Borja, ún de los meyores periodistes gastronómicos que tenemos, Miguel Llano y yo, en Casa Marcial. A la fin, la botella sirvió de vinagre caru, pero l'alcordanza que llevamos de la comida va perdurar siempres.

Empezamos con un culete de Sidra Foncueva Seleición y un pocu de Quesu Gamonéu. L'ambiente pidíalo a berros.

L'añu pasao fixeron una fonda reforma al local, y habilitaron los pisos de riba para ampliar meses. Comimos na nueva parte de riba, nun preciosu comedor, con una enorme mesa de madera y cola abonda intimidá para esfrutar y comentar cada platu y cada vinu. Anque la mio zona favorita sigue siendo la de baxo.

Pidimos el Menú Horizontes. Completu, puede escoyese la metá de los platos a la metá de preciu. Y amás, harmonizáu para dexar a Juan Luis en plena llibertá por que nos sosprendiera.

El primer vinu foi un Virguería 2015 (Sevilla). Vinu salguín perfeutu pa entamar, una especie de palu cortáu a la metá, distintu a lo que tamos acostumáos. Inclusive tien un toque a lleldu ...

La presentación de los 3 aperitivos ye increíble.

El primera aperitivo foi una Fueya de Parra. Alga cruxente con rellenu casi llquidu qu'esplota na boca. Para tomar de dos bocaos. Testura xenial.

Cruxente d'Algues con Xel de Llimón. Miniatura qu'entemez alga con cítricos. Cruxente. Para tomar d'un bocao.

Llingua de Bacaláu, Kimchi, Cebolleta y Ayu Negru. Una base de bacaláu cruxente, tipo corteza, con 3 bocaos en cada estremu. Kimchi, Cebotella y Ayu Negru. Fascinante. Sobremanera la cebolleta.

Camudamos de vinu, a un Luis Pato Vinha Formal 2010 (Bairrada), que Juan Luis utilizó de base para casi tola comida. Encamentalo para enfrescar la boca, y ye que ye vinu blanco pero que paez rosáu, esplumosu, foi de los nuesos favoritos de la comida. Buenísimo.

Empezamos colos platos. Y a lo grande. El Cantábricu. Dos tipos distintos d'amasueles (formoses), percebes, escupiña, ostra, llámpares y una navaya con alga que ta espectacular.

Una pasada dir moviendo la estructura para dir afayando nueves coses pa probar.

Manzanilla Solear en Rama Saca Verano 2015 (Sanlucar de Barrameda). Potente y sabrosa na boca. Toque turráu para una manzanilla con una crianza media de 8 años.

Sashimi de Salmonete cola so Escama Frita. Orixinal y distintu. Encántanos el salmonete, pero ésti lleva la piel percima cruxente, inclusive paez que teas comiendo los escayos ... y eso descoloca y al empar, presta. El salmonete, como siempres que lo fai Nachu, de 10. Platu salín que foi xenial cola manzanilla.

Coliflor con Crema d'Almendra y Caviar. Otru espectáculu de sabores y testures. Xenial el toque al dente de la coliflor, nidia y qu'oldea perfectamente cola potencia del caviar y les almendres.

Endivia con Sueru de Lleche y Rúcula. Testura increíble de la endivia. Contraste d'acidez col sueru la lleche. Tien hasta un toque a bollu de Pascua, sabores d'infancia con alimentos foriatos. Buenísimo

Yema de Güevu, Maíz y Zusmiu de Salazón. Esti platu ye ... como volver a la niñez con un platu de la to güela. Increíble. Tortu con güevu de casa. Espectáculu puru col que quedamos ensin fala. Ye curioso cómo puede pasase de platos ellaboraos a otros, igual d'ellaboraos, pero tan de casa, tan de la tierra y que, al empar, caltenga esa esencia.

Fascinante. De 10.

Fino Gutiérrez Colosía (Puerto de Santa María). Un palomino finu con crianza en flor de polo menos trés años. Otru vinu potente, que marida xenial y que tien golores salinos.

Corazones: Repollu y Xata. Otru platu llenu de testures con un caldu de cocíu entemecíu con alga memorable. Si entemeces la testura del repollu, col sabor del rellenu de xata yá'l caldu de cocíu con ese toque foriatu... brutal.

Fora de menú, Nachu tráxonos dos sorpreses. La primera foi una Sardina con Anchoa Don Bocarte. Que Nachu ye un apasionáu de les sardines, yá lo sabemos toos; y que dalgún de los sos platos favoritos tienen la sardina como ingrediente principal, tamién. Esti platu tien 12 años y llévanos a los entamos de Casa Marcial, un revival maraviyosu.

Ún de los favoritos de la comida foi'l Fino Tiento 2007 (Jerez de la Frontera). Bodega pionera na crianza biolóxica. 10 años de crianza para un vinu intenso pero elegante. Encantónos.

Siguimos coles sardines, Aguacate encevicháu, Piel de Sardina y Granes de Perexil. Namás con ver la presentación yá entra polos güeyos, contrastes y estremáu en 3 partes. Platu salín, con caldu y con amiestu de testures d'aguacate cola sardina. De los mios favoritos.

Otra de les sorpreses de Nachu foi'l mio platu favoritu de too'l menú, fascinante la Ventrisca de Bonitu con Piel de Sardina. Perfeutu. Indescribible la combinación con una ventrisca increíble.

Enoki, Calamar y Tinta de Tierra. Un platu qu'entemez mar y monte, onde conxuguen lo salguín y lo picante a la perfeición. Enoki ye una cogorda que va xenial cola tinta'l calamar, con testura trupa amás. Yá'l calamar, anque na semeya ta compactu, ye un conglomerao de "frebes" buenísimo. Gran platu.

Encrucijado MMXII. Sosprendentemente frescu. Un toque importante a almendra. Un vinu del que solo namás 685 botelles, y que va xenial col pexe.

Yá metíos de llenu col pexe, Ensalada de Merluza cola so Holandesa y Güeves Seques. Merluza perfeuta, amestu d'el vinagre del mueyu holandés con una testura fascinante de la merluza. Otru platazo.

Anguila con Trigu d'Escanda. Distintu y orixinal. Anguila afumada que va xenial cola escanda. Cruxente xuntu cola testura de l'anguila. Amás, complementa con toques cítricos, que va perbién col afumáu.

Meru con Bilbaina y Salmoria de Llimón. A la brasa, espectacular. Vien con dos tipos de mueyu (en gotes), una de bilbaina y otra de cítricos. Grandiosu platu.

Camudamos a un Palo Cortado Tradición VORS (Jerez de la Frontera). 30 años de vinu pero que caltien una frescura xenial. Elegante ya intensu. Tien un toque a almendra bien bonu. Gustónos enforma.

Pasamos a la carne. Llingua con Mole de Llenteyes y Garrapiñaos. La llingua ta per nidia, y va xenial col sabor a llenteyes. Tien un puntu picante, pero ye un platu equilibráu, que non planu, eh? Per bonu.

Amontillado Conde Aldama (Sanlucar de Barrameda). Amontilláu vieyu, con unos golores increíbles y sabores alcohólicos ya intensos, perfectos para la carne que díbamos a pobrar. Gochu asturcelta y amontilláu, ¿quién dixo mieu?

Gochu Asturcelta, Berza, Nabu y Ñoquis de Maíz. Xenial que Casa Marcial apueste pol gochu asturcelta. Corte de presa, que primeramente se maceró n'algues. Contraste xenial col puré de berza y el nabu. Platazu.

Camudamos a los postres, y yá empezábamos amorrentar ...

Pandorga PX 2014 Magnum (Jerez de la Frontera). Un Pedro Ximenez que nos gustó enforma. Nun empalaga en nengún momentu y al empar enllena la boca. Mui, mui ricu.

El primer postre, Remolacha, Xeláu de Cebolleta y Frutos Coloraos. Lleva un caldu de tomillu y llimón. Otru platu llenu de colores y contrastes. La remolacha n'espluma, los frutos coloraos para oldear y un xeláu de cebolleta mui orixinal.

El postreru vinu PX Urium VORS (Jerez de la Frontera). Tien categoría VORS, esto ye,"Vinum Optimum Rare Signatum" (Vinu Escoyíu como Óptimu y Esceicional). 30 años de crianza en barrica de carbayu pa un PX esceicional. Encantónos.

Acabamos con Chocolate, Menta y Pasión, postre presentáu na Copa Xerez 2017, polo que'l vinu forma parte del postre.  Aparentemente paez un postre "típicu" hasta que llegues al centru y afayes un granizáu de frutes de la pasión dientro'l chocolate. Fascinante.

Para los cafés, baxamos al pisu de baxo, y tomamos unu amiestu especial 80% Colombia, 20% Hawai escoyida por Juan Luis. Acompañáu d'unes pastes,bombones y un llicor d'ablana caseru con un toque de brandy. Per bonu tou.

Pagamos pol Menú Horizontes Llargu + Harmonixe, 200€. Asegúrovos que nun ye caru n'absolutu. Fueron más de 3h de menú, ensin casi esperes ente platu y platu. La cuenta pa comentalo y rellambese.

En cada platu, Asturies, contrastes, testures y cítricos. Una filu conductor que nos llevó mientres tol menú, y qu'amestó perfeutamente colo salguín qu'apurren los vinos de Xerez. Gran día, gran esperiencia qu'encamentamos vivir a tol mundu a lo menos una vegada na vida.

"Si mil fíos tuviera'l primer principiu humanu sería'l d'arrenunciar de toa bébora insípida y dedicase al Xerez"

William Shakespeare.