Nueva Visita: Castru Gaiteru

Señes: Eria La Vega, S/N - Celoriu - Llanes

Teléfonu: 985 402 025

Aconseyamos: TOO

Web: http://www.castrugaiteru.es/
Facebook: https://www.facebook.com/elcastrugaiteru
Twitter: [@castrugaiteru] https://twitter.com/castrugaiteru
Instagram: [@castrugaiteru] https://www.instagram.com/castrugaiteru/

Anterior Visita: https://lesfarturesast.blogspot.com/2015/09/castru-gaiteru.html

Calidá: 4/5

Preciu: 40€

Comentarios: Castru Gaiteru, o cómo dir a una de les meyores parrilles d'Asturies (y de too'l norte) y nun probar la so parrilla. Toos conocemos l'habilidá de Pedro Noriega (Pello) coles parrilles, un cocineru mozu que volvió al so Llanes del corazón pa poner a Celoriu en plenu centru del mapa.

A escasos metros de la Sablera Palombina, el Castru tien una situación privilexada pa treslladar Asturies a la mesa. Con parking propiu, y una amplia terraza pa tomar daqué antes y/o dempués de la comida (güeyu, namás atienden en chigre pa veceros que vaigan comer). Dientro, amplia barra y a esquierda y derecha, distintes zones de comedor, qu'inclusive se pueden dixebrar pensando en grupos grandes.

Decoración bien cuidada, con ambiente marinero y meses espaciaes, con amplios ventanales pa que la esperiencia sía más prestosa. Marisa, la xefa la sala, fai que lo sía. Y la cocina de Pello, nin digamos.

Dicía que nun probé nada de la so parrilla, yá lo fiximos na anterior visita. Cualesquier pexe o carne que pidas va namorate. Pero queríamos ponenos en manos de Pello y probar otru tipu de platos, más creativos.

Empezamos col so Moxón n'Escabeche con Cruxente d'Alga. Refrescantes y perfectos pa llimpiar la boca. Y l'amiestu de testures del moxón col cruxente, perbién.

Croquetes de Chorizu. Nada qu'añedir a una de les meyores croquetes que vas probar. Esta vegada na versión con chorizu. Llíquides per dientro, y con un toque a chorizu fascinante. Sublimes.

Oriciu a la Brasa con Cebolla. Pa tomar con cuyar. Fascinante sabor a mar, anidiáu cola cebolla. Cenciellu pero buenísimo.

Arbeyos con Yema de Güevu. Espectaculares mini arbeyos de productos llocal, cola testura perfeuta, un toque cruxente fascinante y atropaos nun montón. Dientro guarden una sorpresa, una yema de güevu p'amestar testures y sabores. Espectacular.

Mentívos, daqué de brasa hubo, pero poco. Alcachofes a la Brasa con Virigüetos y Mueyu Verde. Otru xuegu de contrastes y sabores. El cruxente l'alcachofa colos virigüetos yá un mueyu p'acabar coles esistencies de pan. Perbonu.

Y como platu de carne principal, Llebre a la Royal con Berenxena Asada. Otru platazu increíble. Ellaboración percomplicada, con muncho trabayo detrás, pa un platu casi de cuyar, pa esfrutar y afayar esi amor de Pello per Francia. Espectacular.

P'acabar, y yá amorrentando, Tarta de Mazana. Hoxaldre relleno de cachos y compota de mazana. Y acompañada d'un xeláu de pistachu. Toque duce y ácidu al empar, con amiestu de testures y hoxaldre. Bien bonu.

Pa beber, Caleya Goma 2. Esa pequena maravía asturiana, que va xenial coles comíes.

Pagué 40€. Atopé'l local muncho más atopadizu, y la so cocina nun para de crecer. Ensin dulda, ún de los referentes del oriente y d'Asturies entera.