Señes: Calle Independencia, 31 - Uviéu/Oviedo
Teléfonu: 984 180 707
Web: http://www.kocima.es/
Facebook: https://www.facebook.com/kocimaoviedo/
Intagram: [@kocima_seleccion] https://www.instagram.com/kocima_seleccion/
Anterior Visita: https://lesfarturesast.blogspot.com/2017/09/nueva-visita-kocima.html
Comentarios: Llevo tiempu escuchando que los Cafés Selección van ser la próxima revolución gastronómica. Empiecen a vendelos en tiendes gourmet y yá tenemos hasta llocales especializaos puramente nellos, como The Coffest n'Avilés, del que yá vos falamos. Sicasí, n'otros países como Copenhague yá va años que ta consolidáu y lo habitual ye los cafés sían d'esa calidá.
A la fin, les "revoluciones gastronómiques" nun dexen de ser una vuelta al productu d'orixe falagáu lo máximo posible. Quesos, cerveces ... y que, sacantes vengan por movimientos de fora, resúltennos un pocu ayenos por cuenta de que n'Asturies, polo xeneral, nunca dexamos de faelo (que-y digan a los quesos). Nesti casu, sí que ye una novedá por cuenta de qu'Asturies tien dalguna de les industries más potentes en turre de café, produciendo, polo xeneral, un café de baxa calidá.
Pa cuntanos más sobro esta tema, Kocima, una de les nueses tiendes gourmet favorites, axuntó a Gerardo de Vorágine Kaffee y Jorge Alonso de Bizcoletas (Campeón d'Asturies de Baristes). Esplicáronnos los procesos d'esbilla y compra del café, y cómo esti tipu de cafés son muncho más respetuosos col productor llocal y favorecen el desendolcu de sociedaes subdesendolcaes. Tamién qu'a partir d'un bon café, si la maquinaria y l'ellaborador nun tán al altor, ye bien fácil echalo a perder. D'ende la importancia del barista y d'allegar a llocales especializaos onde acoriquen el productu.
L'amiestu perfeutu col café, son los duces, y en Kocima cuntamos con Guillermo Cima, un auténticu espertu nel mundu del chocolate. Recordemos qu'en tolos platos del so menú degustación inclúi un puntu de chocolate, inclusive los callos, y qu'ún de los puntazos de la so cocina ye aldovinar onde ta'l toque de chocolate.
Empezamos probando un Café de Filtru. O café de pota. Un café muncho más llixero por cuenta que'l so grau de turre ye muncho más baxu qu'el que precisa un espresu. El café yera orixinariu de Sumatra, n'Indonesia. Entra solu y tien notes de chocolate negru.
Pa combinalo, el postre más llixeru, los Macarons de Mandarina y Chocolate. Buenísimos los dos, por sabor gustóme más el de mandarina, anque col café maridaba meyor el de chocolate. Empezábamos bien.
Amás, unes Galletes Florentines. Buenísimes.
Siguimos con un Café Americano. Gerardo comentónos qu'añedir un café americano nuna prueba de cafés seleición hai xente que lo considera poco menos qu'sacrilexu, pero que son perfeutos pa empecipianos nesti tipu de cafés. Ye un café aguáu, anque con más sabor que l'anterior. A diferencia de la ellaboración conocida, nesti casu, añeden primero l'agua que'l café, pa que pierda el menor arume posible. Probemos ún brasileñu.
Combinámoslo con unes Trufes de Chocolate que son un espectáculu.
Y un Brownie de Cremosu de Moka. Nidiu, ún de los favoritos de la mañana.
Llegamos al Espresu. La forma de tomar café onde meyor s'aprecien toles sos singularidaes. Lo ideal ye comprobar primero'l golor ensin remover la taza, esfrutando de la crema del café (cuanto más escura sía la crema, más turráu ta'l café), y en tomando la crema, remover un pocu p'apreciar tolos sos golores, como si d'una copa de vinu fuere. Tomamos un café espreso de Brasil, bien equilibráu y ensin abonda acidez.
Acompañámoslu, primero d'un Vasu de Mousse de Plátanu. Pa fundir la cuyar hasta'l fondu y esfrutar de toles capes na boca.
Amás, un Cilindru de Chocolate. Capa esterior de chocolate cruxente y dientro un cremosu de chocolate espectacular.
P'acabar, un Café con Lleche bien fechu. Con lleche entero, sabor intenso con dibuxos preciosos de Jorge.
Y el mio favoritu, la Semiesfera de Chocolate Blanco con Bañu d'Artimora. Cola primer cuyarada das cuenta de la suavidá, pero ye que cuando llegues al centru, y afayes la "sorpresa" del núcleu de praliné ... Ye espectacular.
Dalguna d'estes creaciones de Guillermo, podéis esfrutales nel so menú degustación, o podéis encarga-yles dafechu na tienda.
Xenial introducción al mundu los cafés selección, qu'adulces van ganando terrén énte un mercáu cada vez más esixente en sabores y procedencia.
No hay comentarios
Publicar un comentario