Castru Gaiteru

Direición: Eria La Vega, S/N - Celoriu - Llanes

Teléfonu: 985 402 025

Recomendaciones: TOO

http://www.castrugaiteru.es/
https://es-es.facebook.com/elcastrugaiteru

Calidá: 4/5

Preciu: 60€

Comentarios: Teníamos muncha gana de conocer el Castru Gaiteru porque falaronmos maravíes d'él, y la verdá ye que salimos encantaos.

De mano, tar allugáu nuna casona a 100m de la sablera de Celoriu, ayuda y enforma. Tien una terraza xigante, con meses pa comer, o tar tomando daqué tranquilamente, y tou con una valla por que los crios puedan xugar tranquilamente.

Dientro, zona de barra y meses pa comer, con detalles de decoración guapos (y n'aumentu, según comentáronnos). Na zona la barra, bien a la vista, 6 o 7 cerveces artesanes, la mayoría asturianes.

Xintamos 3 persones y sentímonos como na casa. Productu de primera, atención bien bona, de casa y ellaboración de les bones.

Pa comer, dexámonos empobinar completamente por Pedro Noriega, alma del Castru, y la verdá ye que quedamos en manes inmeyorables.

Empezamos con unes Croquetes Cremoses, riques, anque quiciabes foi lo que menos nos gustó de la comida.

El Milfueyes de Foie, Fresa y Piña, foi ún de los mios favoritos la comida. Menudu espectáculu!!! Milfueyes de 10 y col foie, la fresa y la piña una amestu increíble.

Siguimos con unos Virigüetos bonísimos, presentaos nuna caxa bien guapa. Llimón, que nun fixo falta, yá que maten el sabor del productu, y a esfrutar!

Empezamos colos platos. L'empiezu yera práuticamente insuperable.

Besugu a la Brasa, con guarnición de Pataques Asaes y Marcaes a la Plancha y Alioli. Un besugu pa tres paisanos, presentáu a la metá, perricu. Foi encamientu espresu de Pedro y atinó.

En condiciones normales, pararíamos de comer ehí, pero nun podíamos colar ensin probar la Chuleta a la Brasa. Tienen de proveedor de carne a Txogitxu,  asina qu'esperábamos lo meyor de lo meyor. Sicasí, Pedro díxonos que nun taba 100% contentu cola chuleta. Pero asegurámosvos que taba impresionante. Al traer el platu caliente, la chuleta aguanta más inda. Vien con una ensalada de guarnición.

Yá tábamos a españar, asina que pidimos pa los 3 un Milfueyes con Nata, buenísimo. Voló.

Pa beber, por supuestu, Sidra brut Nature Prau Monga, perfeuta como siempres. Amás, non tolos díes va comese col llagareru que fai esa maravía. Y cuando la acabamos, tomamos una Cerveza Artesano Caleya cola carne.

Na carta de vinos tienen referencies a cerveza, vinos y sidra asturianu.

Mención especial tamién a los distintos panes que nos ponen pa probar na comida, con una presentación estupenda.

Con cafés, pagamos 3 persones 171€.

Maraviyosu sitiu pa comer de luxu, con un productu de 10, una ellaboración bien bona y con un enorme percorríu per delantre, yá que lleven namás abiertos 1 añu.

¡Gracies fonderes pola comida!