Nueva Visita: Los Llaureles

Señes: Camino de Miyangues, 2 - Torazu - Cabranes

Teléfonu: 629 769 059

Web: http://www.losllaureles.com/
Facebook: https://es-la.facebook.com/LosLlaureles
Twitter [@losllaureles]: https://twitter.com/losllaureles
Instagram [@losllaureles]: https://www.instagram.com/losllaureles/

Calidá: 5/5
Preciu: 41€

Anterior Visita: https://lesfarturesast.blogspot.com/2020/11/nueva-visita-los-llaureles.html

Comentarios:  Llegamos in extremis a probar el menú de branu de Los Llaureles. L'últimu día antes de colar a unes merecíes vacaciones dempués d'un branu con más xente inda (si cabe) qu'un branu normal. Estos tiempos raros, si daqué "bonu" traxeron, foi que nos fixeron buscar sitios estremaos onde s'aliende tranquilidá. Y Los Llaureles ye'l sitiu perfectu.

Salón espectacular como siempres. Terraza pa perdese mirando'l preciosu valle. Y un par de meses habilitaes ente los sos llaureles, más íntimes, que fueron la novedá d'esti branu. Tou un aciertu.

Sacantes del trasiegu del branu, del tener qu'atender almuerzos, comíes y cenes, los hermanos Gallego y Carlos, consiguen que teas como na to propia casa. Falamos d'un menú creativu, de muncha calidá detrás; y d'una sala afayadiza onde escaeces los tos problemes por unes hores. El restu, faénlo la maravía de la decoración y la redolada.

Empezamos con Tráesnos unes Almendres? Cerveza con espluma de llimón y cardamomo. Vien acompañada d'unes almendres y en mediu un bombón d'almendra turrada y café qu'asonsaña'l güesu d'una almendra. La espluma da un toque cítricu a la cerveza y el bombón ta bien bonu.

La Mar y Valencia. Horchata infusionada en galanga (familia del xenxibre), aguacate xeláu de mostaza verde, virigüetos, güeves, llagostinos, paté de moxón, wakame y granáu d'arbeyu.

La idea ye entemecer el platu marín, con fuerte sabor a virigüetos, cola horchata que-y da un toque bien duce, inclusive anisáu pola galanga. Gustónos enforma.

Pani Puri. D'esquierda a derecha: brandada de bacaláu, con yema curada en soya. Percima furagaña en mueyu bilbaín. Y a la derecha, Parmentier de callos, yema de güevu curada en soya y percima un toque de llagostín y trufa.

Bien bonos los dos, nel primeru predomina'l toque a bacaláu. Pero gana'l segundu en sabor. Xeniales.

Boloñesa. Una boloñesa tradicional onde sustitúin la carne por alga codium, la que sabe a percebes. La pasta sustitúyenla por sepia confitada n'aceite d'ayu y perexil. Lleva una fallasquina de parmesano y alfabaca frito. Platu elegante. Testures y sabor. Encantónos.

Perú by The Balance. Un 3 en 1 que nos lleva a Perú de la mano de Michel de The Balance (Xixón). La idea ye dir tomando'l pisco sour mientres tomamos el boniato yá'l ceviche pa dir apurriendo acidez a los platos.

 

Empezamos con un Pisco Sour de Salvia y Piña. De xacíu con un toque d'alcohol. Bien ricu y refrescante.

Siguimos con Mantequilla de Boniato. Dos bocaos dulces pa oldear col pisco sour.

Y acabamos con Ceviche d'atún marináu en lleche de cocu, xenxibre y garam masala. Lleva amás coriandru, sandría, máiz, mangu y cebolla colorada encurtida.

Llenteyes con Vinagre. Base de mousse de llenteyes, con vinagre blancu testurizáu, llámina de foie de coríu, tacos de quesu manchego d'oveya, ablana, sardina afumada y anguila. Maraviyosu. El contraste de sabores y testures ye brutal.

El Km0 de Miyangues.  Guisu de llombarda en caldu con güesos turraos, carrillera de xata de la zona, espluma de lleche de vaca y pensamientos (flor). La idea ye amestalo tou y esfrutar. Otru xuegu de contrastes bien bonu.

I Love Pork. Base de piña lleldada en vainilla y cardamomu. Tacu de panceta marinada con azucre, sal y pimienta. Dan-y un golpe de plancha a la piel xusto antes de sirvila. Xenial l'amiestu de picante cola piña y la panceta cruxente. Paez una gominola de gochu. Encantónos.

Pasamos del saláu al dulce con Zensai. Ye un aperitivo xaponés que lleva nigiri de vieira, soya, foie y güevu filáu. Vien acompañáu d'un clin de shake spritz pa llimpiar la boca antes d'empezar cola parte duce del menú. Bien bonu.

Sticky Rice con Leche. Crema d'arroz con lleche de cocu y especies. Lleva galanga, citronela, llima, garrapiñáu d'anacardos, tacos de mangu frescu y xeláu de mangu y xeláu de mangu y curry. L'amiestu del mangu col garrapiñáu queda xenial. Gustónos enforma.

Y acabamos con Cabo Busto & Llaureles: la Pera! Una collaboración con Jony de Cabo Busto. El postre consiste en delles ellaboraciones de la pera. Namelaka de pera, cruxente, pero confitada con shake. Crumble de pera deshidratada. Crema pastelera de pera asada y toffe de pera. Bien bonu.

Pa beber sigue faltándonos bebida asturiana. Pidimos Genio y Figura. Un albariño qu'entra bien.

Nun pagamos, convidáronnos, pero'l menú cuesta 41€. Sitiu, atención y cocina. Los Llaureles nun falla. Con ganes de probar la so apuesta pa la Seronda/Iviernu a la vuelta de vacaciones.