Sixto's

Dirección: Calle Muelle de Oriente, 3 - Xixón

Teléfono: 984 290 602

Calidad: 4/5
Precio: 50€

Web: https://www.sixtosrestaurante.es/es/

Facebook: https://www.facebook.com/Sixtos-Restaurante/
Instagram: [@sixtosgijon] https://www.instagram.com/sixtosgijon/

Comentarios: Un restorán mexicanu asturianizáu o un restorán asturianu mexicanizado. Andrés Po xuega coles sos dos realidaes, la d'un mexicanu fíu d'asturianos emigráos, que tornó a la tierra d'oríxe de los sos pas, p'afaer los platos a la que más-y convenga. Y fáilo perbien.

Asitiáu na redolada maraviyosa del puertu deportivu de Xixón, con un trasiegu continuu de xente y vistes al puertu mientres tas cenando, o bañáos cola lluz del atapecer; los contrastes colos colores azules y blancos, entemecíos cola lluz qu'entra de fora, converten el Sixto's nun azul bien verdoso, bien asturianu, pero col verde tamién mexicanu.

El restorán tien dos plantes. Decoración minimalista con toques de madera, tou abiertu y nidiu. Na planta de baxo, barra, y un  par de meses para comer. Y na parte de riba, les meses del comedor.

Cenamos 3 persones. Y pidimos el so menú degustación, a 35€.

Empezamos col so Pan y Mantega Artesanes. El pan, bonísimo. La mantega, d'aceituna negra y llimón. Bien riques los dos, pero ganó la de llimón.

Para beber, 1947. La sidra de mesa crianza de Viuda de Angelón. Sidra que nun fai falta echar, penerada y estabilizada. Pero güel y sabe a sidra. Pasa 4 meses en barriques de madera para da-y complexidá, y un toque a madera bien interesante, lo que la convierte, amás, na primer sidra crianza del mercáu. Maraviyosa.

Croquetes Cremoses de Chorizu. Ún de los espectáculos de la casa, y onde se nota'l pasu por Casa Marcial d'Andrés. Son perfeutes, y amás tienen ese toque xustu de chorizu para da-yos un sabor brutal. 2 per cabeza, pero podría comer 20 más.

Pulpu del Pedreru con Aguachile de Tomates. Ún de los favoritos de la nueche. Xuegu de contrastes, testures y colores. Lleva una corteza de gochu y cebolla cruda pa oldear cola testura chiclosa del pulpu. Bien ricu.

Tacu (Mexicanu) de Bonitu del Norte. El tacu orixinal ye con rabu de vacunu n'adobo, pero como tábamos en temporada de bonitu, sustitúyenlo, y agradecémo-yoslo. Taba bonísimo. Para envolubrar coles manes y esfrutar de la esplosión na boca. Mueyu de chile natural y encurtíos de crema d'anchoa. Tien un toque importante picante. Y cilantro. Prestónos.

Camudamos al vinu, Edra XtraSyrah 2014. Tintu aragonés n'honor a Remartinez, que nos gustó. Cayeron un par de botelles.

Arroz con Guisu de Calamares con Crema de Sidra Picante. Xenial ese toque picante col cebollu. Encantónos.

Y acabamos col Cremosu de Quesu y Llimón con Cruxente d'Ablana. Clásicu pero efectivu. Gustónos.

Salimos a 50€ per cabeza. En plenu puertu deportivu, cocina ástur-mexicana maraviyosa, a perbon preciu. Mui recomendable.