Twitter: [@CERVECERIACABAN] https://twitter.com/cerveceriacaban
Instagram: [@pablo_cabanon] https://instagram.com/pablo_cabanon
Anterior Visita: https://lesfarturesast.blogspot.com/2019/02/el-cabanon-preba-de-cerveces-refu-y.html
Comentarios: Mázcares, xeles, aforu amenorgáu y con estremu cuidu, pero volvieron les prebes de cerveza al Cabanón. Y volvieron con Refu, que dende la última vegada que nos visitaron hasta güei, dieron un saltu espectacular, tanto en calidá, como en presencia.
Va dos años, visitónos David y falónos de la so pequena fábrica de cerveza artesano en Val d'Arán, ello ye que cuando nos fixo la presentación la fábrica inda nun tenía los papeles oficiales pa producir. Agora yá tán produciendo, ampliando presencia (tantu que vas atopar les sos cerveces nun chiringu na sablera de Xagón) y probando nuevos sabores que nos vinieron a presentar n'un tour por Asturies qu'empezaron pol Cabanón.
Les cerveces acompañámosles de la comida de Brujería, restorán xustu en frente del Cabanón, y que sabéis que nos encanta. Jacobo ye un gran cerveceru y conoz a la perfección los meyores sabores que casen con esta bébora.
Tienen 7 "cerveces oficiales", pero nesta ocasión probemos rareces. Esperimentos que cuayaron tres el confinamientu, onde tuvieron meses pa parar y probar coses distintes.
Empezamos con Goiat. Nome d'un osu famosu en tol valle, y qu'ellaboraron en collaboración con Brasserie Caporal, de Toulouse. Una fruit ale con llactosa con fervinchu d'arándanos. Entra fácil, dulce, pero acaba con ciertu secañu na boca, notando amás la llactosa en tou momentu. Tien unos 4,8º.
Tomámosla con Hummus y Tomate con Frutos Secos. Dos mini vasos pa moyar y entemecer sabores. Bien bonu. El contraste coles endivies quéda-y xenial. El tomate, amás, vien con toque picante.
La segunda cerveza foi Super Tacky. Una hoppy pale ale, esto ye, una pale ale con más arume a lúpulu. Encantónos. 5º de puru amargor, con un toque hasta resinosu na boca, en nariz pinu. Bien fresca. Una cerveza de sesión p'amantes del amargor.
Tomámosla coles famoses "Al Corru les Pataques" Braves de la Brujería. Picantes. Bonísimes.
Yá'l so Steak Tartar con Entrecot de Vaca, pepinillo, cebolla y alcaparra. La mayonesa ye de güevu, ta bien bona. Gustónos enforma.
Camudamos a Smuggler (Contrabandista). Ellaborada en collaboración con Ctretze Pirineus. Una Sesion IPA Doble Dry Hopping. Fácil de beber, con arumes tropicales, sobremanera, a piña. Bien bona. Redonda.
Tomámosla col Perrín Veganu de la Brujería. Sabe a salchicha, ta fecha con proteína de soya. Qué necesidá había ...
Pa compensar, la maravía de la nueche, Mini Burguer de Marañuela, Llonganiza d'Avilés, Quesu La Peral y Mazana. Brutal. Encantónos.
Camudamos a La Crew. Una de les rareces de la nueche. Gustónos enforma. Una Pastry Barley Wine. Pastry ye una variedá de cerveza relativamente recién, que-y da esi toque "pasteleru". Ye una cerveza avieyada 3 meses en barrica d'olorosu. Escura. En ñariz, pastel. En boca, carambelu y toffee. Tien 10º. De lo meyor de la nueche.
Pa la siguiente cerveza, David propúnxonos faer un esperimentu, tapanos los güeyos colo que quixéramos y probar la cerveza ensin vela.
¿La causa? Yin Yang. Una White Stout. Sabéis que les cerveces stout son fuertes y negres. Pos ésta tien el mesmu golor, el mesmu sabor pero'l color d'una roxa. Un estilu de cerveces que nun tuvo muncho ésitu nel mercao, pero que Refu quixo probar. Son 6º de puru sabor a café, chocolate y toffee, anque gana'l café. Gustónos.
La última cerveza de la nueche foi Columbia. Una Imperial Sout de llibru de 8º. Café con un toque amargosu a la fin. Rica.
El postre (yá tábamos llenos) foi'l Vasu de Chocolate con Artimora y Hortelana. Bien ricu.
Echábamos de menos les prebes de cerveza del Cabanón. Organización de 10, David dándonos esplicaciones técniques pero de forma amena, y Jacobo sosprendiéndonos como siempres cola so cocina.
No hay comentarios
Publicar un comentario