Farturruta a Braña de Mumián comiendo en la Casona de Lolo

Señes: Caunéu - Somiedu

Teléfonu: 985 763 4

Calidá: 4/5

Preciu: 25€

Web: http://casonadelolo.com/

Facebook: https://www.facebook.com/lolo.casona

Comentarios: Vamos a Somiedu, ensin dulda ún de los llugares más espectaculares d'Asturies. Vamos faer una ruta fácil, pa tola familia, con vistes increíbles, con una cultura d'antañu qu'esperemos que nun se pierda, y parando nuna casona preciosa onde vais comer perbien.

Pa quien nun lo sepa, una Braña ye una aldega de monte onde pasen el branu los vaqueiros cuando xuben el ganáu a la gueta les camperes d'alau montaña. Nesta zona, amás, tán formaes por cabanes de teitu, que'l so nome provien del teyáu vexetal, normalmente d'escoba, que cubre la vivenda fecha de piedra y de planta cuadrada o rectangular. De normal estremaben la estancia ente'l llar pa los humanos, y la tenada pa los animales. Queden inda delles brañes por Somiedu, y güei vamos visitar una de les más famoses, la de Mumián.

La ruta son unos 6Km, con paraes pa faer semeyes y visitando tranquilamente la braña, tardamos unes 2h y media en dir y volver. Tampoco hai muncho desnivel, namás un pocu al entamu, asina que la ruta va facese perbién, y como, amás, ye curtia, podéis parar les vegaes que preciséis ensin que se vos eche'l tiempu enriba.

Dexamos el coche nel aparcamientu qu'hai na esviadura a Ḷḷamardal, na carretera al puertu de Somiedu.

Y yá veis que les vistes prometen.

El primer tramu ye una xubida por asfaltu hasta'l pequenu pueblu de Ḷḷamardal. Tien dalguna casa rural, y muncha ganadería.

En cuantes lleguéis enriba, paga dar la vuelta pa recuperar fuerces y almirar les vistes.

A la fin del pueblu, atopamos un caleyu con una marca qu'indica l'entamu la ruta.

A partir d'equí, tola ruta ye per caleya. Nun hai perda posible.

Entramos nuna zona de monte preciosa, enllena de fayes, abedurios, ablanares, castañales, y dalgún carbayu.

Y de sópitu, ábrese un enorme claru con un camín que traviesa'l monte. Un camín preciosu, pero con una bona cayida, polo que ye necesariu dir con cuidu. Nós amás tuvimos de compañera la borrina, qu'amás torgó siguir la ruta más allá de la Braña.

Les vistes, con o ensin nubes, con o ensin borrina, son espectaculares. Aquello tien un encantu especial. 

Ye un camín preciosu, con una xubida nidia. Xusto al llegar a la fin, atopamos un mirador natural, el Cantu Mostachal onde podéis ver el valle pol que pasa'l ríu Somiedu y Caunéu, que ye'l pueblu onde dempués diremos comer.

Al poco yá llegamos a una pradería onde vemos al fondu la braña colos teitos.

Namás queda una pequena baxada, y empezar a perdese ente los teitos.

Los teitos ta perbién calteníos. En caún podéis ver cómo s'usen los piornos (o escobes) pa faer el techu, y cómo caún tien una zona delimitada con piedra onde'l ganáu podría pastiar.

La vista ye espectacular. 

Xubiendo a la parte alta de la braña, atopamos la Fonte'l Cañu.

Nella vas poder atopar unos interesaos furacos, nomaos Oḷḷeras, onde se caltenía la lleche a baxa temperatura gracies al frescor de l'agua. Introducíense les llecheres nelles y asina nun se cortaba.

Podéis siguir xubiendo, la ruta sigue. A unos 3kms atopáis el Fayéu de la Enramada. Un fayedal espectacular, que ye zona reservada, polo que nun se puede abandonar el camín en nengún momentu. Inclusive podéis siguir hasta'l pueblu del Coutu y volver, que vos llevaría en total unes 4h el trayeutu completu.

Nós dimos la vuelta. Volvimos faer les últimes semeyes a la braña, y empecipiamos el descensu de vuelta al coche.

La Casona de Lolo queda nel camín de vuelta (sacantes volváis a Lleón), a namás 4,2kms del aparcamientu, nel pueblu de Caunéu.  Ye conveniente acutar porque suel tar llenu.

El pueblu ye bien guapu, el conxuntu de la Casona ye increíble. Correspuende al antiguu palaciu de Peláez, del SXV. Tien amás a la derecha una terraza con unes vistes increíbles, fonte y zona d'aparcamientu.

Dientro, zona de tabierna. Preciosa. Foi onde comimos nós

Y un comedor que nun se queda tras. Decoración bien cuidada.

Nun había menú de fin de selmana. Pidimos de carta y encantónos tou.

Empezamos con Pote Asturianu. A la manera occidental, ensin faba y caldosu. Sabor perbonu. L'únicu pero ye que nos dixeron que pidiéramos meyor media ración, y quedónos  un pocu curtiu. Amás vien nunes mini potes individuales, y nós somos más de pota al centru la mesa pa compartir. El compangu tamién bien ricu.

Dixéronnos que nun podíamos dir ensin probar los Tomates de la güerta de casa. Y vaya espectáculu. Sabor puro. Increíble. Si táis na dómina, nun dexéis de probalos. La módena sobra.

Pidimos unos Callos (les pataques tuvimos que pidiles aparte). Bien bonos, testura. Fálta-yos un pocu de picante, pero puedes añedilu dempués.

Los postres nun queden atrás. Requesón con Coulís d'Artimora. Esceicional. Contraste de dulce y ácidu xenial. Encantónos.

Y Mousse de Llimón con Castañes n'Almibre. Otra maravía. La testura de les castañes col mousse queda xenial.

Pa beber, Sidra Brut  Nature EM. Atención, collecha 2013. ¿Quién diz que la sidra hai que bebela del añu? Bien rica.

Pagamos por tou, 49,30€. Como véis, relación calidá-preciu buenísima.

Acabante comer, averamos a Urría, a tan solo 8km de Caunéu. Esviándonos a La Pola Somiedu, xubiendo pela carretera al Vaḷḷe (de Ḷḷagu).

Ellí atopes un horru bien interesáu, l'únicu que queda en Somiedu fechu con teitu, esto ye, col mesmu techu que la braña que visitamos en Mumián. Y amás, ye l'únicu horru d'Asturies fechu con madera de faya.

Data del SXVIII. 

Brañes, paisaxes de suañu, montes máxicos, un antiguu palaciu onde comer comida tradicional bonísima y un horru únicu nel mundu. Maraviyosa farturruta.