Nueva Visita: Arbidel

 

Señes: Calle Oscura 1, Ribeseya

Teléfonu: 985 861 440

Calidá: 5/5
Preciu: 60€

Web: https://arbidelrestaurante.com/

Facebook: https://www.facebook.com/Arbidel-La-Cocina-de-Jaime-Uz/
Twitter: [@Jaimeuzarbidel] https://twitter.com/Jaimeuzarbidel
Instagram: [@jaimeuzarbidel] https://www.instagram.com/jaimeuzarbidel/?hl=es

Comentarios: Hai una cai escura, escondida del xaréu, en plenu centru de Ribeseya, onde vas atopar la lluz. Un local pequenu, casi ocultu, nuna cai piatonal, con una terraza d'apenes 4 meses a la entrada y unes parés de piedra que van facete escaecer el restu del mundu. 

L'atención ta a otru nivel desque salen a afayate nel local. Ye una Estrella Michelín, y nótase, anque dempués nun lo notes tanto no que pagues. La antención de Victoria, sumiller, xefa de sala y la pareya de Jaime, yá'l so equipu ye perfeuta en tou momentu. 

Otres vegaes que fuimos, tomamos el so menú degustación (mui recomendable). Esta vegada, pa cenar y ente selmana, animámonos a probar la so carta. Precios algamadizos pa una Estrella Michelín, anque nun notes esi baxón na calidá.

Empezamos colos aperitivos cortesía de la casa. Y yá namás por ellos paga la pena la visita. Son 4 aperitivos, onde t'aconseyen un orde pa tomalos, con sabores tradicionales con un puntu vanguardista a la manera de Jaime Uz. Una gociada. Brandada de Bacaláu, un cruxente qu'entemez dulce col sabor intenso del bacaláu. Bien ricu.

Puré d'Ayunegru con Coliflor al Pil-Pil, Mangu, Anguila Afumada, Trufa y Almendres. Jaime ye fan del ayu negru y a mi encántame. La combinación, col toque afumáu, col mangu, quéda-y xenial.

Bollín preñáu de Sobrasada asturcelta y quesu Rei Silu. Una maravía. Gana'l quesu, pero como si tuviéramos dalgún problema nuna esplosión na boca de Rei Silu.

Cremosu de Morciella, Maíz y Foie. Bien ricu.

Tráennos, amás, un cortante que ye un Gazpachu de Mazana Verde con Sardina Afumada y Quesu Pría. Ricu y refrescante.

D'entrante, pidimos el Ceviche cantábricu de bugre y manines turraes. Ye un ceviche de gamba colorada y bugre, con un toque de lleche de cocu y xapaleñu. Coronáu con caviar iranín.

Acompañáu d'un cruxente de manes de gochu.

El ceviche ye espectacular. Ún de los platos icónicos de Jaime.

Jaime tráxonos a probar el so famosu Steak tartar de bonitu, foie, maíz y tomate xeláu. N'una mini tapa. Mueyu de pataca, kimchi picante, aceite, pepinu. Una versión actualizada del clásicu rollu de bonitu que ye una maravía. Xugosu.

El pan merez la so mención. Bien ricu.

De platu principal, pidimos una Ventrisca de Bonitu. Tábamos en temporada y teníenlu fora de carta, y nun podíamos dexalu pasar. Pa dos persones, emplatada para caún.

Senciella, pero ye que nun precisa más. Sabor puro. La pestaña, increíble.

Al entamu la cena, Victoria avisónos que si queríamos la Tarta de mazana caliente, crema de vainilla y xeláu de canela, habíamos d'avisar bien en tiempu porque lleva un tiempu faela. Pedíila porque ta bonísima. Lleva amás una base llixera d'hoxaldre.

Pidimos amás l'Esponxosu de Taramundi , miel y guirlache de nuez, nieve de remolacha, romeru xeláu. Xuegu de sabores y testura. Bien ricu.

Col café, Petit Fours. Trufes y moscovites. ¿Pue pidise más?

Pa beber, 1947 de Sidra Viuda de Angelón. Sidra de mesa, la primer qu'avieyen en barrica lo que fai d'ella la primer sidra de mesa crianza del mercáu. Güel y saber a sidra. Y ta espectacular.

Pagamos 120€. Un ticket más propiu d'una restorán "normal" que d'un Estrella Michelín. Productu, atención, cocina de primera, detalles ... Arbidel ye una maraviyosa opción pa que vaigas esfrutar, pero, amás, ye la meyor opción para perder esi mieu al "mundu Michelín" a un preciu bien algamadizu.