Bodega Siluvio

Señes: Cecos - Ibias
Teléfonu: 985 473 285

Web: https://siluvio.com/

Facebook: https://www.facebook.com/Siluvio/
Instagram: [@siluviobodegasyvinedos] https://www.instagram.com/siluviobodegasyvinedos/

Comentarios: Ladislao Mendez LEón, Lalo, tien una de les meyores distribuidores de vinos y destilaos d'Asturies. Son famosos pola calidá y exclusividá de los sos vinos, y podéis atopalo detrás de munchos de los vinos qu'esfrutáis nos vuesos restoranes favoritos.

En 2016 decidió empezar, xuntu cola so muyer Leticia, el proyeutu pa crear la so propia bodega. Y tres una busca intensa peles zones vinícoles d'Asturies, atopó en Cecos (Ibias) el so paraísu.

Más concretamente en Lagüeiro, a los pies del maraviyosu Palaciu de Ron, que domina Cecos dende lo alto, y que d'antiguo foi cotu señorial de dichu palaciu. Gracies a Lalo y la so muyer, los dueños del palaciu enseñáronmoslo atentamente, y pudimos comprobar la maravía d'esta construcción del SXVI. Con una impresionante torre central con teyáu de pizarra. Nel interior del patiu, un horru enorme y una capiya.

Lo que d'antiguo yera un viñéu espectacular, al estilu de los chateaux franceses, acabó convirtiéndose en praos. Y agora Lalo recupera los viñeos, famosos na so dómina, pa crear el mayor viñéu qu'esiste na actualidá n'Asturies. Tien amás, otros viñeos partíos por Ibias, lo que fai en total, casi unes 11 hectárees.

Llantó namás uva asturiana, un 80% albarín blancu, pero tamién verdejo negru y carrasquín, pa faer un vinu dientro la DOP Cangas.

Los suelos alredor del palaciu son de muncho cantu rodáu, por cuenta que d'antiguo pasaba un ríu pellí (agora enriáu y que pasa pel mediu'l viñéu), formáu na so mayoría por Síliz y daqué de cuarcita.

D'ende qu'a la d'escoyer un nome, decidiose por Siluvio: Síliz y Luvio pel Ríu Ibias que crucia por Cecos.

La so intención ye algamar los 60000 quilos d'uva, anque pel momento, inda precisen unos añinos más pa que la planta empiece a producir. Hasta entós, van mercando uva a productores de la zona pa dir ellaborando'l so propiu vinu.

Pa ello, construyeron en 2019 unes instalaciones bien modernes, con una cámara de fríu pa baxar la temperatura de la uva a 10 graos. Ibias ye'l sitiu onde más hores de sol tenemos n'Asturies, algamando los 40º en plena dómina de vendimia, polo que ye necesariu baxar la temperatura de la uva pa caltener el so arume. De nueche ye xustu al contrariu, baxando les temperatures, na mesma dómina de vendimia, a los 10º.

La bodega ta pensada a dos altores, pa producir vinu utilizando'l másimu la gravedá y que la so ellaboración sía lo más sostenible posible.

Tamién ta pensada pa faer visites, con una sala pa probar el so vinu con unes vistas espectaculares sobro'l viñéu yá'l Palaciu de Ron.

Depósitos pequenos pa faer vinos por parceles. Sala especial pa barriques. Esperemos que nun futuru próximu tengamos un gran Siluvio nes nueses manes, pel momento, amás de la espectación, namás podemos dicir que Lalo y Leticia tán faciendo les coses con muncho mimu, muncho ciñu y la paciencia qu'un gran vinu rique. Viven d'ello, saben lo que faen.