Nueva Visita: Los Arándanos

Señes: Os Armallos - Taramundi

Teléfonu: 985 552 014 - 665 836 223

Aconseyamos: Cualesquier cosa colos ... sos arándanos!

Facebook: https://www.facebook.com/restaurantelosarandanos/

Calidá: 4/5
Preciu: 50€

Anterior Visita: https://lesfarturesast.blogspot.com/2015/11/nueva-visita-los-arandanos.html

Comentarios: Ún d'esos sitios que nun son lo abondo conocíos, que nun cansamos d'encamentar y qu'enxamás falla cuando lo visites. Los Arándanos ye una de les xoyes del occidente asturianu, escondida y que, amás, namás podemos esfrutar unos pocos meses al añu. Tán abiertos hasta'l 8 de Setiembre.

Asitiáu a unos 8km de Taramundi, metanes la nada y enriba d'un monte, atópase'l restorán, con unes vistes envidiables. Llegues, aparques el coche y entres nun pequenu xardín qu'apuerta a la casa, llenu de flores y plantes exótiques, con una pequena ponte que crucia un mini llagu artificial llenu de pexes de colores ... una auténtica maravía.

Según entres na casa, recíbente y siéntante. El restorán ye preciosu, meses amplies de cara a amplies cristaleres onde namás puedes ver la naturaleza. Techos de madera en forma de semicírculu con un llar en mediu pa calecer pel hibiernu ...

Ufierten una cocina alternativa, basada de xacíu nos sos los arándanos, qu'ellos mesmos producen (y nada tienen que ver con esos que nos vienden nes grandes superficies) y en productos ecolóxicos. Asina tola carne que vienden provien de Bioastur y na carta principalmente vas atopar con vinos que lleven la etiqueta d'ecolóxicos. Tienen bona ufierta, amás, de vinu, sidra y cerveza asturiano. El pan, espectacular.

Recibiéronnos con una Tosta de Quesu Azul con un toque de miel d'aperitivu. Y tomámosla con media xarra d'Arandina. Una bebida refrescante qu'ellaboren col zusmiu los sos arándanos y un entemecíu de cítricos. Tienen la versión ensin alcohol, y con un poco d'alcohol, echándo-y sidra natural.

D'entrante pidimos una Tosta de Sardina Afumada con Cremosu d'Aguacate. Gana'l afumáu de la sardina pero queda bien col toque duce que-y da l'aguacate.

De platos, pidimos Llombu de bacaláu confitado sobre compota de reineta y praliné d'almendres. Bien bonu, el sabor a almendra quéda-y xenial. Tien tamién un toque duce. Gustónos enforma.

Y Sollombu de güe (vacunu mayor 5-6 años) con mueyu d'arándanos y pataques panadera. Una maravía. La carne desfaise, pura mantequilla.

De postre, pidimos el Pastel de cenahoria sobro natielles y tierra de galletes con carambelu de cenahoria. Contundente. Ricu.

Yá'l nuesu favoritu, Milfueyes de crema y nata sobro cremosu de llimón. Buenísimo.

Colos cafés, Trufa sobro Pétalu de rosa natural.

Pa beber, EM. Sidra Brut Nature de Llagar el Gobernador. 2015. Inda aguanta, anque meyor una edición más nueva.

Pagamos 100,36€. Encamienten na so páxina pagar n'efectivu porque ellí tienen problemes de cobertoria cola tarxeta. Nun fallen Los Arándanos.