Puerto Arnela

Direición: Plaza del Carmen, 20 - Camariñas

Teléfonu: 981 737 240

Web: http://www.hotelpuertoarnela.es/
Facebook: https://es-es.facebook.com/PuertoArnela/

Calidá: 2/5
Preciu: 35€

Comentarios: Camariñas ye un pueblu pesqueru preciosu asitiáu na Mariña da Morte gallega. Visitando'l so pimpanu faru, fuimos comer a Puertu Arnela, del qu'oyéramos falar perbién n'otres referencies blogueres y periodístiques.

Asitiáu frente al puertu pesqueru, nuna redolada preciosa, Puertu Arnela ye una maxestosa casa señorial de piedra qu'impresiona según la topes. Preciosa. Asitiada nuna plaza onde tomamos un albariño mientres esperábamos la nuesa vez pa comer (previa reserva).

La casa tamién ye hotel, y la planta de baxo dediquenla a restorán, con dos salones con una decoración en piedra y madera realmente preciosa. Dambos comedores taben llenos, ya'l personal nun daba a bastu. L'atención nun foi mala, pero sí meyorable.

Yá sentaos na mesa, ponemos a güeyar una carta enfocada escontra productu'l mar. Pexes y mariscos. Y yá empezamos abarruntar cuando vimos que vendíen un Marqués de Vizhoja del añu a 12€.

Pidimos un Arroz con Bugre pa dos persones. Traenlo nun wok en cuenta d'una paellera, que fixo que s'esfreciera nel intre (yera una bona ración). L'arroz nun sabe a nada, bonu sí, a lloréu. Lleva pimientu y cebolla. Cuando lo traen, l'arroz nun ta nel so puntu, empieza ameyorar a los 10min, pero claru, pa entoncies, yá ta fríu.

Trai bugre, sí, pero l'arroz ya'l bugre tán fechos independientemente. Tuvieron de cocelo aparte ya incluyilo a la fin al arroz, porque al arroz nun se-y pegó nada de sabor. De xacíu, el bugre ta dafechu sosu. ¡Ah! Y el nuesu bugre tenía de ser mancu, que namás tenía una pinza.

De postre, un Flan de Quesu y un Flan de Güevu (que nos vendieron como especialidá de la casa) que nun van pasar a la hestoria.

Bebimos con Agua de Mondariz y copa d'albariño (desconocíu, nun mos dió tiempu ver la botella).

Por tou, pagamos 70.20€.

Sitiu bien guapu, llenu, pero dionos la sensación que ta más enfocáu a garduñar al turista qu'a curiar al comensal. Na so carta pon "Nun te fíes de la borrina, nin de promesa de suegra". Nin de Puertu Arnela. Nós nun volvemos.