Kocima, templu gastronómicu de simiciu.

Testu de Ruben Galdón (https://omacatladas.com/)
Semeyes de David Castañón


Na gastronomía poques vegaes una imaxe val más qu'una degustación. Yá saben,
esto va de goler, apalpar y comer. Pero una de les semeyes que l'otru día colgó Kocima nel so perfil d'Instagram algamó tresmitinos la necesidá de llevanos a la boca lo que namás víamos.


Desconocemos de quién son eses manes zurdíes, pero queremos tarmiar tolos alimentos que pasen per elles. Porque sentimos que tán llexitimaes por esa vieya que pasaría millones d'hores delantre los fogones. Espierta'l nuesu llau gastronómicu más emocional, el de les alcordances que casi toos tenemos de guisos a poco fueu sobre cocines de carbón y de pasteles enfornaos col calor del llar.


Si tu tamién tas per salivando, Kocima ye'l to templu de pelegrinación. Na tienda que lleva unos pocos meses abierta n'Uviéu podemos atopar productos artesanos casi esclusivos. La madalena que sostien la muyer de la semeya ta ellaborada por un paisanu que muel farina d'escanda pa postres como'l de la semeya o pa unes casadielles d'escándalu (imposible atopales con mayor proporción de rellenu) que tamién sirve a Kocima


Ye un exemplu de lo que'l cocineru Guillermo Cima y el so sociu David Vilasboas quieren pal so negociu, esmoleciéronse por escoyer alimentos d'edición llindada, caseros, gourmet. Como les rosquíes de yema que cada selmana lleguen d'una pequena confitería de les de tola vida de Liérganes, en Cantabria.


O'l chocolate La Superlativa, de Toro, d'una de les poques fábriques artesanes de chocolate que sobreviven al emburrie la industria. O'l potru asturcón y gochu asturcelta en formatu conserva y ellaboraos por Astursabor, una pequena empresa que s'empeñó en poner los guisos d'especies autóctones al algame del nuesu microondes. 


Kocima ye un templu gastronómicu de simiciu. Ye un llugar nel que ye inevitable venerar y deseyar tolo que ta al algame la vista y l'olfatu. Embutíos, quesos, cerveces artesanes, sidra, vinos, conserves, aceites… tou con un factor d'esclusividá añadíu que Guillermo y David esploten con gran conocencia y aciertu. 


Consiguen convertir en devotos de los sos productos a tolos que cruciamos la puerta de Kocima, y ye difícil nun salir d'ellí con más alimentos de los que teníamos pensáu dir mercar. Ah, y les sos cestes personalizaes son una idea de regalu col que ye difícil fallar. Templu, yá vos digo.


Kocima. Cai Independencia, 31. Uviéu/Oviedo.



0 comentarios :

Publicar un comentario