Teléfonu: 984 28 59 13
Páxina Web: http://www.eseteveinte.com/
Facebook: https://www.facebook.com/Eseteveinte
Twitter: https://twitter.com/eseteveinte
Preciu: 30-35 €
Calidá: 4/5
Eseteveinte ye una neotaberna asitiada n'Uviéu, na cai Santa Teresa de Jesús, cerca del parque San Francisco, por ello perbién allugada, anque nesta cai puede pasar un pocu desapercibida, y más si da'l casu que la fachada tea n'obres con andamios delantre como nos pasó a nós, una pena porque si nun teníes pensáu dir direutamente ellí, pasa desapercibida.
Traten d'amestar les técniques de l'alta cocina con productos llocales y platos típicos de too'l mundu.
Oyéramos bones crítiques d'esti local y decimononos dir probalo. Al entrar pela puerta pescanciase una decoración cuidada, moderna y atopadiza.
Serviciu sollerte qu'ayuda en tou momentu y esplica correutamente tolos platos, encaméntennos empezar con un platu fora de carta, Tomates pasificaos con aceituna kalamata, sardina marinada y espuma rey silo. Gran combinación de sabores duces y salaos, bien equilibrada, los tomates esploten na boca y l'espuma de rei silo da-y un toque xenial al platu, amás la presentación de 10.
Pidimos dellos platos pa compartir, ente ellos unes Gyozas de pitu con cenahoria, curry y mangu. Entemeciendo los nuesos productos con platos d'otres cultures, xenial. Un detalle qu'anque la ración suel ser de 6 pieces ufierten modificar a 8 pieces pa compartir ente los 4 comensales.
Tamién probemos El nuesu souquet de pulpu y chipirón. El pulpu, el chipirón y les pataques taben nel so puntu y per ricos, pero lo del fondu yera espectacular pa nun dexar de moyar pan.
Siguimos con otru amiestu de productos de la zona. Arroz de fungos y gochu asturcelta con panceta fresca y sollombu. Quiciabes falta un pocu más de fuerza nel sabor del arroz (una gota de picante creo que-y vendría de maravía), pero cuando cueyes un cachu de gochu xuntu al arroz el sabor del gochu prevalez y ye espectacular.
D'últimes albóndigues d'asturcelta en curry coloráu, apio nabu y berenxena frita. El mueyu al curry coloráu cola espuma d'apiu-nabu percima yera espectacular, como guarnición la berenxena frita con un chorrín de miel, qu'encamenten moyar na espuma y l'amiestu ta perrico.
Pa beber decidimos por un Pésicu blancu que nun defrauda, gran vinu.
Como inda teníamos fame decidimos pidir un par de postres pa compartir. Chocolate, tocinillo y lleche merengao. Los amantes del dulce podéis fartucavos con esti postre, pa mi demasiáu dulce, nun soi tan llambión. Tarta fina de mazana con vainilla, gran postre, pero dempués del nivel de los otros platos sabe a pocu.
Col café traxéronnos p'acompañar unes teyes d'almendra.
Destacar que tamién tienen en carta xunto los vinos duces la sidra de Hielo Diamantes de hielo, yá sabéis que nos encantr y sofitamos que s'apueste por productos de la nuesa tierra.
En total pagamos unos 32 € per cabeza, RCP aceptable.
Quiciabes la única pega que podríamos poner ye'l tamañu de les raciones, si fueren un pocu más abondoses yá sería perfeutu.
No hay comentarios
Publicar un comentario