Los dos conceutos tienen el mesmu fin, protexer la sidra 100% asturiana, y con 100% asturiana refiérome a que solamente s'almite mazana de variedá 100% autóctona asturiana, en praos dientro del territoriu asturianu. Por tanto, anque sía una sidra un pocu más cara que la natural, tamos garantizando que se consume productu 100% asturianu.
Jose Manuel Riestra, llagareru propitario de Muñiz, tuvo esplicándonos el por qué de formar una Asociación ayena a la DOP pública, la forma que tienen d'entamase, los procesos de calidá que tien que pasar una sidra pa salir al públicu y que tienen ente toos una producción d'ente'l millón y el millón y mediu de botelles.
Faen la primer cata ensin trasiegu por cuenta que quieren recuperar la tradición asturiana de nun trasegar la primer sidra l'añu. Ye una sidra qu'evoluciona primero, pero tamién qu'aguanta menos en frescura, polo que tien qu'escoyese perbién el momentu de sacala al mercáu y consumila mientres el mes siguiente.
Antes de sacala al públicu la producción de Mazana Escoyida realícense una serie de prebes a ciegues por un Xuráu espertu sidreru y ayeri tuvimos ocasión d'allegar a una d'elles. Xuráu presidíu por Maximino Villarica, tuvimos la oportunidá de faer una cata xuntu con él p'aprender los principales aspeutos a valorar nuna sidra.
La parte visual, con un color "payizu". L'aguante, el pegue y l'espalme. La parte olfativa, onde se busca un arume llimpio y a mazana. Y, a lo último, la parte gustativa onde se busquen sabores frescos y un equilibriu ente l'ácidu y l'amargosu.
Sorprende que nos dixeren que polo xeneral la sidra presentada de los 4 llagares inda taba tienra y que precisaba más tiempu pa poder embotellala, y que darréu, el xuráu decidiera que 15 de los 26 toneles presentaos a la cata tenía una nota superior al 7 (nota mínima qu'envaloren pa poder vender sidra cola etiqueta mazana escoyida).
A lo último, pudimos falar con Sabino Pérez, echador profesional de sidra, sobre la necesidá de regularización de la figura del Echador de Sidra Asturiano. La necesidá de valoralos, tantu los hosteleros, como'l consumidor, como l'alministración. Enseñónos el procesu d'aprendimientu pa los nuevos escanciadores que se realicen en distintos llocales, ensin nengún tipu de regularización alministrativa y cómo otros territorios (como'l País Vascu) empiecen a copiar l'echáu asturianu p'ameyorar el so consumu.
Pero qué puede esperase d'una alministración asturiana (y la mayoría de los sos conceyos) qu'en cualquier actu ufierten "Vinu Español" en cuenta de Sidra Asturiano o d'unos políticos que llexislen antes un Tablao Flamencu n'Asturies que'l términu Sidrería.
Dexámosvos un video del programa Conexión Asturias dedicáu al actu. Con entrevista a Les Fartures incluyida.
No hay comentarios
Publicar un comentario