El Molín de Pablo

Direición: Carretera AS-17, 36, Bobes
Teléfonu: 984 09 95 41


Preciu: 20 €


Calidá: 3/5

Atopamos esta casa de comíes por encamientos y a partir de les sos semeyes de Facebook, y eso que pasamos tolos díes per delantre la so fachada, pero la verdá que la fachada nun tien nada que ver colo qu'atopes dientro.

Allugáu en Bobes, Sieru. Cerca del Llagar el Quesu, atópase esta casa qu'enantes acoyó numberosos restoranes ensin ésitu, y esi ye ún de los motivos pol que nun afitáramos nel local. Toi convencíu de que n'este caso si van atopar l'ésitu, pola so filosofía, el so tratu y sobremanera pola so comida.



"Casa de comíes", "Xente prestosa", "Come ensin priesa". Son dalgunos de los cartelos que pueden vese namás aparcar el coche y ye un gran resume de lo que vas atopar nesti local.


Xuntámonos 9 amigos pa comer un domingu y mientres unos decidieron pol menú, otros optaron por pidir dellos platos de carta, asina que pudimos probar una gran variedá. Vamos empezar falando de los platos del menú que son los que yo probé, disponen de menú diariu y un menú fin de selmana "Como en casa", nesta ocasión el menú constaba de Gazpachu de fresa, Fabes con pitu caleya, Carrelleres al tintu madera y Peres al vinu


He de confesavos qu'a mi nun me gusta'l gazpachu normal, que-y vamos a faer, sicasí encantóme esti Gazpachu de fresa, mui suave, con un sabor llixero a fresa que-y da un toque distintu al gazpachu.


Fabes con pitu caleya, espectaculares, pocu más puede dicise. Toos repetimos y ye que se nota'l productu de calidá y que-y dediquen tiempu a preparar esta comida, hubo que tirar de fuerza de voluntá pa nun tomanos un tercer platu de fabes pensando qu'inda quedaba otru platu...


Carrelleres al tintu madera, sirvíes con pataques caseres, pimientos y un pocu del mueyu del guisu. Al comer una carrellera notase bien si son de bona o mala calidá, y nesti casu atopábamos ante una carne de bona calidá.



De postre, Pera al vinu, toque xustu de vinu por que nun mata too'l sabor del postre, suaves y correutes.


Yá fuera'l menú pidieron unes Croquetes de xamón Ibéricu y una Tortiella de puerros pa compartir nes que se coincidió que taben más que correutes.



Y como platos pa los comensales que nun se decidieron pol menú Repollu relleno, Pulpu a la brasa y Picadiellu y tacos d'adobu con tortos



D'estos platos tampoco puedo cuntavos enforma porque nun los probé (col menú yá taba qu'españaba), pero toos coincidíen en que taben bien bonos y puede reparase que les raciones son abondoses.



Postres pa compartir, Crumble de freses con xeláu de yogur y Cookies de rede velvet con xeláu. Probé un pocu del crumble y taba  bonu, esi fondu del crumble col xeláu de yogur fai un amiestu perfeuto.

Pa terminar unos Cafés de Pota, de los de tola vida y un agasayo d'unes copes de cava.


Tou esto nun ambiente perbién decoráu, una pena la fachada del local que nun acompaña'l restu y quiciabes fai más difícil el dase a conocer, anque nun duldamos de que yá sía poles redes o pel boca a boca van consiguir llegar a muncha xente.



Con tolo que comimos, vinu y agua pa beber pagamos ente 174 €, unos 18€ por persona, lo que me paez un preciu bien bonu dada la cantidá y calidá. Convidáronnos a los cafés y a la copa de cava, tou un detalle.



En carta creo que namás disponíen de Nibias Nº4 como vinu  local, tamién puedes atopar el vermut de sidra Roxmut. Como encamientu, introducir dalgún vinu más de la tierra o dalguna sidra de nueva espresión taría perfectu, sería un bon complementu a la ufierta de productos que yá tienen.


Si buscáis un sitiu prestosu, con una decoración guapa, un tratu perfeutu y una comida casera de bona calidá nun duldéis en visitar El Molín de Pablo. Yo ensin dulda voi repetir pa probar dalgunu de los sos arroces  a la brasa o les sos costielles asaes a baxa temperatura de les que vi bonos comentarios.

0 comentarios :

Publicar un comentario