Nueva Visita: La Casa Pompeyana

Direición: C/ Nava, 5, Xixón

Teléfonu: 984 19 24 19

Entraes Anteriores:
http://lesfartures.blogspot.com.es/2007/10/la-casa-pompeyana.html
http://www.lesfartures.com/2014/09/nueva-visita-la-casa-pompeyana.html

Calidá: 4/5

Preciu: 30€

Comentarios: De nueves nel nuesu italianu favoritu. Nun podemos tar muncho tiempu ensin dir comer sos Gnochetti. Y agora tamos envizcaos a los de gambes y espinaques.

Yá comentemos n'otres entraes cómo ye y lo que nos gusta d'esti restorán. Un Italianu pa bonos picos.

Vamos colo que cenamos esta vegada y cómo taba.

Anque tienen una amplia carta de vinos, como tamos nun restorán Italianu, pos pidimos vinu Italiano.

De normal tiramos a un Lambrusco, y el Rosatto encántanos:

Pero esta vegada quiximos probar otru palu italianu y, siguiendo encamientu de la metre, fuimos a por esti Verdicchio, el Colonnara, que resultó perfeutu. Frescu y suave:

Pidimos un entrante que nun viéramos na carta y que foi un aciertu. 

Radicchio con achicoria, calabacín y figos caramelizaos sobre quesu italiano. Bona presentación y perfeutu sabor. Nun quedó nada, y con eso queda tou dichu:

Como non, los Gnochetti con gambes y espinaques. Entramos diciendo que vamos pidir coses distintes, pero nun podemos evitalo al velo na carta. Ye que tán espectaculares, y dizlo quién los prueba:

Tamién probemos per primer vegada unos Casarecce con prosciutto. Trunfaron. Maravía. Convertiéronse n'otru platu imprescindible. Cremosos, prosciutto con sabor, pasta al dente:

De los postres, yá probemos dellos, pero esta vegada volvimos al clásicu Tiramisú. Y, si yá yera'l meyor de los probaos, entá-y dieron un matiz con un crocanti percima que lo ameyora. Yá díbamos xustos pero acabose nun momentu:

Como siempres comentamos, nun hai italianu meyor. Y si hai, entá nun lo conocemos. Pola so comida, pola so decoración, por tou...

Ciertu que'l preciu paez xubir más que n'otros, pero ye que la calidá ye cimera. Nun ye'l típicu italianu pa dir comer pizzes, que les tienen, y perriques, o daqué de pasta o lasagna y pagar 20€. D'esos hai munchos, y cada vez más. Este ufierta daqué más, y por eso vamos y gústanos enforma...

Una pena que, bien por poca promoción, bien pola so llocalización, bien por coincidencia, munches de les vegaes que vamos hai poca xente. Eso sí, más tranquilidá.

N'otres ocasiones, sobremanera pa comer, taba casi llenu.