Nueva Visita: La Toscana

Direición: Ramón B Clavería, 10 - La Felguera - Llangréu / Langreo
Preciu: 24€


Comentarios: Llocal asitiáu nel centru La Felguera, decoración preciosa en piedra y madera. Estremáu en dos zones, pisu cimeru, con barra y meses pa comer; y un pisu inferior con un salón pequenu pa grupos o cuando s'enllena la parte de riba. El llocal suel ser sele, y les meses con abondo espaciu pa nun fadiar.

L'atención ye cercana y cómese bien a gustu. El llocal ufierta comida casera, con dalgún toque más evolucionao. Tostes, especialidá en bacaláu y desque, va unos años, quedó nos primeros puestos na Guía del Cachopu, tamién los cachopos.

Cenamos 6 persones nel salón de baxo, con chimenea incluyida (anque nun fixo falta encender). La idea yera cachopear, asina que la elección yera clara.



D'entrantes, pidimos Moxones con Vinagreta de Fresa. Mui orixinales, gustó enforma esi toque de fresa na mesa. Más polo orixinal de lo refrescante del sabor. La fresa, bien suave, ensin llegar a matar el platu, y los moxones, bonos.


Pulpu  a la Brasa, Nel so puntu, bona ración que voló. Mui rica.

Como platos principales pidimos,


Cachopu. Con pimientu, espárragu, quesu y carne. Pa compartir pa 2. Cachopu xugosu, con bona calidá de rebozao y carne. A mi'l toque d'espárragos nun me maravía nel cachopu, pero yá ye daqué personal. Vien acompañao de llechuga y unes pataques.


Cachopu de Cecina y Quesu de Cabra. Gustó na mesa, anque pal mio gustu'l quesu taba demasiáu fuerte y mataba'l platu. Sigue siendo un cachopu xugosu.


Bacaláu con Cebolla Confitada y Amenorgamientu de Módena. El bacaláu ye especialidá de La toscana, n'ensalaes, en tostes y tamién en platu. Taba bien bonu, quiciabes l'amenorgamientu de módena,,. Vien cola cebolla confitada y l'amenorgamientu de módena percima. Quitámosla.


Medallones de Sollombu de Gochu al Cabrales. Pidimos el mueyu estremao, gran calidá de los medallones pa un gran platu. Senciellu, bien fechu, pero si'l productu ye calidable ... pocu más hai qu'añadir. Nun probé'l mueyu de Cabrales, asina que nun puedo dicivos.

Los postres son caseros, y dalgo que siempres destacó en La Toscana.


Pidimos Tarta Afuega'l Pitu, consistente, pero con un toque xugosu bien ricu.


Tiramisú. Bien, gustó enforma. Una bona tarrina de tiramisú.


Tarta d'Arroz con Lleche. Bona y suave.

Pa beber, pidimos  El Recio (esi home que se paez a Brian Johnson d'AC/DC), vinu famosu de Toro, que sabe potente pero bébese perbién. Gustó na mesa. Monte Blanco de Ramón Bilbao, la variedá blanca pa dellos comensales que preferíen tirase al blancu. Bien. Agua Solán de Cabras.


Nun esiste nenguna referencia a Vinos asturianos o Sidra Asturiano na carta vinos.

Pagamos 24€ per cabeza. Bon sitiu pa comer en La Felguera, de los pocos "restoranes" ensin sidra de la zona y con bona calidá. Manteles de papel y serviyetes de papel.

Acepta TicketsRestaurant.

0 comentarios :

Publicar un comentario