Blanco

Direición: C / Mayor, 11 - Cangas del Narcea

Teléfonu:  985 810 316

Recomendaciones: TOO

Facebook: https://www.facebook.com/barblancorestaurante/
Calidá: 4/5

Comentarios: Y a la quinta foi la vencida. ¡Por fin consiguimos una mesa nel Restorán Blanco en Cangas! Una de les xoyes del occidente asturianu (y d'Asturies entera) que tien de ser d'obligada visita pa tou amante de la bona cocina.

Llamamos un llunes p'acutar mesa pal sábadu aprovechando la nuesa visita a unes bodegues de Cangas, y solamente quedába-yos llibre 1 mesa. Asina que si queréis dir ... llamái. Paga la pena.

El Restorán Blanco ta asitiáu nel centru de Cangas, nuna cai piatonal, mui cerca del Conceyu. Da a una pequena plaza (en cuesta, que tamos en Cangas) onde puede tomase daqué tranquilamente ya inclusive con bon tiempu, comer o cenar.

Dientro, sigui calteniendo la esencia de chigre de siempre, tantu en decoración como n'ambiente, sigue siendo esi chigre onde van los paisanos a tomar daqué, y al empar, onde vas esfrutar de l'alta cocina, amás a un preciu bien algamadizu. Ye un contraste maraviyosu, qu'esperemos que nun se pierda nunca.

Empezamos con dos aperitivos, Salmorejo con Virigüetos y Quesu Manchego d'Oveya. Y equí ye onde hai que faer otru apunte a favor del Blanco, dalgunu de los comensales yera celiacu ya'l Blanco ye un restorán dafechu preparáu pa ello. A cencielles avisamos al sentanos y en cocina encargaronse del restu.

Pidimos delles tapes pa compartir al centru la mesa pa papanos un pocu de la filosofía'l local. Asegúrovos qu'ésta va ser la primera d'unes cuantes visites al blancu porque quedé con gana de probar una montonera coses.

Empezamos con Canutillos de Cecina con Menbrillo, Pimientos Asaos y Parmesano. Un auténticu espectáculu. Combinación de sabores bonísima, pa tomar d'un taragañu, de dos o de trés.

Cogordes Rellenes de Vidiago y Cebollina Confitada con un Mueyu de Boletus. Yá veis na semeya que ye una esplosión de colores, pero asegúrovos, que tamién de sabores. El Vidiago apurre testura y sabor, pero tou xuntu na boca ye una maravía. El mueyu amás, pa moyar pan ensin parar.

Bocarte con Anchoa con Mueyu Teriyaki, fora de carta. Xenial la combinación del dulzuxu del teriyaki col toque salao que da'l bocarte y l'anchoa. Amás, emplatáu individualmente.

Alcachofes de Tudela Cruxentes con Xamón Ibéricu y un Mueyu Romesco. Otru espectáculu de platu. La testura cruxente de l'alcachofa, col xamón y el romesco ... amás con unes pataques frites paya. Cuyar, pan y felicidá.

Y finamos con unes Gambes Salteaes al Wok y un Arroz con Verdures "Thai". Tamién emplatáu individualmente, con un par de bones gambes y un arroz pa zucase los deos. Platu suave, oriental, y perfeutu dempués de les alcachofes.

Tábamos llenos, pero nun podíamos dir ensin probar un postre. Praline d'Ablana con Crema de Vainilla y Xarazáu de Mazana Verde. Suave, con esi toque d'ablana y mazana .... per ricu.

Non tolos díes ún tien la ocasión de comer con dos productores de vinu, asina que como lluxazu estra, pudimos esfrutar de vinos tintos de Bodega 7 Vidas (de los que vos falamos equí), dempués qu'el sumiller Enrique Ron diéra-yos el vistu bonu.

Empezamos con una sorpresa que van sacar al mercáu ceo, Vive la Vida. Uva albarín negra, carrasquín, verdeyu negru y un toque de mencía asturiana, pa un tintu de 2014 avieyáu en barrica de carbayu. En curtiu van sacar al mercáu 600 botelles. Si podéis, faevos con una, va gustavos. Un vinu suave, con sabor, persistencia y qu'entra solo.

Siguimos col so CienMontañas Carrasquín 2014. Un vinu dafechu distinto, que va dar enforma que falar en Cangas. La uva carrasquín tien un golor y un sabor bien particular, y gustónos enforma. Yá conocíamos los sos blancos (de los que tamos namoraos), pero esti Carrasquín foi la gran sorpresa de la nuesa visita a la so bodega.

Una auténtica maravía de comida, non namás pola compañía, polo que pudimos aprender, sinón porque, amás, comprobemos que la fama que precede a la familia Ron ye dafechu merecida. El Blanco dende YÁ ye unu de los nuesos sitios favoritos.