 |
http://www.sidraviudaangelonpomar.es/
Versión Castellán: http://www.lesfartures.com/2015/06/sweet-llambionsidra-viuda-angelon.html
Llambión, -ona, -ón (-ono): ax. Que llambe. 2 Dau a llamber. 3 Fartón, dau a fartase. 4 Qu’apetez [muncho]. Les tartes son mui llambiones. 5 Que tien un soníu especial, melodiosu [un instrumentu musical, les campanes].
Teníamos muncha gana al Sweet Llambión. Y non solo porque síamos bonos amigos de les sos organizadores, que lleven munchos años lluchando por faer una Villa meyor (y consiguiéndolo. Tamos bien arguyosos de vós) sinón porque ye un auténticu luxu poder cuntar n'Avilés con xente tan destacada dientro de la repostería, tantu de dientro como de fora de Asturies.
Nesta ocasión, nun duldamos n'asistir al Maridaxe ente la Confitería Vidal y la Sidra de Viuda de Angelón. Malapenes merecen presentación porque tamos falando de lo meyor de lo meyor dientro del so ámbitu.
Confitería Vidal lleva siendo tola vida un referente n'Avilés y Asturies tocantes a la repostería. La so fama nun deceiciona y podemos asegurar que destaca muncho más que les famoses confiteríes d'abolengu. El trabayu d'Emilio Vidal y el so equipu ye maraviyosu.
Sidra Viuda de Angelón yá sabéis que ye una de les nueses favorites, con un trabayu qu'entemez a la perfección la tradición y l'investigación sacando al mercao productos premiaos internacionalmente con una calidá fora de dulda.
Pa esta ocasión, tratabase de maridar sidra de Nueva Espresión con distintos postres que propunxeron tantu Fran (Viuda de Angelón) como Emilio (Confitería Vidal).
Empezamos con una Mousse d'Arroz con Lleche con Xelatina de Sidra espectacular, maridada cola Sidra de Mesa 1947 qu'acaba de consiguir nin más nin menos que la Medaya d'Oru nel famosu festival Great Lakes International Cider & Perry Competition en Michigan (EEXX). Maraviyosa sidra de mesa que ta consiguiendo l'hasta agora talón de aquiles de la Sidra de Mesa, el golor; y ye qu'esta sidra yá güel a sidra y sabe a sidra. Per recomendable.
Siguimos con una Mousse con Ablanes maridada con Pomar Rosée, ún de los últimos llanzamientos del llagar. Sidra ellaborada sol métodu Granvas, con un color rosao carauterísticu que lo da la magaya de la mazana mientres 3 meses macerando y un toque seco que dan los baxos azucres.
Y pa rematar, tomamos un bombón de Chocolate Relleno de Compota de Mazana maridao cola famosa Sidra Diamantes de Xelu, sidra orixinal de Canadá que s'imita n'Asturies conxelando'l mostiu de la mazana, lo cual produz una mayor concentración d'azucres y graduación alcohólica. Eso produz una sidra perfeuto pa postres, que casi paez un llicor pero que non empalaga en nengún momentu. Maraviyosa pa rematar una comida.
Yá sabéis la cita llambiona qu'hai n'Avilés a mediáivos de Mayu ... ¡Nun podéis faltar!
No hay comentarios
Publicar un comentario