Nueva visita: Casa Baizán

Direición: Calle Corrida, 4 - Xixón

Teléfonu: 985 17 27 45

Web:           http://www.casabaizan.es/
Facebook: https://www.facebook.com/casabaizan

Visita anterior: http://www.lesfartures.com/2014/01/casa-baizan.html

Calidá: 3/5

Preciu: 25€

Volvimos tres muncho tiempu, y dempués de camudase al so nuevu allugamientu na cai Corrida. Aprovechando amás l'entamu la temporada de bonitu y al ver les semeyes que publicaron en Facebook de les albóndigues que preparen y de les cebolles rellenes de bonitu. 

Magar el nuevu local nun tien l'encantu del anterior, l'allugamientu ye fantásticu y déxa-yos tener una terraza en plena cai Corrida que de xuru qu'apurre-yos a esgaya. Dexámosla pa una próxima visita ya que la nueche nun pintaba bien, anque ta cubierta y xente había.

  Namásun detalle a criticar, y ye daqué que nos ta asocediendo demasiáu de cutiu, ye que teniendo reserva pa 2, al llegar entrugamos pola nuesa mesa y ufiértennos dende barra qu'escoyamos ente 2 que taben llibres. Avérase otru camareru de sópitu indicando que non, que tien que ser una d'elles, la que ta más escontra'l centru y non a la que díbamos xuntu al ventanal y con más intimidá. Qu'esa taba acutada pa otra pareya habitual y que si nun la teníen paez-yos mal. Tuvimos a gustu y comimos de lluxu, con una atención perfeuta ya informal, como nos gusta. 
Pero estos detalles dexen una mala impresión inicial que de xuru se podría evitar.

Siendo 2, solemos pidir un entrante y un par de principales. Les albóndigues de bonitu yeren un fixu, y el secretu ibéricu con foie ye irresistible. Añadíemos un entrante, pero encamentáronnos nun pidilo porque yá yera más qu'abondu. Y atinaron.

P'acompañar, como non, productu local. Siempres que lo haiga, apuéstase.

Nesti casu un Escolinas Blancu Sobre Líes del 2013, de Cangas. Maravía de vinu a un preciu más qu'afechu:

Llegaron dempués les deseyaes Albóndigues de Bonitu. 3 unidaes de tamañu más que considerable. Asina tienen que ser porque los cachos de bonitu son importantes. Una delicia. L'albóndiga, el mueyu y les pataques caseres:

Y dempués, el Secretu Ibéricu con Foie. A la plancha. La so gran especialidá. La semeya desmerez al platu. Trés visites fiximos, y les 3 vegaes foi imposible aguantase a pidilo. La semeya nun fai xusticia...una pena...va haber que volver pa faer una bona...

Como gusta terminar con daqué duce, quixímos probar la tarta de chocolate casera. Una especie de bombón de chocolate que prestónos a esgaya. Bien de chocolate, y contundente. Pero irresistible:

Un apueste seguru. Céntricu. Tratu campechanu Prestosu. Comida casera. Casi tou a la plancha. Productu llocal. Y preciu bien afechu. Nun falla.