Sobiñagu

Direición: Calle Leoncio Suárez, 60. Xixón

Teléfonu: 984 298 063

Recomendaciones: Chuletón de Güe

http://www.sobiñagu.com/
https://www.facebook.com/pages/Sidreria-Sobiga%C3%B1u/134058733400665

Calidá: 3/5

Preciu: 30€

Comentarios: Va unos meses allegamos a la Sidrería Sobiñagu convidaos pola Revista La Sidra a realizar un Maridaxe de Sidra Brut Poma Aurea y Güevares d'Oriciu, una esperiencia maraviyosa qu'esperamos poder repetir. El so dueñu, Rubén Barreru, fíxonos sentir tan a gustu, que-y prometimos visita a probar el so productu estrella, los chuletones.

Asina qu'axuntamos unos cuantos amigos y fuimos cenar un sábadu de nueche. Lo primero que nos sorprendió foi l'ambientazu qu'había na sidrería, más paecía un llocal de moda porque costaba entrar y aportar al comedor. Muncha xente en barra bebiendo sidra y dalguna tapa, o esfrutando de los numberosos pinchos que suelen pasar.

Tienen dos zones de comedor, una estremada por biombos de la zona la barra, onde s'echa y otra, más "formal" y moderna onde nun s'echa sidra pero sí que tien un sistema integráu nes columnes onde pones el vasu, calques un botón y t'echen un culete sidra. Ensin dulda, más "llimpiu", más "modernu" pero esta práctica, xunida a los famosos "isidrines" y tapones de sidra, ta acabando adulces cola figura d'escanciador de sidra n'Asturies. Asina que nós, siendo consecuentes, pidimos cenar na zona "escanciable".

Tienen dos palos de sidra, Trabanco y Sidra Carrascu (la sidra de denominación d'orixe protexida d'Acebal). Escoyemos Carrascu pa cenar.

La idea yera probar los distintos tipos de chuletones que teníen y decidir cuál nos prestaba más. Diéronnos 3 tipos distintos: Chuletón de Güe de Los Valles del Esla, Chuletón d'Angus y Chuletón de Xata Asturiana. La sidrería davezu cuelga nes sos redes sociales semeyes de los certificaos d'orixe de les sos carnes, asina que nun vamos entrar nel alderique sobre si'l güe ye güe, o si l'Angus ye Angus ... (y menos mal que nun había Kobe).

Tolos chuletones vienen con pataques y pimientos, estazaos y al puntu, nuna mini plancha onde se puede dir faciendo al gustu de cada unu. Les pataques traenles aparte.

De los 3 chuletones, el que más nos prestó ensin dulda, foi'l Chuletón de Güe. Per bon cachu de carne tienro, que se desfai, Los otros dos chuletones tamién taben per bonos, pero yeren más suaves y con menos sabor. La mesa foi unánime.

Asina que repitimos el Chuletón de Güe y nun quedó nada.

De postres pidimos Milfueyes d'Arroz con Lleche y Chocolate Caliente, Tarta Xixonesa (per bona), Milfueyes de Fresa y Tarta de Quesu. Los postres tán bien, pero nada del otru mundu.

Con cafés y clines, pagamos 30€ per cabeza.

Bon sitio si te presta la carne (queda pendiente visita pa probar otru tipu de comida), bien de preciu, con ambiente y amiestu de decoración tradicional y moderna.