http://www.txogitxu.com/
Versión Castellán: http://www.lesfartures.com/2015/07/evento-embutido-el-curo-carne-txogitxu.html
Nun duldamos n'alleganos a la invitación d'Embutído El Cuco p'anuncianos la distribución n'esclusiva de la Carne Txogitxu, premiada como la meyor carne del mundu nos Great Taste Awards 2014.
Pa ello, Embutidos El Cuco axuntónos nel Llagar de Cualloto pa poder tastiar los sos embutíos y, n'esclusiva, les carnes de Txogitxu, onde amás cuntamos cola visita d'Imanol Faca, responsable de Txogitxu Carnes Coloraes.
Hai que ser pervascu pa venir a Asturies a dicir que nel País Vascu hai más cultura de la carne que n'Asturies y qu'equí nun sabemos tratar tan bien el productu. Hai que ser pervascu pa dicir que los restauradores de la carne asturiano tendríamos dir al País Vascu a aprender cómo tratar la carne. Y lo más grave de too, hai que ser per pocu asturianu p'amás aplaudilo.
Paeznos innecesarios los alderiques sobre cuál ye la meyor carne del mundu, y felicitamos a Txogitxu pol premiu recibíu. Amás, dempués de probar el chuletón, podemos afirmar que la carne ye esceicional. ¿La meyor que comimos? Claro que non. Pero sí de los meyores. Amás, yá la probáramos na nuesa visita al Castru Gaiteru, que vamos publicar en curtiu nel blogue.
Pero creo que naide puede duldar de la calidá de la carne asturiano y del bon faer de la hostelería asturiana cola carne. ¿Qu'esiste xente aprovechao que viende gatu per llebre? Muncha, pero equí y nel País Vascu.
¿Cuál ye'l problema entós? Marketíng. Como pa cualquier productu asturianu. Nun tenemos nada qu'envidiar a naide, sicasí, siempres valoramos más los productos de fora en cuenta d'apostar polo propio. Pasa col quesu, pasa cola sidra, pasa col vinu y tamién pasa cola carne.
Mientres escuchaba a Imanol falar de la pasión que-y pon al so trabayu, nun podía más que sentir envidia de daquién qu'esportaba país, que defendía'l productu de la so tierra y taba arguyosu d'él. Por eso, la mio crítica nun ye escontra Imanol (tolo contrario, la mio almiración pa un profesional apasionáu que se sale de lo común y llucha caldía polo que cree), sinón p'aquellos que nun faemos lo mesmo.
Pa entamar probemos Chorizu y Salchichón de Vaca Gallega, Cecina de Vaca Gallega, Chistorra Vasca de Gochu y Chorizu de Gochu Ástur-Celta. Mui, mui ricos los embutíos d'El Cucu.
Ismael esplicónos cómo faer de forma correuta una chuleta. Cortala con unos 4 o 5 cms de grosor, menos non. Atemperala hasta unos 15 o 18º, 18º meyor. Usar una plancha en casa, yá que ye perfeuta pa les chuletes. 4 minutos por un llau. Da-y la vuelta. Echar sal gordo marina abondo (darréu va quitase, yá que defende presentar el productu ensin sal percima pa nun estropialo). Nada de sales maldon o demás modes que lo único que faen ye estrozar el productu. Otros 4 min pol otru llau. Quitar el sal. Presentar nuna bandexa de cerámica calecida a unos 70º pa caltener la temperatura. Quitar el güesu y trinchar en tayaes fines o gordes, a gustu del consumidor.
Acompañaron la comida con una barrica de Sidra Quelo, duce y algamadiza, pero rica. Vinu Crianza Edulis. Refrescos y Agua de Borines.
Dexámosvos unos videos del eventu:
No hay comentarios
Publicar un comentario