Comentarios: Gracies a los Tickets Restaurant, animámonos a visitar l'Avant Garde, dempués d'escuchar valoraciones de too tipu, lo meyor ye dir unu mesmu y probar. Y salimos abondo contentos.
Asitiáu en frente del paséu la Sablera de Xixón, con un allugamientu dificilmente meyorable, l'Avant Garde asitiáse na planta baxa l'hotel NH. Tien salones pa bodes (dafechu taba celebrandose una, anque la zona restorán onde comimos ta bien alloñada como pa enteranos de nada), con un ambiente que convida a la conversación, de lluces baxes y grandes cristaleres. Según entres na planta baxa, te vien un golor a cloru de SPA, pero yá na zona del restorán nin t'enteres. Eso sí, el filo musical ....
Como aperitivu mientres decidíamos cola carta, traxéronnos un Tataki d'Atún Coloráu, mui ricu. Entamábamos bien.
Decidimos por unes Zamburiñes Braseaes con Tupinambu y Fenoyu, presentaes nun macro platu con conches de mar ente elles. Bien riques en sabor, anque pequenes en tamañu. Y ésa sería la tónica de la nueche. Amás taben templaes.
Como platos, tiré a la Ventrisca, anque m'avisaron más tarde que yera bien pequena en tamañu como pa ponela de platu, asina que pidí'l Pixín Negru Braseáu con Arbeyos Tienros y Caldu de Virigüetos. Per ricu, anque una ración mui pequena.
Tamién pidimos un Llombu de Salmonete Rustíu con Arroz Caldosu nel so Zusmiu, al que-y pasaba lo mesmo. Bien ricu de sabor pero una ración mínima.
De postres pidimos Tocinillu de Cielu con Xeláu de Lleche Merengada, que según la esperta en tocinillos taba espectacular, de los meyores que probó. Y Pastel d'Ablana con Xeláu de Carambelu y Especies, que yá nos avisaron que tardaría unos 12min (amás, venía especificáu na carta). Bien ricu tamién.
Acompangamos tou con agua y un Muller Catoir M-C Riesling 2009. Gran vinu, combinando acidez y el dulzor de la riesling a la fin.
Con cafés, pagamos 94.75€
Coles raciones un pocu más grandes, ameyoraría enforma. El serviciu afayadizu, anque'l nuesu mantel tenía dalgún qu'otru llamparón y yera demasiáu grande pa la so mesa.
Acepta Tickets Restaurant
No hay comentarios
Publicar un comentario