Recomendaciones: Va prestavos too
Anterior Entrada: http://lesfarturesast.blogspot.com.es/2015/09/aramar-playa.html
Dempués de la primer experiencia que vos cuntamos na web, averamos de nuevu a Aramar a probar el restu la carta. Y ye que nun abonden los chiringos con cocineros que se criaren en Casa Marcial, y eso nótase. Esi plus de calidá ta presente en cada ún de los platos que preparen, y si amás sumamos que ye un sitiu paradisiacu con unes vistes increíbles, la esperiencia ye única.
Siempres hai que poner un "pero", pero entrecomillolo porque tán entamando y hai que dir adulces. Un ambiente asina a mi pídeme una bona cerveza, y non Aguila Amstel. A lo menos añedir dalguna referencia de Cerveza Artesano Asturiana (en botella) pa el consumidores que somos un pocu más esixentes cola cerveza, sería d'estimar. Caleya, Cotoya, Bayura ... Esperemos que tomen nota pa otros años.
Empezamos la comida con unes Fogaces de Pan de Lluanco con Tomate n'Aceite y Sal de Naranxa. Vaya maravía pan. Cómo nos encanta que la xente nuevo qu'allega a un sitiu potencie'l pequenu comerciu local de calidá. Y ye qu'anguaño ye un lluxu comer pan asina. Una gociada.
Pidimos Ensalada de Salmón y Aguacate, con cachos de tomate entemecios ente'l salmón. Deliciosa. Nun me gusta nada l'aguacate frío recién sacao de la nevera (onde nun s'encamienta guardalo), asina que ye un puntazu dignu d'estimar que venga a temperatura ambiente (que fai calor, pero n'Asturies tampoco tamos a 35º)
Siguimos colos Pasteles del Mar (Atún y Oricios). Tou caseru. Gustónos más el d'Oricios, porque sabe más, porque de testura y cocción tán los dos perfeutos. Platu simple pero deliciosu, acompañao con unes tostas bien riques.
Como platu principal pidimos Pimientos rellenos d'Atún. Yá quedé la otra vegada con gana probalos. Perricos. 4 unidaes presentaes nun sartén con un mueyu estupendu. Bon rellenu. ¡Volaron!
De postre, pidimos la yá famosa Tarta de Quesu con Xeláu d'Heliu, menudu espectáculu. La presentación de 10, pero ye que la testura la tarta de quesu ye suavísima, cola bola de xeláu nel mediu (y non cualesquier xeláu, que los xelaos Helio son buenísimos) cola galleta na base, faen un postre perfeutu; y amás, ye una gran ración.
Amás queríamos probar l'Arroz con Lleche, con un toque llimón, canela y anís. Pero un anís abondo sutil. Somos bien esixentes col arroz con lleche yá que tenemos accesu al fechu con lleche casero de forma tradicional. Pero ésti ta realmente bonu. Mui ricu.
Finamos con unos cafés y, amás, unos cockteles marca de la casa.
Tomamos un Hugo, que yá lo probemos l'anterior vegada y ta bien ricu. L'amiestu l'amargor del cava y el dulce la flor de saucu, col xelu, ye una combinación bonísima.
Yo animéme con una Caipirinha de Fresa, pero fecha de les de verdá, como les que nos faíen en Brasil. Freses cortaes, con una base de xelu picao y un sabor integrao. Nada d'escesos. Bien rica.
Como veis, una comida completa que sería digna de cualquier restorán, pero nun ambiente dafechu distendíu y relaxáu. Con unes vistes precioses. Gran sitiu Aramar. Gracies Marcos y David!
La comida ficismola con Cañes de Cerveza industrial española y Agua.
Amás acepten TicketsRestaurant
Pagamos por tou 55€.
No hay comentarios
Publicar un comentario