Nueva Visita: Traslaburra

Direición: Plaza Trascorrales, s/n Uviéu - Oviedo. 

Teléfonu: 985 203 567

Recomendaciones: Anque nun lo había ... resulta inolvidable'l Xeláu de Turrón de Diego Verdú

http://www.traslaburra.com/

Visita Anterior: http://www.lesfartures.com/2013/12/traslaburra.html

Calidá: 3/5

Preciu: 40€

Comentarios: Averamos a cenar un vienres a les 23 y picu cola esperanza d'atopar la cocina abierta, y sosprendiónos que gracies a un par de cenes acoyéronnos ensin problema.

Preciosu llocal asitiáu nuna de les places más guapes d'Uviéu, decoración de los salones con murales ¿etruscos? y piedra al estilu de casona asturiana. Lo meyor del local ensin dulda ye la terraza, asina que si tenéis ocasión pidíi mesa fuera (si'l tiempu dexa, claro).

Mientres decidíamos qué cenar, traxéronnos una especie de Consomé de Cenahoria, o eso dixéronnos cuando entrugamos porque nun nos lo cantaron de la que nos lo punxeron na mesa.

Pidimos d'entrante los Espárragos Trigueros envueltos en Xabugu con Pistu y Güevu Poché. Dafechu fallíu, lo meyor el güevu ...  el xamón sería de Xabugu, pero nun pasaba de xamón serranu normal y corriente. Amás, taba templao. Una pena porque'l platu nun paecía complicao pero podría ser resultón.

De platos pidimos, Bacaláu al Pil Pil (tirando de clásicos), que taba bonu, quiciabes inda demasiao salao, pero con una testura perfecta. El Pil Pil bien bonu.

Y Pixín con Salpicón de Llangostinos y Crema Pataca, per bonu. El Pixín estupendu, con esa testura que tanto presta, y la combinación colos llangostinos y la pataca mui bona. Amás yera una bona ración.

De postres, díbamos de cabeza a pol Xeláu de Turrón de Diego Verdú pero ... nun quedaba. Menuda decepción porque casi díbamos n'esclusiva a por él, asina que contentamos con una Tentación de Chocolate en Testures, que nun va pasar a la posteridá, anque'l coulant taba bonu. Y un Milfueyes de Freses que nun pasó del 5 según la esperta en milfueyes.

Un par de copes de Albariño, agua y cafés, pagamos 81,40€.

Muncho meyor l'anterior vegada que fuimos, y un pocu caru pa nun pidir botella de vinu. Esperábamos daqué más y nun pudimos evitar dinos un pocu decepcionáos, anque va haber que volver tomar el deliciosu xeláu de turrón na terraza.

Acepten Tickets Restaurant.