Nueva Visita: El Marinero

Direición: C/La Garita, 60. Arrieta - Lanzarote 

Teléfonu: 928 848 382

Recomendaciones: Pexe

https://www.facebook.com/restaurante.elmarinero?fref=ts
Anterior Entrada: http://www.lesfartures.com/2012/10/el-marinero.html

Calidá: 4/5

Preciu: 32€

Comentarios: Ún de los nuesos rincones más prestosos de la isla, podría vivir comiendo n'El Marinero. Tres 3 años d'espera, cola dulda de si caltendríen o non el nivel, namás podemos dar les gracies a Nauzet Santana y'l so equipu por siguir creciendo y ameyorando.

El primer encamientu que vos faigo ye acutar, y más si táis en "temporada alta" na isla, anque la temporada alta tienen de ser 8 meses al añu ... Y si acutáis, pidir, si podéis, una de los dos meses que s'asitia al fondu del restorán, con vistes al mar. Comer coles ventanes abiertes, goliendo'l mar mientres se tastien los productos d'El Marinero, ye un auténticu lluxu.

Restorán pequenu, coquetu, con decoración marinera, y bien cuidada. Destaca el fondu tresparente, orixinalmente teníen pensao pa faer un pequenu acuariu, anque creo que nun pudieron por problemes técnicos.

Recibenmos con una Copa de Cava, perfeuta pa enfrescanos, anque s'estimaría dalgún tipu de aperitivu sólidu.

Como entrante pidimos Hoxaldre de Setes, Cebolletes y Llagostinos. Realmente espectacular. Menuda maravía, l'hoxaldre perfeutu; acompañáu d'un toque de pimienta que xunto cola cebolleta da-y un toque picante al platu bien interesante. Per recomendable.

Como platos principales, pidimos dos pexes azules. Medregal y Xurel. Dambos acompañaos de papes engurriaes y ensalada.

Los dos pescáivos vienen trociaos y ensin espines. N'apariencia los dos platos son asemeyaos, pero por sabor del pexe, ganó'l Xurel, más sabrosu. Asemeyáu al Cherne, otru pexe qu'abonda na isla y que nun podéis dexar de probar.

De postre pidimos Espluma de Gofiu con Chocolate Blancu. El gofiu ye una farina ceberes turraes típica de les Isles Canaries. Comúnmente acomuñada a "comida de probes", ta adquiriendo una nueva revalorización cola nueva cocina canaria. Sobre'l postre dicir que ta deliciosu, con una testura perfeuta, anque'l chocolate apenes notase. Eso sí, el gofiu cola galleta ta buenísimos.

Pidimos tamién Torrexa de Pan d'Anís Caramelizáu, bien rica. Lo más importante ye que nun empalaga. Los dos postres a gran altor.

Pa beber, pidimos Martinón Malvasía Blanco Secu. Paeciónos un vinu correutu, anque tampoco namoró.

Mención aparte pal pan. Bonísimu.

Con cafés y convidaos a un clin de ron de miel casero, pagamos 65,87€. Impresionante rellación calidá-preciu.

Confirmámoslo, sigue siendo'l nuesu sitiu favoritu de la isla.