La Posada del Mar

Direición: C/La Riba, 15. Luanco / Lluanco

Teléfonu: 985 880 751

Recomendaciones: Pexe

https://es-la.facebook.com/posadadelmar.luanco

Calidá: 3/5

Preciu: 25€

Comentarios: L'oxetivu de la visita a La Posada del Mar yera comprobar si Toño Escandón ye tan bon chigreru como fotógrafu. Y vaya si lo ye.

Chigre preciosu al que s'allega caleyando per Lluanco, asitiáu nuna cai peatonal, ye una típica casa asturiana de dos pisos, con balcón de madera. Per dientro, ta estremao en dos pisos, la zona de baxo, con meses pa tomar daqué (y tamién comer) y la zona d'enriba pal comedor. Decoración marinera, de chigre, bien guapa. Lo único que me sobren son esos cuadros toreros robláos por Jose Tomás ...

Llocal familiar, llévalo Toño, la so muyer na cocina y otru camareru, tratu bien atentu, sollerte y rápidu. Carta curtia, pero qu'abarca tou y tirando de productu del día, sobremanera, pa los pexes y mariscos, que son de primera. La carta de vinos sí que tira de clásicos y echamos de menos dalguna referencia más introduciendo dalguna sidra brut o de mesa pal comedor d'enriba, que sería perfeuta para pexes y mariscos.

Una maravía si sois dos y podéis comer nel balcón (si'l tiempu dexa, claro), un ambiente maraviyoso. Nós comimos 5 persones pegaos tamién al balcón. Meses amplies y separaes que conviden al relaxase y esfrutar.

Empezamos con una ración de Zamburiñes. Enormes. Con un toque de plancha, ayu y aceite. Perfeutes. A mi maraviáronme, sobremanera pol tamañu. Amás que la ración foi abonda pa los 5.

Pidimos 3 platos principales pa compartir, a encamientu de Toño. Ración y media de Rollu de Bonitu, Cachopu de Merluza y una Llubina al Llombu.

Tou na mesa, al centru pa sirvinos. Camudándonos los platos delles vegaes, con enfriador de vinu, manteles de papel ... lo más paecío a comer en casa pero con productu de primera.

Primero traxéronnos el rollu de bonitu, perbona ración en rodaxes fines, con un mueyu bonísimu. Bien nidiu. El Cachopu de merluza a mi encantóme, bon rellenu, equilibrao, con un mueyu ricu y acompañao d'unos llagostinos.

Pero mención aparte merez esa llubina. Va ser difícil d'escaecer. Perrica. Ración de quilu y picu, abierta, con ayu, aceite y pataques cocíes. Simple, pero perfeuta. Nun quedó nada.

De postres pidimos, Tarta de Quesu, Arroz con Lleche y Xeláu de Turrón.

Tou perricu, la Tarta de quesu realmente espectacular. L'arroz con lleche tampoco quedó atrás. Ufiertenlu requemao o con un toque canela, que siempres ye d'estimar.

Pa beber, tomamos un Valdelapinta Verdejo Clásicu 2014, que comprobemos qu'acaba de ganar el Concours Mondial de Bruxelles 2015. Gustónos. Acompañao d'Agua Solán de Cabras.

Con cafés, pagamos 126€. Xenial rellación calidá-preciu pa lo bien que comimos.

Nun podéis perder nin Lluanco, nin La Posada del Mar. Yo yá prometí visita pa probar el cachopu de carne, del que me falaron maravíes. Yá vos cuntaremos ...