Recomendaciones: Hamburguesa y esa tarta de quesu ...
La Sablera Aramar siempres foi famosa por ser un pedreru pa dase un bañu sele con un prau onde poder tomar el sol. Amás tenía chiringu onde poder tomar daqué. Agora David y Marcos, dos mozos pero con abonda esperiencia nel mundiu la hostelería, fixéronse cargu d'él y quixeron da-y una vuelta tuerca a la idega. Remocicaron el local, quitaron les sielles de plásticu y camudáronles por bancos y meses de palés de madera. ¡¡Si amás tienen tumbones de palés!!
Amás quixeron curiar la cocina. Apostando por productos cenciellos, pero calidables, y sobremanera, llocales. El movimientu de "Piensa Global, Consume Llocal", que tanto sofitamos dende Les Fartures ta lleváu a la máxima espresión n'Aramar . Los tomates son del paisanu que vive al llau del chiringuitu, la lleche mercada a productores de Gozón, el xeláu a los famosos productores Heliu de Lluanco ... Tou un luxu.
Por eso, en cuanto pudimos, escapamos a conocer y esfrutar la so propuesta. Nun vos va defraudar.
Según sentámos na mesa (en serio, son una pasada), traxéronnos un aperitivu de Salmón con Aguacate, mui ricu. Y'l pan ... fogaces d'artesanos del pan de Lluanco, con tomate n'aceite y sal de naranxa. Son esos pequenos detalles qu'empresten.
Pidimos una Ensalada de Tomate con Pesto. Tomates de la güerta local, d'esos que saben, que casi nun precisen más qu'un plizcu d'aceite pa ser una delicia.
Y l'Hamburguesa Casera con Quesu de Cabra. Impresionante. Carne xugosa, bien preparada. Con Tomate. Rucula. Cebolla caramellada ... y un bon cachu de quesu cabra que desfáise. Bonísima.
El pan ye otra hestoria, pan de verdá pa una hamburguesa de verdá. Per bona.
Casi perdonamos el postre, pero encamentáronnos que probáramos daqué, asina qu'a la fin decidime pola Tarta de Quesu con Xelao d'Helio. Según apaecieron col tarru "de los d'enantes" casi dame mal, porque yera enorme. Al abrir, afayamos una nidia mousse de quesu, con mermelada fresa, deliciosa y en mediu, la sorpresa, el sorpresón ... una bola xelao Heliu de vainilla. Supongo conocéis los famosos Xelaos Helio, con tiendes en Candás y Lluanco y que son la perfeuta escusa pa visitar sitios tan guapos. La tarta espectacular.
Queda pa otra ocasión probar l'Arroz con Lleche, con lleche de vaca de la zona.
Nel local amás, faen Cockteles. Asina que p'acabar la comida tomamos el famosu Cocktel Hugo, bien famosu n'Alemaña, Suiza o Italia (y polo tanto, nes Baleares y Llevante español), fechu a base de Cava brut y flor de Sauco. Perricu. De xuru que resulta más interesante asturianizándolo un pocu con Sidra Brut.
Un sitiu preciosu, con una decoración bien cuidada, unes vistes increíbles y, amás, una comida al altor del sitiu. ¡Vamos Repetir! (Gracies a la modelaza por posar)
Amás acepten Tickets Restaurant.
No hay comentarios
Publicar un comentario