OX184

Señes: 184-186 Cowgate - Edimburgo - Escocia

Teléfonu: +44 131 226 1645

Web: https://www.ox184.co.uk/
Facebook: https://www.facebook.com/OX184/
Twitter [@ox_184]: https://twitter.com/ox_184
Instagram [@ox_184]: https://www.instagram.com/ox_184/

Calidá: 3/5
Preciu: 20€

Comentarios: Empezamos el viaxe per Escocia, n'Edimburgu. Una ciudá preciosa, pequena, pa caleyar nun día y mediu ensin nengún problema. Con un castiellu preciosu (anque gana por goliada'l de Stirling) presidiendo la ciudá, y llena de pubs. Nun mos engañemos, ún de los principales atractivos del viaxe yera la cerveza yá'l güisqui,  asina qu'empezamos la visita -como nun podía ser d'otra manera-, n'un BrewPub de Brewdog, la cerveza artesano escocesa más conocida y que podéis atopar yá en munchos locales asturianos.

En frente, otru de los locales referentes de cerveza artesano de la ciudá, OX184. 20 cañeros de cerveza artesano, gran parte d'ellos con cerveza llocal y dafechu desconocida pa nós y una de les meyores ufiertes de güisqui de la ciudá. Lo de la comida ... ye lo de menos. Anque viendo lo visto, nun tuvo del tou mal.

Llocal de dos plantes, con una enorme parrilla nel pisu cimeru, y comida informal centrada na carne. Meses de madera, llocal con decoración amplia ya industrial. El llocal abre toles hores posibles, dende l'almuerzu hasta les copes dempués de la cena.

Personal bien sollerte, esplicáronnos la so filosofía d'intentar incluyir nes sos cañeros cuantes más cerveces artesanes puedan d'Escocia. y de xacíu, ufiertar una de les meyores cartes de güisqui de la ciudá. Tamién tien daqué de sidra, anque non escocesa.

Asina que pa beber, punximos en manes del llocal y dedicamos a probar pintes de cerveza y güisqui. Y como nun yera plan de salir d'ellí a rastres, probemos daqué de la so cocina. Foi l'únicu sitiu d'Escocia onde nos ufiertaron carne d'Angus, daqué bastante curiosu porque Asturies ta llena de sitios qu'ufierten carne escocés (casi más qu'asturiana) y sicasí, n'Escocia ... sonába-yos hasta raru. Curiosu.

Preguntamos pola carne, y traxéronnos la única hamburguesa que la llevaba. Amás, con un mueyu a base de cerveza. Bien rica l'hamburguesa. El restu la carne, típica de cualquier sitiu con parrilla americanu. Tienen opciones vexetarianes y pa celiacos.

Antes, mientres y dempués de la comida, tuvimos probando distintos güisquis escoceses desconocíos (pa nós) cola cerveza. Una combinación buenísima. Probar güisqui n'Escocia tamién ye curiosu, pagues más qu'en Asturies por beber menos cantidá. A pesar de ser güisquis llocales escoceses. El mundu a revés. 4 llibres (o más) por 2cl. Ridículu.

A la fin, pagamos, pero más pol alcohol que pola comida. Nun ye un restorán caru. Recomendable si tas pela zona y gústate la cerveza yá'l güisqui