Publicidá

Blog Archive

Contact Me

Nombre

Correo electrónico

Mensaje

Hover Setting

default

El Pintu & Collacios - Eseteveinte


Señes: Calle de la Libertad, 11 - La Pola Llaviana
Teléfonu: 984 045 505


Facebook: https://www.facebook.com/El-pintu
Instagram: [@el_pintu_laviana] https://www.instagram.com/el_pintu_laviana/



Calidá: 4/5
Comentarios: El Pintu sigui convidando a amigos a compartir cocina y ufiertar distintos puntos de vista de la gastronomía nel so local de Llaviana. Si apocayá cuntábamosvos la xunta con Borja Alcázar del Abrelatas y David Montes, esta vegada xunió con Manuel Suárez, Manu, del Eseteveinte, yá'l so equipu.


Un menú llenu de talentu, onde xueguen más a complementase pal esfrute xeneral qu'a competir por faer el meyor platu, y eso a la fin traduzse no que se come. Bon rollu, ambiente gayoleru y local llenu a españar un xueves de nueche en Llaviana. Maraviyosu.


Amás como novedá, pa la bébora, cuntamos con Sb Gourmet, una distribuidora de vinos que ta empezando, con propuestes bien interesantes, distintes y con un puntu d'atrevencia. Merez la pena probalo.


Xenial el contraste entre Manu y Diego. Manu ufiertando un paséu pel mundu, Diego un paséu por Asturies. Dambos usando productu asturianu pa espresalo, distintes propuestes, mesmu oríxe. Abondo enrriquecedor.


Empezamos fuerte colos vinos. Manzanilla pasada en caña Xixarito. Ventureru pa empezar un menú, pero'l platu pidía daqué potente. Etiqueta bien orixinal (y asina caltuvo tola nueche), para una manzanilla de 8 años que nun mos namoró.


Empezamos col Paséu pola Colla Arniciu d'El Pintu. Trompeta la muerte, foie, perdiz y almendra. Un platu pa comer templáu, con esi contraste ente'l foie y el toque cruxente de l'almendra.


Fuimos col Eseteveinte al so Viaje a Singapur. Con una gyoza de centollu glaseada nun zusmiu de pimientu agriduz, crema picante d'andariques, cámbaru de concha blanda en tempura y espluma de xenxibre. El mueyu picante brutal. Buenísimo, de lo meyor de la nueche.


Camudamos de vinu a Pardas Ruprestris. Un Penedés DO bien frutal y con una acidez marcada. Entra perbién.


Dimos un Paséu pola Pola con El Pintu con otru de los platos de la nueche. Un guisu de callos de bacaláu a l'asturiana con níscalo y güevu ecolóxicu. Sublime. Rompemos el güevu, mezclamoslo tou y a esfrutar cola cuyar yá'l nuevu pan de Diego d'El Chuscu y la Masera, de Sama de Llangréu. Impresionante.


Camudamos a un godello. Para Muestra un Botón 2015. Vinu DO El Bierzo. Agricultura ecolóxica, con un 50% de crianza sobre enguedeyes mientres 1 añu. Frescu, con bona acidez y frutal. Gustónos.


De la Pola a Sicilia, col Eseteveinte. Guisu melosu de puntalette y potarrinos, dentelle de maíz, mazana, calabacín y morciella d'arroz. Pa romper la torta y entemecelo col arroz que tá no fondero del concu.


Otru platu pa esfrutar cola cuyar llenu de colores, testures y sabores. Bien bonu.


Fuimos a Galicia, col Eseteveinte y un llombu de salmonete bonísimo. Vien con pimientu del padrón, so propia brasa comestible y un mueyu de cocíu gallegu. Bien ricu. El llombu buenísimo.


Pa llimpiar la boca y camudar de sabores a la carne, tomamos un cóctel de vodka, remolacha y tabasco. Xenial.


Llegaba la carne, y camudamos al tintu. Kimera Garnatxa. Crianza ellaboráu sobre enguedeyes n'ánfores de barru. Etiqueta distinta pa un vinu intenso, quiciabes abondo fuerte.


El mio platu favoritu de la nueche, siguíu bien de cerca polos callos de bacaláu, foi'l Paséu pola Sierra del Aramo del Pintu. Unes picatostes de pitu caleya, con un contraste brutal ente'l dulce la picatosta y l'intensidá del pitu. Un amenorgamientu de caldu gordo ya intensa, buenísima, bien currada. Xenial.


Fora de carta, lo que bautizamos na mesa como un Paséu per Ibiza (😂). Unes pastielles d'alfabaca y llima pa camudar el sabor a los postres.



El primer postre foi Viaje a Perú, del Eseteveinte. Espluma de cocu y ceviche de frutes col so lleche de tigre xelao y aguacate. Refrescante. Gustónos enforma.


Pal últimu postre, camudamos a Micaela, un Pedro Ximenez mozu, d'apenes 5 años. Pura azucre. Otra etiqueta distinta que nos encantó.


Y acabamos con Paséu por Fabriano, d'El Pintu. localidá italiana onde trabayó Oliver Peon, cocineru d'El Pintu. Puru espectáculu, galleta con distintos sabores. Y nel vasu, una panacota pa morrer. Tábamos a puntu d'españar, pero foi daqué espectacular. Grandes los postres de Oliver.



Como veis, dos visiones abondo distintes, pero complementaries. Un menú xenial, que si peca de daqué, ye de la cantidá nel platu, pero que tien unos matices y una intensidá brutales. Ye xenial ver la evolución d'El Pintu, arrodiándose d'amigos qu'al empar almira na cocina, faciendo eventos únicos y especiales onde tol mundu sal con una sorrisa na boca. ¡Yo que tu nun me perdía'l siguiente!


No hay comentarios

Publicar un comentario