Doña Concha

Señes: Av. Galicia, 14 - Oviedo/Uviéu

Teléfonu:  985 139 682

Facebook: https://www.facebook.com/donaconcharestaurante/
Instagram: [@donaconcharestaurante] https://www.instagram.com/donaconcharestaurante/

Calidá: 4/5
Preciu: 23€

Comentarios: Pedro Martino camudó'l so Naguar d'Uviéu per Ribeseya, desactualizándome una de la direcciones del llibru de Les Fartures (cabrón 😜), pero creciendo y ameyorando profesionalmente, polo que m'allegré muncho por él.

El local del Naguar n'Uviéu quedó vacíu, y tres dellos meses llenos de rumores, a la fin Miguel fízose con él p'abrir un conceutu de Gastrobar más informal qu'el so Delabra orixinal.

Reforma bien atinada al local, estremáuo en dellos ambientes. Zona de barra pa tomar copes (con perbon nivel de güisquis, por cierto), perfeutu pa tomar la primer copa acabante cenar. Detrás de la barra, meses altes de 6 pa compartir mesa con otros comensales. Y na parte de tras, cocina vista, y la zona de comedor.

La carta tien dellos bloques distintos, según tengas el cuerpu. Esbilla de Quesos d'Aitor Luis Vega, con perbona representación asturiana. Cocina tradicional típica de casa de comida con un puntu más actualizáu. Y un toque asiáticu. Imposible probalo tol primer día, pero pinta tou perbién.

D'aperitivu tráennos unes Mantequillas. D'Alfabaca, Oriéganu y Curry.

Ufierta de panes bien ricos. Encantónos el de Chocolate con cachos de naranxa.

Empezamos con una Terrina Casera de Foie y Anguila Afumada. Dexámosla templar un poco porque gana. La combinación de testures y sabores ta de muerte. Encantónos. Miguel comentónos que piensen ameyorar inda más el platu con una bola de xeláu de mazana al Xérez.

Poké Hawaianu con Trucha de Manantial. Un platu qu'entemez Xapón con Hawai, y que ta bien bonu. Papaya, arroz, trucha, sésamu, con aliñu cítrico.

Y acabamos con unes Croquetes de Pollu Asáu, que foi la parte que menos namoró. Sabor intenso a pollu y rellenu casi líquidu. Pero pasaes y grasientes. La presentación en bonsai, xenial.

Nun pidimos postres. Pa beber, la maravía de Sidra de Mesa de Viuda de Angelón avieyada en barriques de carbayu. 1947. Relación calidá-preciu inmeyorable. Tienen bona representación de vinos y sidra asturiano. Un aciertu.

Pagamos por tou 42€. Llocal bien guapu en plenu centru. Con coses por apolazar, como ye normal yá que acaben d'abrir, pero dexando bien bones sensaciones.