El Pintu & Collacios - El Furtivu

Señes: Calle de la Libertad, 11 - La Pola Llaviana
Teléfonu: 984 045 505

Facebook: https://www.facebook.com/El-pintu

Instagram: [@el_pintu_laviana] https://www.instagram.com/el_pintu_laviana/

Calidá: 4/5

Preciu: 45€

Anterior Visita: https://lesfarturesast.blogspot.com/2020/05/la-candelaria-de-mela-el-pintu-la.html

Comentarios: Nueva edición d'El Pintu & Collacios, con un toque inda más especial que les anteriores. N'anteriores ocasiones, Diego axúntase con otru cocineru, y ellaboraben un menú onde cada cocineru aporta los dos platos, el clásicu "A 4 Manes", pero esta vegada, Diego ellaboró conxuntamente un menú con David Montes, un "manu a manu".

David Montes, amás d'amigu, ye un vieyu conocíu de Les Fartures. Cocinó años con Pedro Martino nos sos distintos restoranes, tuvo en La Campana, en Go Sushi, fixo bodes con Diego Regueiro, sofitó'l movimientu de la cerveza artesano dende los sos entamos tando presente cola so cocina en cualesquier eventu (inclusive na creación de Fame), y finalmente, acabó trabayando cola familia Manzano hasta faese cargu de Gloria Xixón. Un andochegu, col que puedes pasar hores y hores falando ensin parar de rir, apasionáu de la caza que lleva un tiempu dándo-y vueltes a un proyeutu propiu alredor de la caza con nome El Furtivu.

Pa beber, Finca Costanillas 2017. Tempranillo, Graciano y Viura. Frutes madures, nótase la madera, y tien un pelín más d'acidez. Gustónos.

Empezamos con 3 entrantes, Navayes y Parrocha de Ríu. Les navayes tienen un toque cítricu que-yos queda xenial, y les parrochas ... son alevinos de Trucha de Ríu. Espectaculares. Tán rebozaes con un toque de mantega y farina de Garbanzu.

Xubimos d'intensidá col Pichón.  Una especie de steak tartar, maceráu con soya, pepinillo, mostaza, cebolleta y llimón. Un taragañu perintensu. Gustónos enforma.

Pasamos a los platos, Palomu Coxu. Tomámoslu de dos maneres. Un ravioli de palombu, con un caldu pa morrer, fechu col mesmu palombu. Bonísimo.

Y en Cruxente rebozáu. Xenial tamién.

Camudamos de vinu, Casper 2014 Jumilla. Uva monastrell, menos acidez que l'anterior, más untuoso. Crianza de 5 meses en barriques. Entra bien.

Codorniz. El platu favoritu de la cena, y creo qu'el de muncho tiempu. Espectacular. Pa comer cola mano y rellambese. Carne perfecto, sabor sutil, pero marcáu. De fondu, un puré de pataca con un amenorgamientu de la mesma falpayar. Brutal.

Y acabamos con un Xabalí al estilu de la güela de Diego. Xabalín perfectu, tienru, con sabor, pero conteníu. Y pa oldear, les cogordes qu'apurren intensidá, y una crema d'arenca pa llimpiar la boca. El fondu del xabalín, cola sardina y el pesto d'alfabaca, xenial. Platazu.

Xuniose a la fiesta La Coctelería de Mai, con un Martini Expresso. Lleva vodca, llicor café, sirope d'alce y café. Bien bonu.

Empezamos los postres con un cortante de David Montes, Cabrales, Sidra y Mazana.

Salvador del Obispu, Cabrales "El Teyedu" y Mazana Asturiana. Adaptación asturiana fecha por David Montes del famosu platu escurríu por Olivier Roellinger, chef de Cancale. Una especie de tosta fina de mazana, con un amiestu de Teyedu con Salvador del Obispu. Dos de los meyores productos ellaboraos n'Asturies entemecíos pa crear un postre únicu. Espectacular.

L'encargáu d'ellaborar el postre foi Albert, de Confitería d'Albert. Seronda. Una representación del Amagüestu, con una mousse de castaña y xeláu de sidra duce. Buenísimo.

3 nueches de seronda lluviosa col llocal a españar. Dignu d'almiración lo que fai Diego con Collacios. Como véis, anueva dientro del so formatu y sigue ufiertando coses distintes. Pergrande nueche.