Publicidá

Contact Me

Nombre

Correo electrónico

Mensaje

Hover Setting

default

Lambic, About Time & Passion - El Cabanón - Brujería

Señes: C/Estación, 19-21. Avilés
Teléfonu: 678 774 336


Facebook: https://www.facebook.com/Cerveceria-el-Cabanon
Twitter: [@CERVECERIACABAN] https://twitter.com/cerveceriacaban
Instagram: [@cerveceria_cabanon] https://www.instagram.com/cerveceria_cabanon/


Preciu: 56€


BRUJERÍA

Señes: C/ Estación, 18 - Avilés
Teléfonu: 985 087 520


Facebook: https://www.facebook.com/brujeriatapas/


Comentarios: Yá perdí la cuenta los díes perespeciales que voi viviendo n'El Cabanón, independientemente de les vivencies personales, el llabor, non yá solo pola dignificación de la cerveza, sinón de la cultura polo xeneral, que tán faciendo, ye ponderatible.


Y munches vegaes contra vientu y marea. Como nesti casu. Un documental que venía de presentase namás en Nueva York y Barcelona, pudo traese en tercer llugar a Asturies gracies al enfotu de Pablo Cabanón, con munches dificultaes y cero sofitu de les instituciones. Depués enllénasenos la boca con poner Avilés y Asturies nel mapa ...


A la fin l'espaciu onde se proxectó'l documental tuvo al altor de les circunstancies y fuimos al Hotel NH La Ferrera, en plenu centru d'Avilés, pa esfrutar de la proyección de "Lambic, About Time & Passion", un documental ellaboráu por Dani Ruíz, de CerveTV, onde se nos convida a viaxar pol universu llocal de les cerveces llámbiques, entemeciendo los puntos de vista más tradicionales, colos más modernos, y colos que conxuguen dambos.


Sobro les cerveces lámbicas yá falamos enforma en Les Fartures, una cerveza que s'ellabora d'una forma bien similar a la nuesa sidra asturiano, 1 vegada al añu, nos meses d'iviernu, y que llelda, pa producir una cerveza acedo, que darréu guarden en barriques y trasieguen o amiesten pa consiguir la bébora deseyada na botella. Asina, podemos beber llámbiques moces de 1 añu, más nidies y ensin apenes gas; Geuze con un amiestu de cerveza d'ún, dos y trés años, con una segunda fermentadura na botella; ya inclusive Kriek, con un amiestu na maceración con frutes como guindes, artimora o uva pa dar un toque afrutado al ácidu. Esta cerveza tien Denominación d0Oríxe y ellabórase de la mesma forma dende fai cientos d'años namás na zona de Bruxeles y contorna.


El documental ye recomendable, un saber ancestral, que tuvo a puntu de sumir, pero que ta viviendo una tercer mocedá cola gabita pola cultura saludable y llocal de los mozos. Nuevos retos que recuerden enforma al (gran) poder d'adaptación de nuesos llagares, a les sos mesmes problemátiques y que dan pistes sobro cómo encarar el futuru.


Tres el documental y un mini alderique, fuimos al Cabanón a la sesión "vermú", que tuvo protagonizada poles cerveces llámbiques.


Pa comer, xusto en frente del Cabanón, La Brujería. Un sitiu bien recomendable, que fae dende les propuestes más risonderes y desenfaes pa picar daqué, hasta los guisos asturianos más tradicionales. Jacobo Rodríguez cocina perbién y el so equipu funciona de maravía. Amás, tienen una relación calidá-preciu estupenda. Jacobo tenía la dura xera d'ellaborar un menú al altor de les cerveces que díbamos probar, mui, mui esclusives y dalguna permala de consiguir. Polo que, según esplicónos, optó por ellaborar un menú tradicional, grasu, pa compensar l'acidez d'esti tipu de cerveces, y atinó dafechu. La mesa duldó qué taba meyor, si les cerveces o'l menú, anque lo meyor, como siempres, ye dicir que la conxugación foi perfecta. Gran trabayu de La Brujería.


Empezamos con una maravía. Cantillon Grand Cru Bruocsella (2015-2016). Llote bien esclusivu que nun s'entemez y guarden 3 años en barriques de carbayu. Una cerveza ensin apenes carbonatación, que xeneralmente beben en bomba de mano (cañero ensin gas inyectáu) y que son les que bebíen d'antiguo los granxeros de la zona. Por testura ya inclusive sabor, ye lo más paecío a un vinu blanco que vas tomar en cuestión de cerveces. Bonísima. A 45€ la botella de 75cl.


¿Con qué casar esta xoya? Con un Pastel de Tiñosu. Pero de los bonos. Xugosu, potente. Lleva un cruxente d'alga y arroz, que da inda más potencia. Y un alioli entemecíu cola mesma cerveza. Bonísimo.


Tilquin Oude Quetsche à l’Ancienne. En cañeru. Cerveza llámbica a partir de la fermentadura de cirueles, y darréu entemecida la llámbica jóven de 1 años, cola que yá tien 2 años en barrica, nuna nueva barrica per espaciu de 4 meses. Tilquin ye una les fábriques de cerveza llámbica qu'apenes fai producción propia y compra la llámbica xoven a otres cerveceres pa manipoliales al so gustu. Son unos magos de los amiestos. La cerveza ye aceda, pero al empar notes la fruta maduro. Ye perfecta pa empecipiase nel mundu de les llámbiques.


La xenialidá de Jacobo foi atrevese a entemecer esta llámbica con una Fabada. Y trunfó. La cara de sorpresa de la xente al ver el platu de fabes foi dignu de ver, pero inda foi meyor ver la cara de prestu al amiestu la primer cuyarada con un tragu de cerveza. Combinación maraviyosa ente un platu tan contundente, qu'a éstes taba increíble. La faba vien de Tierra Vaqueira, un nuevu proyectu que tienen ente manes, y ye espectacular. Y el compangu tuvo al altor, d'Embutíos Naveda. Trupa, con munches hores detrás, y con un sabor impresionante. Costó contenese pa nun repitir.


Si'l nivel cerveceru yera altu, lo de la 3 Fonteinen Oude Geuze Cuvée Armand & Gaston foi un auténticu espectáculu. Ensin dulda, una de los meyores Geuze que puedes atopar nel mercáu, mui mala de consiguir. Ellaborada a partir de llámbiques avieyaes en 7 barriles distintes, de 3 Fonteinen de 2013, 2014 y 2015. Avieyada en barriles de carbayu, ye una cerveza en constante evolución. El so procesu natural de fermentadura continua na botella. Arume afrutáu, a mazanes y llimón. D'espluma bien llixera. De prestosa acidez, que s'anidia a midida que madura. Maraviyosa.


Tomámosla con otru platazo, Pitu Caleya d'Arlós. Una crema colos fégados del propiu pitu, y una guarnición de cogordes y pimientos. La carne desfaise, tien intensidá pero caltien la elegancia. Y queda xenial cola cerveza.


Pa los postres, fuimos a les cerveces tipu Kriek, Mariage Parfait. Llámbica de 1 añu entemecida con cereces madures. 400gr de cereza per llitru. Darréu maurezse unos 6 meses en barriques de carbayu. Como interés, dicir que ye una cerveza que se caltien en botella un mínimu de 20 años, y ta llista pa ser tastiada dos años dempués del so embotelláu. Foi la que menos me namoró de toes.


Tomámosla con Quesu la Peral. Y la verdá ye que van xenial, ye un amiestu perfeutu.


Y con Chocolate & Cereza. Praliné con barquillu, chocolate, y un toque de cereza. Bien bonu.


Amás cuntamos cola Carlos de Cerveza Agullons, famosos por ellaborar cerveces de fermentadura espontánea (recordái que namás se pueden llamar llámbiques a les ellaboraes na zona de Bruxeles) pela redolada de Barcelona, a presentanos les so cerveces nuna tardi qu'allongó hasta altes hores n'El Cabanón. Una vida llena de pasión dedicada a la cerveza na so masía catalana. Paga la pena la visita.


Un día pa recordar. Cerveza, cultura, muncha pasión, tradición, nueves formes de vender un productu ... y tou entamáu por un pequeñu hosteleru avilesín. Ensin dulda, ye pa sentise arguyosu. ¡Puxa'l Cabanón!


No hay comentarios

Publicar un comentario