Nueva Visita: Curro

Señes: La Peruyal, 12 - Blimea

Teléfonu: 985 671 594

Facebook: https://www.facebook.com/ParrillabarElCurro/

Calidá: 3/5

Preciu: 18€

Anterior Visita: https://lesfarturesast.blogspot.com/2017/04/el-curro.html

Comentarios: Paga la pena dir a La Peruyal. Ensin dulda, les meyores cebolles rellenes que probemos nunca, y llevamos unes cuantes probaes. Pero la redolada amás, ye una pasada. Asitiáu nuna casona con vistes sobro'l valle y Blimea, ayena'l mundu. Con una gran escampada ya inclusive dalgún cañicón pa que xueguen los guaḥes.

Famosos pelos sos espiches cuando empieza la primer sidra l'añu, y pola so parrilla yá'l so corderu a la estaca. Terraza pa tomar sidra pel branu, y na zona de dientro, una chimenea que preside tol comedor pa la ivernada.

Zona de barra y meses con puzzles decorando les parés del local. Tou pintorescu. Eso sí, cocina de primera.

Empezamos pola estrella de la casa. Les Cebolles Rellenes. Espectaculares. Nun puede pidise más. Namás per elles, yá paga la pena xubir hasta ellí. Nun mueyu col que vas acabar toles esistencies de pan. Tenéis que probales.

Probemos tamién los sos Pimientos Rellenos. Pidimos ún rellenu de carne asáu y otru de bonitu, Perbonos los dos, pero meyor el de bonitu. Otru platazu.

Callos. Gloriosos. De los meyores. Toque picante, allegres. Díbamos peles cebolles pero na mesa, los callos fueron los trunfadores.

Vienen acompañaos d'unes pataques frites.

Y acabamos con Cabritu con Patates Frites. Impresionante tamién. Bonos cachos, bon mueyu, con base de pataques frites.

A los postres, como podéis imaxinar, nun llegamos. Pa beber, Sangría de Sidra. Suave y rica.

Y equí vien lo meyor. 5 persones, pagamos 20€ per cabeza. Xenial cocina casera nuna redolada preciosa. Mui recomendable.